Ditiro tša Baapostola

25 Ge Fesito+ a fihlile profenseng ya Kesarea gomme a thomile go buša, o ile a ya Jerusalema ka morago ga matšatši a mararo. 2 Baperisita ba bagolo le banna ba maemo ba Bajuda ba ile ba mmotša molato wo ba latofatšago Paulo ka wona.+ Ba kgopela Fesito 3 gore a romele Paulo Jerusalema. Eupša ba be ba ikemišeditše go lalela Paulo tseleng gore ba mmolaye.+ 4 Fesito o ile a re ba tlogele Paulo a golegilwe Kesarea, ka gore le yena o be a tlo boela moo e se kgale. 5 A tšwela pele a re: “Bolelang le baetapele ba lena gore ba boele morago le nna gore ba kgone go latofatša Paulo ge e ba go na le seo a se dirilego.”+

6 Bjale ge a feditše matšatši a e ka bago a seswai goba a lesome a na le bona, o ile a boela Kesarea. Letšatšing le le latelago o ile a dula setulong sa kahlolo gomme a laela gore Paulo a tlišwe. 7 Ge Paulo a fihla, Bajuda bao ba tšwago Jerusalema ba mo dikologa, ba mo latofatša ka melato e mentši e megolo yeo ba bego ba se na bohlatse bja yona.+

8 Paulo o ile a itwela a re: “Ga se ka tshela Molao wa Bajuda, wa tempele goba wa Kesara.”+ 9 Ka ge Fesito a be a nyaka go kgahliša Bajuda,+ o ile a botšiša Paulo a re: “Na o nyaka go ya Jerusalema gore o ahlolwe pele ga ka mabapi le dilo tše?” 10 Paulo a re: “Ke eme pele ga setulo sa kahlolo sa Kesara, e lego moo ke swanetšego go ahlolelwa gona. Le wena o a bona gore ga go na phošo yeo ke e diretšego Bajuda. 11 Ge e ba ka nnete ke na le molato gomme ke swanelwa ke go bolawa,+ nka se gane go bolawa. Eupša ge e ba dilo tšeo ba ntatofatšago ka tšona e le maaka, ga go na motho yo a nago le tshwanelo ya go mpea ka diatleng tša bona e le go ba kgahliša. Nna ke re molato wo a o išwe go Kesara!”+ 12 Ka morago ga gore Fesito a bolele le baeletši ba gagwe o ile a re: “Ka ge o rile o nyaka go sekišwa ke Kesara, gona o tla ya go Kesara.”

13 Ka morago ga ge go fetile matšatši a sego kae, kgoši Agaripa le Berenike ba ile ba ya Kesarea go yo etela Fesito. 14 Ka morago ga gore ba fetše matšatši a mmalwa ba le moo, Fesito o ile a botša kgoši ka molato wa Paulo. A re:

“Go na le monna yo mongwe yoo Felikisi a sa lego a mo tlogela a golegilwe. 15 Ge ke be ke le Jerusalema baperisita ba bagolo le bagolo ba Bajuda ba ile ba mo latofatša,+ ba kgopela gore a bonwe molato. 16 Eupša ke ile ka ba botša gore go ya ka molao wa Baroma, motho ga se a swanela go neelwa diatleng tša bao ba mo latofatšago pele a sekišwa pele ga bona, e le gore a kgone go itwela.+ 17 Ge ba fihla moo ke ile ka se senye nako, letšatšing le le latelago ke ile ka dula setulong sa kahlolo gomme ka laela gore monna yoo a tlišwe. 18  Batho bao ba bego ba mo latofatša ba ile ba ema ba mo latofatša, eupša ga se ba ka ba mo latofatša ka selo le ge e le sefe se sebe seo ke bego ke nagana gore ba tlo mo latofatša ka sona.+ 19 Ba be ba no ngangišana ka bodumedi bja bona,+ le ka monna yo mongwe yo ba bego ba re o hlokofetše yo ba rego ke Jesu yoo Paulo a bego a duletše gore o a phela.+ 20 Ka ge ke be ke sa tsebe gore nka ahlola bjang molato wa gagwe, ke ile ka mmotšiša ge e ba a ka rata go ya Jerusalema gore a ahlolelwe moo.+ 21 Eupša Paulo o ile a kgopela gore molato wa gagwe o ahlolwe ke Mohlomphegi Kesara,+ ka gona ke ile ka laela gore a dule a golegilwe go fihlela ke mo romela go Kesara.”

22 Agaripa a re go Fesito: “Le nna nka thabela go theetša motho yo.”+ Fesito a re: “O tla mo kwa gosasa.” 23 Letšatšing le le latelago, Agaripa le Berenike ba ile ba tla ba kukile magetla ba tsena ka holong ba na le baetapele ba mašole le banna ba maemo a godimo ba mo motseng. Ke moka Fesito o ile a laela gore Paulo a tlišwe. 24 Fesito a re: “Kgoši Agaripa le lena batho ka moka bao le lego mo, le a mmona motho yo, ke yena yoo Bajuda ka moka Jerusalema le gona mo, ba ilego ba kgopela gore a bolawe.+ 25 Eupša ke lemogile gore ga se a dira molato wo o ka dirago gore a bolawe.+ Ka gona, ge a be a kgopela gore molato wa gagwe o išwe go Mohlomphegi Kesara, ke ile ka re molato wa gagwe o išwe moo. 26 Eupša ga go na seo nka se ngwalelago mong wa ka mabapi le motho yo. Ke ka baka leo ke mo tlišitše pele ga lena ka moka le go wena Kgoši Agaripa gore o mo sekiše. Mohlomongwe ka morago ga gore o mo sekiše, ke tla ba le seo nka se ngwalelago mong wa ka. 27 Ka gobane ke bona go sa kwagale gore ke romele motho yo a golegilwego Roma, eupša ke sa bolele gore o latofatšwa ka eng.”