Jesaya
6 Ngwageng woo Kgoši Usia a hwilego+ ka wona, ke ile ka bona pono. Ke ile ka bona Jehofa a dutše setulong sa bogoši seo se phagamego,+ seaparo sa gagwe e be e le se se telele ebile se tletše ka tempeleng. 2 Baserafi* ba be ba eme ka godimo ga gagwe. Morongwa yo mongwe le yo mongwe o be a na le diphego tše tshela. O be a ikhupeditše sefahlego ka tše pedi, gomme a khupeditše maoto ka tše pedi ke moka a fofa ka tše pedi.
3 Ba be ba goeletšana ba re:
“Mokgethwa, mokgethwa, mokgethwa ke Jehofa wa madira!+
Letago la gagwe le tletše lefaseng ka moka.”
4 Ge barongwa bao ba be ba goeletša, diforeimi tša mejako di ile tša šikinyega gomme ntlo ya tlala muši.+
5 Ke moka nna ka re: “Ruri ke wa madimabe,
Ke no swana le motho yo a hwilego
Ka gobane dilo tšeo ke di bolelago ga se tša hlweka,
Ebile ke phela le batho bao ba bolelago dilo tšeo di sa hlwekago,+
Le ka gobane ke bone Kgoši, yena Jehofa wa madira ka boyena.”
6 Ka yona nako yeo, ke ge yo mongwe wa baserafi a fofela go nna gomme ka seatleng sa gagwe o be a swere legala+ leo a le tšerego aletareng+ a diriša selo sa go topa magala. 7 O ile a nkgwatha molomo ka legala leo gomme a re:
“Bona! Legala le le kgwathile molomo wa gago,
O swaretšwe molato wa gago,
Ebile sebe sa gago se lebaletšwe.”
8 Ke moka ka kwa lentšu la Jehofa le re: “Ke tla roma mang, le gona ke mang a tlago go re yela?”+ Nna ka re: “Ke nna yo! Roma nna.”+
9 Yena a re go nna: “Sepela o yo botša setšhaba se o re:
‘Le tlo kwa gantšintši,
Eupša le ka se kwešiše,
Ebile le tlo bona gantšintši,
Eupša le ka se lemoge selo.’+
10 Dira gore dipelo tša batho ba di retele,+
Gore ba se ke ba ba le temogo,+
Thiba ditsebe tša bona
Gore ba se ke ba kwa,
O foufatše mahlo a bona
Gore ba se ke ba bona
E le gore ba se ke ba boela go nna gomme ba fodišwa.”+
11 Nna ka re: “Jehofa, go tla ba ka mokgwa wo go fihlela neng?” Yena a re:
“Go fihlela ge metse e eba marope, go se na batho bao ba dulago go yona,
Gomme dintlo di se na batho bao ba dulago go tšona.
Naga yona e sentšwe ebile batho ba ka se kgone go dula go yona,+
12 Go fihlela Jehofa a tloša batho a ba iša kgole,+
Gomme metse yeo e lego nageng e fetoga marope.
13 Eupša nageng go tla šala batho ba sego kae* gomme le bona ba tla no tšhungwa. Ba tlo swana le kutu yeo e šetšego ka morago ga gore mohlare o mogolo le o mogologolo e ripiwe. Peu e kgethwa e tla mela kutung yeo.”*