Lefitiko

18 Jehofa a tšwela pele a bolela le Moshe a re: 2 “Botša Baisiraele o re: ‘Ke nna Jehofa Modimo wa lena. 3 Le se ke la phela go swana le batho ba naga ya Egepeta yeo le bego le dula go yona. Le gona le se ke la dira dilo go swana le batho ba naga ya Kanana yeo ke le išago go yona. Le se ke la itshwara go swana le bona. 4 Le phele ka melao ya ka gomme le latele ditaelo tša ka. Ke nna Jehofa Modimo wa lena. 5 Le phele ka melao ya ka e bile le latele ditaelo tša ka, tšeo ge e ba motho a di latela a tlago go tšwela pele a phela. Ke nna Jehofa Modimo wa lena.

6 “‘Go se ke gwa ba le motho yo a robalago le motho le ge e le ofe wa gabo. Ke nna Jehofa Modimo wa lena. 7 O se ke wa robala le tatago, e bile o se ke wa robala le mmago, ka gobane ke mmago.

8 “‘O se ke wa robala le mosadi wa tatago, ka gobane se se tla dira gore tatago a nyatšege.

9 “‘O se ke wa robala le sesi wa gago, goba moratho wa gago wa ngwanenyana, e ka ba e le morwedi wa tatago goba wa mmago, go sa šetšwe gore o belegetšwe ka lapeng letee le wena goba o belegetšwe ka lapeng le lengwe.

10 “‘O se ke wa robala le morwedi wa morwa wa gago goba morwedi wa morwedi wa gago, ka gobane se se tlo dira gore o nyatšege.

11 “‘O se ke wa robala le morwedi wa mosadi wa tatago, e lego ngwana wa tatago, ka gobane ke wa geno.

12 “‘O se ke wa robala le rakgadi wa gago, ka gobane ke wa gabo tatago.

13 “‘O se ke wa robala le mmamogolo wa gago goba mmane wa gago, ka gobane ke ba gabo mmago.

14 “‘O se ke wa robala le mosadi wa ramogolo wa gago goba wa rangwane wa gago, ka gobane o tlo dira gore ramogolo wa gago goba rangwane wa gago a nyatšege. Basadi bao go no swana le ge e le ba geno.

15 “‘O se ke wa robala le ngwetši ya gago, ka gobane ke mosadi wa morwa wa gago.

16 “‘O se ke wa robala le mosadi wa buti wa gago goba wa moratho wa gago wa mošemane, ka gobane o tlo dira gore ba nyatšege.

17 “‘O se ke wa robala le mosadi le morwedi wa gagwe, goba morwedi wa morwa wa gagwe le morwedi wa morwedi wa gagwe, ka gobane ke ba gabo mosadi yoo. Bjoo ke boitshwaro bjo bo šišimišago.

18 “‘O se ke wa re mola o nyetše mosadi wa nyala le ngwanabo, gomme wa robala le yena mola mosadi wa gago a sa phela.

19 “‘O se ke wa robala le mosadi nakong ya ge a se a hlweka ka ge a bona kgwedi.

20 “‘O se ke wa robala le mosadi wa monna yo mongwe, ka gobane o tlo itšhilafatša.

21 “‘O se ke wa dumelela bana ba gago ba neelwa* modimo yo a bitšwago Mmoleke.* O se ke wa goboša leina la ka nna Modimo wa gago ka go dira seo. Ke nna Jehofa.

22 “‘O se ke wa robala le monna ka tsela yeo o robalago le mosadi ka yona. Ke selo se se šišimišago.

23 “‘Monna ga se a swanela go robala le phoofolo gomme ya mo šilafatša. Mosadi le yena ga se a swanela go robala le phoofolo. Seo ke go tshela molao wa tlhago.

24 “‘Le se ke la itšhilafatša ka mekgwa yeo, ka gobane ditšhaba tšeo ke tlago go di raka di itšhilafaditše ka mekgwa yeo. 25 Ke ka baka leo naga ya bona e sego ya hlweka. Ke tla otla badudi ba naga yeo ka baka la melato ya bona, gomme ke tla ba raka moo nageng ya bona. 26 Eupša lena le phele ka melao ya ka e bile le latele ditaelo tša ka. Le gona le se ke la dira le setee sa dilo tše tšeo di šišimišago, go sa šetšwe gore le Baisiraele goba le dula nageng ye le se Baisiraele. 27 Ka gobane batho bao ba bego ba dula nageng ye pele ga ge le ka fihla, ba be ba dira dilo tše ka moka tšeo di šišimišago, gomme gona bjale naga ye e šilafetše. 28 Ge le ka se dire dilo tše, nka se le rake mo nageng go swana le ge ke ile ka raka ditšhaba tšeo di bego di dula moo pele ga ge le ka fihla. 29 Ge e ba go ka ba le motho yo a dirago dilo tše tšeo di šišimišago, gona motho yoo a bolawe. 30 Le se ke la dira dilo tšeo di šišimišago tšeo di bego di dirwa pele le ka fihla mo, bjalo ka ge le boletše gore le ka se di dire, e le gore le se ke la itšhilafatša ka tšona. Ke nna Jehofa Modimo wa lena.’”