Nehemia

8 Setšhaba ka moka se ile sa kgobokana mmarakeng woo o lego pele ga Keiti ya Meetseng. Se ile sa bolela le Esera yo e bego e le mongwalolodi, gore a tliše puku ya Molao wa Moshe woo Jehofa a o laetšego Baisiraele. 2  Ke moka letšatšing la pele la kgwedi ya bošupa, moperisita Esera o ile a tliša puku ya molao a ba a e bala phuthegong yeo e nago le banna le basadi gotee le bana bao ba godilego bao ba kgonago go theetša le go kwešiša. 3  O ile a e balela godimo a le mmarakeng woo o lego pele ga Keiti ya Meetseng go tloga mesong go fihla mosegare wa sekgalela. O ile a e balela banna le basadi gotee le bana bao ba godilego bao ba kgonago go theetša le go kwešiša, gomme setšhaba ka moka se be se hlwaile tsebe ge puku ya Molao e balwa. 4  Esera yo e bego e le mongwalolodi o be a eme sethaleng sa kota seo se bego se diretšwe tiragalo yeo, kgauswi le yena ka go le letona go be go eme Matitia, Shema, Anaya, Uria, Hilikia le Maaseya gomme ka go le letshadi e le Pedaya, Mishaele, Malakiya, Hashuma, Hashi-badana, Sakaria le Meshulama.

5  Esera o ile a bula puku gomme setšhaba ka moka se be se kgona go mmona ka gobane o be a eme sethaleng. Ge a e bula, setšhaba ka moka se ile sa ema. 6  Esera a reta Jehofa Modimo wa nnete, yena Modimo yo mogolo, ke moka setšhaba ka moka se ile sa araba se emišitše diatla sa re: “Amene! Amene!” Sa khunamela Jehofa se inamišeditše difahlego fase. 7  Jeshua, Bani, Sherebia, Jamini, Akuba, Shabethai, Hodia, Maaseya, Kelita, Asaria, Josabadi, Hanana le Pelaya bao e bego e le Balefi, ba be ba hlalosetša setšhaba Molao nakong ya ge setšhaba se sa eme. 8  Ba ile ba tšwela pele ba bala puku ya Molao wa Modimo wa nnete ka go hlaboša, ba e hlalosa ka tsela e kwagalago, e le gore ba thuše batho go e kwešiša.

9  Setšhaba ka moka se ile sa lla ge se ekwa Molao o balwa le go hlaloswa, ka gona Nehemia yo e bego e le mmuši le moperisita Esera yo e bego e le mongwalolodi gotee le Balefi bao ba bego ba ruta setšhaba ba re go sona ka moka: “Letšatši le ke le lekgethwa go Jehofa Modimo wa lena. Le se ke la nyama goba la lla.” 10  Ke moka Nehemia a re go sona: “Sepelang le yo ja dilo tše kaonekaone le nwe le beine e bose gomme le di nee le bao ba di hlokago, letšatši le ke le lekgethwa go Morena wa rena, le se ke la nyama ka gobane lethabo leo Jehofa a le neago lona le tla le matlafatša.”* 11  Balefi ba be ba homotša setšhaba ka moka ba re: “Le se ke la lla! Letšatši le ke le lekgethwa, le gona le se ke la nyama.” 12  Setšhaba ka moka se ile sa sepela sa yo ja le go nwa le go nea bao ba se nago selo dijo gomme sa thaba kudu, ka gobane se be se kwešišitše mantšu ka moka a Molao.

13  Dihlogo tša malapa a setšhaba ka moka, baperisita le Balefi ba kgobokanela Esera yo e bego e le mongwalolodi ka gobane ba be ba nyaka go kwešiša Molao gabotse. 14  Ba ile ba hwetša gore Molaong wo Jehofa a bego a o laetše a diriša Moshe go ngwadilwe gore Baisiraele ba swanetše go dula mešašeng ka kgwedi ya bošupa nakong ya Monyanya wa Mešaša, 15  le gore ba swanetše go ya metseng ya bona ka moka le Jerusalema ka moka ba botše batho gore ba ye dithabeng gore ba tle le makala a mehlare ya mehlware, a mephaene, a memirite,* a mepalema gotee le makala a mehlare e mengwe e le gore go dirwe mešaša, go ya ka seo se ngwadilwego.”

16  Ka gona setšhaba sa tšwa sa tla le makala gomme sa itirela mešaša, yo mongwe le yo mongwe a itirela yona tlhakeng ya ntlo ya gagwe, lapeng la gagwe, malapeng a ntlo ya Modimo wa nnete, mmarakeng wa Keiti ya Meetseng goba wa Keiti ya Efuraimi. 17  Batho ka moka bao ba boilego bothopša ba ile ba itirela mešaša gomme ba dula go yona nakong yeo ya monyanya. Baisiraele ba be ba thabile kudu ka gobane e be e le la mathomo ba keteka monyanya wo ka mokgwa wo ga e sa le go tloga mehleng ya Joshua morwa wa Nuni go ba go fihla letšatšing leo. 18  Puku ya Molao wa Modimo wa nnete e be e balelwa godimo letšatši le letšatši, go tloga letšatšing la pele go ba go fihla letšatšing la mafelelo. Setšhaba se ile sa ba le monyanya ka matšatši a šupago gomme ka letšatši la seswai gwa ba le seboka se sekgethwa, bjalo ka ge Molao o be o laetše gore go dirwe bjalo.