Ekisodo

40 Jehofa a re go Moshe: 2 “Ka letšatši la pele la kgwedi ya pele, o hlome taberenakele, e lego tente ya go kopana. 3 O tsenye areka yeo e nago le maswika ao a ngwadilwego melao ya ka ka taberenakeleng gomme o e šire ka gareteine. 4 O tsenye le tafola gomme o e beakanye gabotse, o tliše le sehlomelamabone ke moka o laete mabone a sona. 5 O bee aletare ya gauta ya diorelo pele ga areka yeo e nago le maswika ao a ngwadilwego melao ya ka gomme o fege gareteine ya mojako wa taberenakele moo e dulago gona.

6 “O bee aletare ya dibego tša go fišwa pele ga mojako wa taberenakele, e lego tente ya go kopana, 7 gomme o bee sekotlelo sa go hlapela magareng ga tente ya go kopana le aletare, ke moka o tšhele meetse ka gare ga sona. 8 O direle taberenakele lapa, gomme o fege digareteine mojakong wa lapa. 9 Ka morago ga moo, o tšee makhura a go tlotša motho ge a kgethwa gomme o tlotše taberenakele le dilo ka moka tšeo di lego ka gare ga yona, ke moka o dire gore yona le dilo ka moka tšeo di lego ka gare ga yona e be tše kgethwa. 10 O tlotše aletare ya dibego tša go fišwa le dibjana tša yona ka moka gomme o e dire gore e be e kgethwakgethwa. 11 O tlotše sekotlelo sa go hlapela le selo seo se bewago go sona gomme o dire gore e be tše kgethwa.

12 “O batametše Arone le barwa ba gagwe mojakong wa tente ya go kopana gomme o ba hlapiše ka meetse. 13 Ke moka o apeše Arone diaparo tše kgethwa, o mo tlotše ka makhura o be o mo kgethagatše gomme e tla ba moperisita wa ka. 14 Ka morago ga moo o batametše barwa ba Arone go nna gomme o ba apeše diaparo. 15 O ba tlotše go swana le ka mokgwa woo o tloditšego tatago bona e le gore e tle e be baprista ba ka. Le gona, ka ge o ba tloditše e tla ba baprista ba ka go ya go ile, melokong ya bona ka moka.”

16 Moshe a dira dilo ka moka go ya le ka mokgwa woo Jehofa a mo laetšego ka gona. A di dira tlwaa go ya le ka mokgwa woo Modimo a mo laetšego ka gona.

17 Ka gona ka letšatši la pele, kgweding ya pele, ngwageng wa bobedi, taberenakele e ile ya hlongwa. 18 Ge Moshe a hloma taberenakele, o ile a bea maotwana a yona ao a nago le mašoba, a emiša diforeime tša yona, a tsenya dikota tša yona le go hloma diphilara tša yona. 19 Ke moka a phurollela tente godimo ga taberenakele gomme a e khupetša ka yona. Moshe a dira go ya le ka mokgwa woo Jehofa a bego a mo laetše ka gona.

20 Ka morago ga moo, a tšea maswika ao a ngwadilwego melao ya Modimo a a bea ka Arekeng, a tsenya dikota mekgokong ya Areka gomme a tswalela Areka yeo ka sekhurumelo. 21 Ke moka a tsenya Areka ka taberenakeleng, a fega gareteine gomme a šira Areka yeo e bego e na le maswika ao a ngwadilwego melao ya Modimo. Moshe a dira go ya le ka mokgwa woo Jehofa a bego a mo laetše ka gona.

22 Ke moka a tsenya tafola ka lehlakoreng la ka leboa la taberenakele, e lego ka tenteng ya go kopana, ka ntle ga Sekgethwakgethwa.* 23 A bea dinkgwa godimo ga tafola moo di swanetšego go dula gona pele ga Jehofa, go ya le ka mokgwa woo Jehofa a bego a laetše Moshe ka gona.

24 Ke moka a bea sehlomelamabone ka tenteng ya go kopana go lebana le tafola, a se bea ka lehlakoreng la ka borwa la taberenakele. 25 Ka morago ga moo, Moshe a laeta mabone pele ga Jehofa, a dira go ya le ka mokgwa woo Jehofa a bego a mo laetše ka gona.

26 Ka morago ga moo a bea aletare ya gauta ka tenteng ya go kopana pele ga gareteine, 27 e le gore a fiše diorelo tša go nkga bose mo go yona. Moshe a dira go ya le ka mokgwa woo Jehofa a bego a mo laetše ka gona.

28 Mafelelong a fega gareteine ya mojako wa taberenakele.

29 A bea aletare ya sebego sa go fišwa mojakong wa taberenakele, e lego tente ya go kopana, e le gore a tle a neele sebego sa go fišwa le sebego sa mabele mo go yona, go ya le ka mokgwa woo Jehofa a bego a laetše Moshe ka gona.

30 Ke moka a bea sekotlelo sa go hlapela magareng ga tente ya go kopana le aletare, gomme a tšhela meetse ka gare ga sona. 31 Moshe le Arone gotee le barwa ba gagwe ba hlapela matsogo a bona le maoto a bona ka gare ga sona. 32 Nako le nako ge ba be ba tsena ka tenteng ya go kopana le ge ba be ba batamela aletare ba be ba hlapa matsogo a bona le maoto a bona, go ya le ka mokgwa woo Jehofa a bego a laetše Moshe ka gona.

33 Mafelelong a fega digareteine tša lapa go dikologa taberenakele le aletare, gomme a fega gareteine ya mojako wa lapa.

Ka gona Moshe a fetša mošomo. 34 Leru la khupetša tente ya go kopana, ke moka letago la Jehofa la tlala ka taberenakeleng. 35 Moshe a se kgone go tsena ka tenteng ya go kopana ka gobane leru le be le le mo go yona, e bile letago la Jehofa le tletše ka taberenakeleng.

36 Le gona, ge leru leo le be le tloga godimo ga taberenakele, Baisiraele ba be ba hlomolla ditente gomme ba sepela. 37 Eupša ge leru leo le be le sa tloge godimo ga taberenakele, ba be ba sa hlomolle ditente go ba go fihla mohlang leru leo le tloga. 38 Nakong ka moka ya ge Baisiraele ba be ba le leetong, ba be ba bona leru la Jehofa le le godimo ga taberenakele mosegare, gomme bošego ba bona mollo godimo ga yona.