Jeremia

26 Ge Jehoyakima morwa wa Josia, kgoši ya Juda, a be a thoma go buša, Jehofa o ile a bolela le Jeremia a re: 2 “Se ke seo Jehofa a se bolelago: ‘Ema lapeng la ntlo ya Jehofa, gomme o bolele mabapi le batho ka moka ba metse ya Juda bao ba tlago ntlong ye ya Jehofa go tlo rapela. O ba botše dilo ka moka tšeo ke tlago go go botša tšona. O se ke wa tlogela le ge e ka ba lentšu letee. 3 Mohlomongwe ba tla theetša gomme yo mongwe le yo mongwe a tlogela go dira dilo tše mpe, gomme nna ke tla fetoša monagano, ka se sa ba tlišetša masetlapelo ao ke bego ke nyaka go ba tlišetša ona ka baka la dilo tše mpe tšeo ba di dirago. 4 O ba botše o re: “Jehofa o re: ‘Ge e ba le ka se ntheetše ka go se latele molao wo ke le neilego wona, 5  la se theetše molaetša wa bahlanka ba ka ba baporofeta, bao ke ba rometšego go lena gantšhi le gantšhi, bona bao le sa kago la ba theetša, 6 gona ke tla dira ntlo ye gore e swane le seo ke se dirilego kua Shilo, e bile ke tla dira gore ditšhaba ka moka tša lefase di rogake motse wo.’”’”

7 Ka gona, baperisita, baporofeta le batho ka moka ba kwa ge Jeremia a bolela molaetša wo ka ntlong ya Jehofa. 8 Bjale ya re ge Jeremia a feditše go bolela dilo ka moka tšeo Jehofa a mo laetšego gore a di botše batho ka moka, baperisita, baporofeta le batho ka moka ba mo swara, gomme ba re: “O swanetše go hwa. 9 Ke ka baka la’ng o porofetile ka leina la Jehofa wa re: ‘Ntlo ye e tlo swana le seo se dirilwego kua Shilo, e bile motse wo wona o tlo fedišwa gomme gwa se sa ba le motho yo a dulago go wona’?” Ke moka batho ka moka ba kgobokanela Jeremia ntlong ya Jehofa.

10 Ge dintona tša Juda di ekwa mantšu a, di ile tša tloga ntlong ya kgoši gomme tša ya ntlong ya Jehofa, ke moka tša dula keiting e mpsha ya ntlo ya Jehofa. 11 Baperisita le baporofeta ba botša dintona le batho ka moka ba re: “Monna yo o swanetše go ahlolelwa lehu, ka gobane o porofetile gore motse wo o tlo welwa ke masetlapelo, ka ge le lena le ikwetše ka ditsebe tša lena.”

12 Ke moka Jeremia a re go dintona ka moka le go batho ka moka: “Ke Jehofa yo a nthomilego gore ke porofete ka molaetša wa kahlolo wo le o kwelego mabapi le ntlo ye le motse wo. 13 Bjale tlogelang mekgwa ya lena e mebe le dilo tše mpe tšeo le di dirago gomme le kweng Jehofa Modimo wa lena, ke moka Jehofa o tlo fetoša monagano mabapi le masetlapelo ao a boletšego gore o tlo le tlišetša ona. 14 Eupša ge e le nna, ke ka diatleng tša lena. Ntireng selo le ge e le sefe seo le bonago se lokile le seo le se ratago. 15 Eupša tsebang gore ge e ba le ka mpolaya, lena le motse wo le badudi ba motse wo, le tlo ba le molato wa go bolaya motho yo a se nago molato, ka gobane Jehofa ke yena a nthomilego go lena gore ke bolele molaetša wo le theeditše.”

16 Ke moka dintona le batho ka moka ba re go baperisita le go baporofeta: “Monna yo ga se a swanela go ahlolelwa lehu, ka gobane o boletše le rena a diriša leina la Jehofa Modimo wa rena.”

17 Le gona, ba bangwe ba banna ba bagolo ba mo nageng ba emelela gomme ba re go batho ka moka bao ba bego ba kgobokane moo: 18 “Mika wa Moreshethe o kile a porofeta nakong ya ge go buša Kgoši Hesekia wa Juda, gomme a botša batho ka moka ba Juda a re: ‘Jehofa wa madira o re:

19 Na Kgoši Hesekia wa Juda le batho ka moka ba Juda ba ile ba mmolaya? Na kgoši yeo ga se ya ka ya boifa Jehofa, gomme ya kgopela Jehofa gore a e gaugele, e le gore Jehofa a fetoše monagano wa gagwe mabapi le masetlapelo ao a a boletšego gore a tla ba wela? Bjale le rena ge re ka dira selo sa go swana le se, re tlo ipakela masetlapelo a magolo.

20 “Le gona go kile gwa ba le monna yo mongwe yo a bego a porofeta a diriša leina la Jehofa. Leina la gagwe e be e le Urija morwa Shemaya yo a tšwago Kiriathe-jearima. Le yena o ile a porofeta ka motse wo le naga ye, gomme molaetša wo a bego a o bolela o be o swana le wa Jeremia. 21 Ge Kgoši Jehoyakima le mašole a gagwe ka moka a matla gotee le dintona tša gagwe ka moka di ekwa molaetša woo, kgoši e ile ya nyaka go mmolaya. Ka gona ge Urija a ekwa seo, o ile a tšhoga gomme a tšhabela Egepeta. 22 Ka gona Kgoši Jehoyakima a roma Elinathane morwa wa Akiboro le banna ba bangwe gore ba ye Egepeta. 23 Ba ile ba tšea Urija Egepeta, gomme ba mo tliša go Kgoši Jehoyakima, yena a mmolaya ka sabola gomme a lahlela setopo sa gagwe mabitleng a batho feela.”

24 Eupša Ahikama morwa wa Shafane, o ile a šireletša Jeremia gore setšhaba se se ke sa mmolaya.