Daniele

8 Ka ngwaga wa boraro wa ge Kgoši Belshatsara a buša, nna Daniele ke ile ka bona pono e nngwe, ka morago ga yela ke ilego ka e bona mathomong. 2 Ke ile ka bona pono, gomme ka re ke e lebeletše, ka ipona ke le ka mošate wa Shushani, woo o lego porofenseng ya Elama. Ge ke be ke lebeletše pono yeo, ke ile ka ikhwetša ke le kgauswi le mokero wa Ulai. 3 Ge ke lebelela, ka bona nku e tona e eme pele ga mokero, e be e na le manaka a mabedi. Manaka ao a mabedi e be e le a matelele, eupša le lengwe e be e le le letelele go feta le lengwe gomme le letelele ke lona le metšego ka morago. 4 Ka bona nku yeo e tona e kitimela ka bodikela, ka leboa le ka borwa e le gore e hlasele manaba. Go be go se na sebata sa naga seo se bego se ka kgona go ema pele ga yona, e bile go be go se na motho yoo a ka phološago dibata tše dingwe go yona.* E be e itirela boithatelo e bile e ikgantšha.

5 Ge ke sa dutše ke lebeletše, ke ile ka bona phooko e etla e etšwa ka bodikela, e feta dinaga tša lefase ka moka eupša e sa kgwathe fase. Phooko yeo e be e na le lenaka le legolo magareng ga mahlo a yona. 6 E be e etla e lebile nku e tona yeo e nago le manaka a mabedi, yona yeo ke e bonego e eme pele ga mokero. E be e kitimela go yona e galefile kudu.

7 Ke ile ka e bona e batamela nku e tona, le gona e be e eya go yona e galefile kudu. E ile ya thula nku yeo e tona gomme ya roba manaka a yona a mabedi. Nku yeo e be e se na matla a go emelela gore e lwe le yona. Phooko yeo e ile ya wišetša nku fase gomme ya e gatakela. Le gona, go be go se na motho yoo a ka phološago nku yeo go yona.

8 Ke moka ka bona phooko yeo e ikgantšha ka mo go feteletšego, eupša eitše ge e se no ba matla, lenaka la yona le legolo la robega. Ke moka gwa tšwelela manaka a mangwe a mane a magolo go e na le gore go tšwelele le letee, le gona a be a lebeletše dikhoneng tše nne tša lefase.*

9 Godimo ga lenaka le lengwe go ile gwa tšwelela lenaka le lengwe le lenyenyane. Le ile la gola kudu le lebeletše ka thoko ya borwa le ka thoko ya bohlabatšatši le ka thoko ya naga ya Mokgabišo. 10 Le ile la gola kudu moo le ilego la fihla madireng a magodimo, gomme la dira gore a mangwe a madira le tše dingwe tša dinaledi di wele lefaseng, ke moka la di gatakela. 11 Le ile la ikgantšha, la ba la ikgantšhetša le Moetapele wa madira. La mo tšeela sehlabelo sa gagwe sa letšatši le letšatši, gomme la wiša le lefelo la gagwe le lekgethwa leo a le hlomilego. 12 Ka baka la dibe tšeo di dirilwego, lenaka leo le ile la fiwa matla a go laola madira, la ba la fiwa le sehlabelo sa letšatši le letšatši. La tšea dilo ka moka tšeo di sepedišanago le nnete, la dulela go di lahlela lefaseng. Le ile la kgona go dira seo le bego le nyaka go se dira.

13 Ke moka ka kwa mokgethwa a bolela, gomme mokgethwa yo mongwe a bolela le mokgethwa yoo a bolelago, a re: “Pono ya sehlabelo sa letšatši le letšatši le ya sebe seo se bakago tshenyo, yeo e dirago gore lefelo le lekgethwa le madira di gatakelwe e tla tšwela pele go fihla neng?” 14 Ke moka a re go nna: “Go tla feta matšatši a 2 300 (dikete tše pedi le makgolo a mararo),* ya ba gona lefelo le lekgethwa le bušetšwago boemong bja lona bjo bo swanetšego.”

15 Eitše ge nna Daniele ke sa lebeletše pono yeo gomme ke nyaka go e kwešiša, ka napa ka bona motho yo e kego ke monna a eme pele ga ka. 16 Ke moka ka kwa lentšu leo le swanago le la motho gare ga mokero wa Ulai le goeletša le re: “Gabariele, dira gore motho yoo a kwešiše seo a se bonego.” 17 Ka gona, motho yoo a tla kgauswi le moo ke bego ke eme gona, eupša ge a mpatamela ke ile ka tšhoga kudu moo ke ilego ka wela fase gomme ka kgwatha fase ka sefahlego sa ka. A re go nna: “Wena morwa wa motho, tseba gore pono ye ke ya mehleng ya bofelo.” 18 Eupša eitše ge a dutše a bolela le nna, ka napa ka ya ka boroko sefahlego sa ka se kgwathile fase. Ka gona a ntshwara, gomme a nthuša gore ke eme moo ke bego ke eme gona. 19 Ke moka a re: “Ke go tsebiša seo se tlago go direga karolong ya mafelelo ya ge Modimo a galefile, ka gobane se tla direga nakong yeo e beilwego ya bofelo.

20 “Nku e tona ya manaka a mabedi yeo o e bonego e emela dikgoši tša Media le Peresia. 21 Phooko ya maboya e emela kgoši ya Gerika, gomme lenaka le legolo leo le bego le le magareng ga mahlo a yona, le emela kgoši ya pele. 22 Lenaka leo le ilego la robega, moo legatong la lona go ilego gwa mela manaka a mane, le emela mebušo e mene yeo e tšwago setšhabeng sa kgoši yeo, eupša mebušo yeo e ka se be e matla go swana le mmušo wa kgoši yeo.

23 “Karolong ya mafelelo ya ge dikgoši tšeo di buša, ge batho ba dira dilo tše mpe le go feta, go tla tšwelela kgoši e mpe yeo e nago le bokgoni bja go goketša le yeo e kwešišago dipolelo tše di gakantšhago. 24 E tla ba matla kudu, eupša e se ka matla a yona. E tla senya ka tsela e tšhošago gomme e tla atlega le go dira seo e se ratago. E tla fediša batho ba matla le batho bao ba dirilwego gore e be ba bakgethwa. 25 Le gona, e tlo atlega ge e fora batho ba bantšhi ka mahlajana a yona gomme ya ikgantšha ka pelong. Nakong ya ge batho ba sa iketlile e tla fediša ba bantšhi. E tla lwa le Moetapele yo a fetago baetapele ba bangwe e bile e tla fedišwa eupša e sa fedišwe ke batho.*

26 “Dilo tšeo di boletšwego ponong mabapi le mantšiboa le mesong, ke nnete. Eupša dilo tšeo o di bonego ponong ye e be sephiri ka gobane e bolela ka dilo tšeo di tlago go direga nakong e tlago.”*

27 Nna Daniele ke ile ka ikwa ke lapile kudu ka ba ka fetša matšatši ke lwala. Ka morago ka tsoga gomme ka tšwela pele ka mošomo woo ke bego ke o direla kgoši. Eupša ke be ke tlabilwe ke dilo tšeo ke di bonego e bile go be go se na motho yoo a ka di kwešišago.