Ditiro tša Baapostola

16 Paulo o ile a ya Derebe, ge a tloga moo a fetela Lisitara.+ Gona moo go be go na le morutiwa yo a bitšwago Timotheo.+ Mmagwe e be e le Mojuda ebile e le morutiwa, eupša papagwe yena e be e le Mogerika. 2 Barutiwa ba Lisitara le Ikonia ba ile ba bolela Timotheo gabotse. 3 Paulo o be a nyaka go sepela le Timotheo, ka gona o ile a mo tšea a mmolotša ka gobane Bajuda ka moka bao ba bego ba dula mafelong ao,+ ba be ba tseba gore papagwe e be e le Mogerika. 4 Bjale ge ba dutše ba sepela metseng yeo, ba be ba tšama ba botša banababo rena ditaelo tšeo di tšwago go baapostola le bagolo kua Jerusalema gore ba di latele.+ 5 Ka gona diphuthego di ile tša tšwela pele di tia tumelong ebile di oketšega ka palo letšatši le letšatši.

6 Le gona ba ile ba tsena Firigia le nageng ya Galatia+ gomme ba feta ka gobane moya o mokgethwa o ile wa se ba dumelele go bolela lentšu la Modimo profenseng ya Asia. 7 Ge ba fihla Misia ba ile ba leka go ya Bithinia,+ eupša Jesu o ile a ba thibela a šomiša moya o mokgethwa. 8 Ka gona ba ile ba feta Misia gomme ba theogela Teroa. 9 Paulo o ile a bona pono bošego. Ponong yeo o ile a bona monna yo mongwe wa Matsedonia a eme pele ga gagwe a mo kgopela a re: “Tshelela Matsedonia o tle o re thuše.” 10 Ka morago ga gore a bone pono yeo, re ile ra leka go ya Matsedonia ka gobane re be re nagana gore Modimo o nyaka gore re yo bolela ditaba tše dibotse moo.

11 Ka gona re ile ra tloga Teroa ka sekepe ra ya Samotratse. Ga go na mo re ilego ra ema gona. Ke moka letšatšing le le latelago ra ya Neapoli, 12 gomme go tloga moo ra ya Filipi.+ Filipi e be e le motse wa Roma wo o bego o tumile kudu seleteng sa Matsedonia. Re ile ra fetša matšatši a sego kae re dula moo. 13 Ka letšatši la Sabatha re ile ra tšwela ka ntle ga motse ra ya kgauswi le noka, moo re bego re nagana gore go na le lefelo leo batho ba rapelago go lona. Re ile ra dula fase gomme ra thoma go boledišana le basadi bao ba bego ba kgobokane moo. 14 Gona moo go be go na le mosadi yo a tšwago motseng wa Thiathira+ yo a bego a bitšwa Lidia. O be a rekiša diaparo tše diphepolo.* Mosadi yo o be a boifa Modimo. Bjale ge a dutše a theeditše, Jehofa* o ile a mo thuša gore a amogele dilo tšeo Paulo a bego a di bolela. 15 Bjale ka morago ga gore yena le ba lapa la gagwe ba kolobetšwe,+ o ile a re kgopela a re: “Ge e ba le bona gore ke botegela Jehofa, gona etlang le duleng ntlong ya ka.” Tsela yeo a ilego a re phegelela ka yona e ile ya dira gore re sepele le yena.

16 Ya re ka letšatši le lengwe ge re be re eya lefelong leo batho ba bego ba rapela go lona, ra kopana le ngwanenyana yo mongwe yoo a bego a na le letemona leo le bego le dira gore a kgone go bolela dilo tšeo di tlago go direga nakong e tlago.+ Ngwanenyana yoo o be a direla batho bao a bego a ba šomela tšhelete e ntši ka go bolela dilo tšeo di tlago go direga nakong e tlago. 17 Ngwanenyana yoo o ile a dulela go re šala morago a goeletša a re: “Banna ba ke bahlanka ba Modimo yo Godimodimo,+ ebile ba tlile mo go le botša gore le dire eng gore le phološwe.” 18 O ile a fetša matšatši a mantši a dira bjalo. Mafelelong Paulo o ile a tenega, ke moka a retologa a botša letemona leo a re: “Ke go laela ka leina la Jesu Kriste ke re etšwa go motho yo.” Ka yona nako yeo letemona leo le ile la tšwa.+

19 Bjale ge batho bao ngwanenyana yo a bego a ba šomela ba bona gore ba ka se sa kgona go dira tšhelete ka yena,+ ba ile ba swara Paulo le Silase ba ba gogela go babuši kgorong.*+ 20 Ba ile ba ba iša go bomaseterata ke moka ba re: “Banna ba ba Bajuda ba baka mmudubudu mo motseng.+ 21 Ba ruta batho dilo tšeo re sa dumelelwago go di dira ka ge re le Baroma.” 22 Ka gona lešaba le ile la ba galefela kudu. Bomaseterata ba ile ba ba kgeilela diaparo ke moka ba laela gore ba bethwe ka dikgati.+ 23 Ka morago ga gore ba ba bethe kudu ba ile ba ba iša kgolegong, gomme ba laela motho yo a letago kgolego gore a ba hlokomele gore ba se ke ba tšhaba.+ 24 Ka ge a be a laetšwe bjalo, o ile a ba iša karolong ya ka garegare ya kgolego gomme a ba bofa dinao.*

25 Eupša mo e ka bago gare ga mpa ya bošego Paulo le Silase ba be ba rapela, ebile ba opela ba tumiša Modimo.+ Bagolegwa ba bangwe bona ba be ba ba theeditše. 26 Ka yona nako yeo go ile gwa ba le tšhišinyego e kgolo ya lefase, ya šišinya moago wa kgolego. Le gona, gateetee mejako ka moka ya kgolego e ile ya bulega, gomme diketane ka moka tšeo ba bego ba bofile batho ka tšona di ile tša bofologa.+ 27 Ge motho yo a letago kgolego a tsoga o ile a hwetša mabati a kgolego a bulegile. O ile a ntšha sabola ya gagwe a re o a ipolaya, a nagana gore batho bao ba golegilwego ba tšhabile.+ 28 Eupša Paulo o ile a goeletša a re: “O se ke wa ikgobatša, ka gobane ka moka ga rena re sa le gona!” 29 Ka gona moleti wa kgolego o ile a kgopela motho yo mongwe gore a tliše mabone. A kitimela go Paulo le Silase a thothomela, gomme a khunama pele ga bona. 30 Ke moka a ba ntšhetša ka ntle a re: “Ke swanetše go dirang gore ke phološwe?” 31 Bona ba re go yena: “Dumela go Morena Jesu gomme wena le ba lapa la gago le tla phološwa.”+ 32 Ke moka ba ruta yena le ba lapa la gagwe ka Jehofa. 33 O ile a sepela le bona bošegong bjona bjoo a ya a ba hlapiša dintho. Ke moka yena le ba lapa la gagwe ka moka ba ile ba kolobetšwa ka ntle le go dikadika.+ 34 O ile a ba tliša ka ntlong ya gagwe a ba tekela tafola. O be a thabile kudu ka ge bjale a be a šetše a dumetše go Modimo, gomme ba lapa la gagwe le bona ba ile ba thaba kudu.

35 Ge e eba mosegare, bomaseterata ba ile ba roma maphodisa gore a botše motho yo a letago kgolego gore a lokolle banna bao. 36 Motho yo a letago kgolego o ile a botša Paulo gore bomaseterata ba ntšhitše taelo ya gore le lokollwe. Bjale etšwang le sepeleng gabotse. 37 Eupša Paulo a re go bona: “Le ge re le Baroma,+ ba re bethile pele ga batho re se ra bonwa molato, ebile ba re iša kgolegong. Bjale goreng ba nyaka go re lokolla ka sephiring? Yeo yona e ka se kgonege. Bona ka bobona ba swanetše go tla mo ba tle ba re lokolle.” 38 Ka gona maphodisa a ile a botša bomaseterata ditaba tšeo. Bona ba ile ba tšhoga kudu ge ba ekwa gore banna bao ke Baroma.+ 39 Bomaseterata ba ile ba tla ba ba kgopela tshwarelo, ke moka ba ba ntšha ka kgolegong ba ba kgopela gore ba tloge mo motseng. 40 Ge ba tšwile kgolegong ba ile ba ya ga Lidia. Ge ba bona banababo bona moo ba ile ba ba kgothatša kudu+ ke moka ba sepela.