Ebangedi ya Mateo
3 Mehleng yeo, Johane+ Mokolobetši a tla lešokeng la Judea gomme a bolela molaetša woo o tšwago go Modimo,+ 2 a re: “Itsholeng, ka gobane Mmušo wa magodimo o batametše.”+ 3 Ge e le gabotse, yo ke yena yoo Modimo a boletšego ka yena a diriša moporofeta Jesaya+ ge a be a re: “Go na le motho yo a goeletšago a le lešokeng. O re: ‘Lokišang tsela ya Jehofa!* Le dire gore ditsela tša gagwe di lekalekane.’”+ 4 Bjale Johane o be a apara diaparo tšeo di dirilwego ka boya bja kamela ebile a tlema letheka la gagwe ka lepanta leo le dirilwego ka mokgopa.+ Dijo tša gagwe e be e le ditšie le todi ya dinose tša naga.+ 5 Ke moka badudi ba Jerusalema le batho ka moka bao ba bego ba dula Judea le dinageng ka moka tšeo di lego kgauswi le Noka ya Jorodane ba be ba eya go yena,+ 6 gomme a ba kolobetša* Nokeng ya Jorodane.+ Ba be ba ipobola dibe tša bona pele ga batho.
7 Ge a bona Bafarasei le Basadutsei+ ba bantši ba etla lefelong leo batho ba bego ba kolobetšwa go lona, o ile a re go bona: “Lena bana ba marabe,*+ ke mang yo a le lemošitšego gore le tšhabele bogale bja Modimo bjo bo tlago?+ 8 Ka gona, thomang pele ka go dira mediro yeo e* bontšhago gore le a itshola. 9 Le se ke la ipotša gore: ‘Tatago rena ke Aborahama.’+ Ka gobane ke le botša gore Modimo a ka kgona go direla Aborahama bana ka maswika a. 10 Selepe se kgauswi le go rema mehlare go tloga medung. Ka gona mohlare o mongwe le o mongwe woo o sa enywego dienywa tše dibotse o tla rengwa gomme wa lahlelwa mollong.+ 11 Nna ke le kolobetša ka meetse ka baka la ge le itshola,+ eupša yo a tlago ka morago ga ka o mpheta ka maatla, ebile ga ke swanelege le go mo rola dieta.*+ Yena o tla le kolobetša ka moya o mokgethwa+ le ka mollo.+ 12 Foroko yeo a ološago ka yona e ka seatleng sa gagwe. O tla hlwekiša seboa* sa gagwe ka mo go feletšego, a ba a kgobokeletša korong ya gagwe lefelong leo go bewago dilo go lona,* eupša o tla fiša mooko mollong+ woo o ka se kego wa tingwa.”
13 Ke moka Jesu a tla go Johane Nokeng ya Jorodane a etšwa Galelia, e le gore Johane a tle a mo kolobetše.+ 14 Eupša Johane a leka go mo thibela, a re: “Ke nna ke swanetšego go kolobetšwa ke wena, bjale na wena o tla go nna?” 15 Jesu a re go yena: “A go be bjalo mo nakong ye, ka gobane ka go dira bjalo re phetha dilo ka moka tšeo Modimo a di rulagantšego.” Ke moka Johane a se sa mo thibela. 16 Ka morago ga gore Jesu a kolobetšwe, o ile a emelela ka meetseng gateetee. Ke moka magodimo a bulega+ gomme a bona moya wa Modimo o theoga o le bjalo ka leeba o etla godimo ga gagwe.+ 17 Le gona go ile gwa kwagala lentšu leo le tšwago magodimong+ le re: “Yo ke Morwa wa ka+ yo ke mo ratago ebile ke a mo amogela.”+