Nehemia

4 Gateetee ge Sanebalathi a ekwa gore re be re aga leboto leswa, a galefa a ba a kwata kudu gomme a dulela go kwera Bajuda. 2  A bolela le batho ba setšhaba sa gabo le mašole a Samaria a re: “Bajuda ba ba go fokola ba nagana gore ba dira eng? Na ba tla kgona go dira mošomo wo ba sa thušwe ke motho? Na ba tla dira dihlabelo ba kgona go fetša mošomo wo ka letšatši letee? Na ba tla kgona go diriša maswika a swelego ao a lego mokgobong wa ditšhila?”

3  Bjale Tobia wa Moamoni yo a bego a eme kgauswi le yena o ile a re: “Le ge ba ka aga leboto ka maswika, le phukubje e ka le wiša ge e ka tabogela go lona.”

4  Ke moka Nehemia a re: Wena Modimo wa rena re theetše, ka gobane batho ba ba re nyaditše. Dira gore ba welwe ke dilo tše mpe* ka baka la ge ba re kwera, gomme o dire gore manaba a bona a ba fenye e bile ba išwe bothopša nageng e nngwe. 5  O se ke wa khupetša molato wa bona goba wa phumola sebe sa bona, ka gobane ba rogile batho bao ba agago leboto.

6  Ka gona re ile ra tšwela pele re aga leboto, gomme leboto ka moka la kopana, ra le aga go fihla bogareng bja lona, ke moka batho ka moka ba tšwela pele ba šoma ka mafolofolo.

7  Bjale gateetee ge Sanebalathi, Tobia, Baarabia, Baamoni le Baashidodo ba ekwa gore mošomo wa go lokiša maboto a Jerusalema o be o tšwela pele le gore mo go bego go senyegile go lokišitšwe, ba ile ba kwata kudu. 8  Ka moka ga bona ba ile ba kwana gomme ba loga maanomabe a gore ba tle ba lwe le batho ba Jerusalema le go tsoša mpherefere moo. 9  Eupša re ile ra rapela Modimo wa rena gore a re thuše gomme ra bea batho ba go leta motse gore ba re šireletše mosegare le bošego.

10  Eupša batho ba Juda ba be ba re: “Batho bao ba agago ba feletšwe ke matla, mola e le gore go na le ditšhila tše dintšhi tšeo di swanetšego go lahlwa. Re ka se tsoge re kgonne go fetša go aga leswa leboto le.”

11  Le gona manaba a rena a ile a dulela gore: “Le pele ba ka tseba gore go direga eng, re tla ba hlasela, ra ba bolaya gomme ra emiša mošomo wa bona.”

12  Nako e nngwe le e nngwe ge Bajuda bao ba dulago kgauswi le rena ba etla motseng, ba be ba dulela go re botša gore: “Manaba a tla tla a le hlasela a etšwa ka mahlakoreng ka moka.”

13  Ke ile ka bea banna dikarolong tšeo di bego di se tša tšwa di fela le tšeo di bulegilego tša leboto, ka ba bea go ya ka malapa a bona ba swere ditšhoša, marumo le bora. 14  Ge ke bona gore ba be ba tšhogile ke ile ka ema gateetee gomme ka botša dintona, baetapele le setšhaba ka moka ka re: “Le se ke la ba boifa. Dulang le gopola gore Jehofa ke yo mogolo e bile o na le matla a magolo, gomme le lwele banababo lena, barwa ba lena, barwedi ba lena, basadi ba lena le magae a lena.”

15  Ka morago ga gore manaba a rena a kwe gore re a tseba gore a nyaka go dira eng, le gore Modimo wa nnete o hlakahlakantšhitše leano la ona, ka moka ga rena re ile ra boela mošomong wa go aga leboto. 16  Go tloga letšatšing leo go ya pele, seripa sa bašomi ba ka se ile sa dira mošomo, gomme seripa se sengwe sa bašomi sa swara marumo, dikotse le bora, sa ba sa apara diaparo tša ntwa. Ke moka dintona di ile tša ema ka morago ga Bajuda gomme tša ba thekga. 17  Di ile tša thekga batho bao ba bego ba aga leboto. Bao ba bego ba rwala dilo tše boima ba be ba šoma ka seatla setee mola ka se sengwe ba swere dibetša. 18  Le gona moagi yo mongwe le yo mongwe o be a hlomile tšhoša lethekeng la gagwe ge a dutše a aga, gomme yo a bego a letša naka ge go na le kotsi o be a eme kgauswi le nna.

19  Ke moka ka bolela le dintona, baetapele le setšhaba ka moka ka re: “Mošomo wa go aga leboto e sa le o montšhi, e bile re šoma re le kgole le kgole. 20  Ge le ekwa modumo wa naka, le tle le kgobokane moo ke lego gona. Modimo wa rena o tla re lwela.”

21  Bjale re ile ra tšwela pele re šoma, mola seripa se sengwe sa bašomi se be se re šireleditše se swere marumo go tloga mesong go ba go fihlela bošego ge dinaledi di bonala. 22  Ka nako yeo ke ile ka re go setšhaba: “Anke monna yo mongwe le yo mongwe a fetše bošego a na le motho yo a mo hlokometšego mo Jerusalema. Batho bao ba re hlokomele bošego, gomme ba šome mosegare.” 23  Ge e le nna, banabešo, batho bao ba bego ba ntlhokometše le bao ba bego ba ntšhireletša ba ntšhetše morago, re be re sa apole diaparo tša rena, yo mongwe le yo mongwe wa rena o be a swere sebetša sa gagwe ka seatla sa gagwe sa le letona.