Ditiro tša Baapostola
4 Ge Petro le Johane ba sa bolela le setšhaba, baperisita ba ile ba tla go bona gotee le motho yo a hlokomelago tempele le Basadutsei.+ 2 Ba be ba tennwe ke ge baapostola bao ba ruta batho ebile ba bolela phatlalatša gore Jesu o tsošitšwe bahung.+ 3 Ba ile ba ba swara ba ba tsenya kgolegong+ go fihlela letšatšing le le latelago, ka gobane e be e šetše e le mantšiboa. 4 Eupša batho ba bantši bao ba bego ba theeditše polelo yeo ba ile ba fetoga barutiwa, gomme palo ya banna bao e ilego ya ba barutiwa e ile ya ba mo e ka bago 5 000.+
5 Letšatšing le le latelago, babuši ba bona, banna ba bagolo le ditsebi tša molao* ba ile ba kgobokana Jerusalema, 6 gomme moperisita yo mogolo Annase,+ Kayafa,+ Johane, Alekesandere le batho ka moka bao e bego e le ba leloko la moperisita yo mogolo, le bona ba be ba le moo. 7 Ba emiša Petro le Johane gare ga bona, gomme ba ba botšiša ba re: “Ke mang a le filego maatla a go dira dilo tše, le gona le di dira ka leina la mang?” 8 Ke moka Petro a bolela le bona a tletše moya o mokgethwa,+ a re:
“Lena babuši le banna ba bagolo bao ba hlomphegago, 9 na le nyaka go tseba ka selo se sebotse seo re se diretšego monna yo a bego a golofetše,+ le gore go tlile bjang gore a fole? 10 Gona lena le Baisiraele ka moka tsebang gore monna yo a emego mo pele ga lena o fodišitšwe ka leina la Jesu Kriste wa Monatsaretha+ yo le mo kokotetšego koteng,+ eupša Modimo a mo tsoša bahung.+ 11 Jesu yo ke ‘leswika leo lena baagi le le gannego tše ekego ga se selo leo le fetogilego leswika le bohlokwa leo le lego khoneng ya moago.’+ 12 Le gona, ga go na yo a ka re phološago ka ntle le yena, ka gobane ga go na leina le lengwe+ ka tlase ga legodimo leo Modimo a le filego batho gore ba phološwe.”+
13 Bjale ge ba bona Petro le Johane ba bolela ka sebete gomme ba lemoga gore ba be ba se ba rutega ebile e no ba batho feela,+ ba ile ba makala. Ke moka ba thoma go lemoga gore banna ba ba kile ba phela le Jesu.+ 14 Ge ba lebeletše monna yo a bego a fodišitšwe a eme le bona,+ ba ile ba hloka molomo.+ 15 Ba ile ba laela banna bao ba bararo gore ba tšwele ka ntle ga holo ya Sanhedrine* gomme ba šala ba boledišana, 16 ba re: “Re direng ka banna ba?+ Selo seo banna ba ba se dirilego ke mohlolo, gomme batho ka moka ba Jerusalema ba o bone,+ bjale re tla o ganetša bjang? 17 A re ba tšhošetšeng, re ba botše gore ba se sa hlwa ba bolela ka leina le le go botša ba bangwe ka lona, e le gore taba ye e se ke ya phatlalala go feta mo.”+
18 Ke moka ba ba bitša ba ba laela gore ba se sa hlwa ba ruta goba ba bolela ka leina la Jesu. 19 Eupša Petro le Johane ba ba araba ba re go bona: “Lena ikahloleleng ge e ba le bona go lokile mahlong a Modimo go kwa lena go e na le go kwa Modimo. 20 Rena re ka se tlogele go bolela ka dilo tšeo re di bonego le tšeo re di kwelego.”+ 21 Bjale ge ba ba tšhošeditše gape, ba ile ba ba lokolla ka gobane ba be ba se na mabaka a go ba otla ebile ba be ba tšhaba batho,+ ka gobane batho ka moka ba be ba tumiša Modimo ka baka la seo se diragetšego. 22 Monna yo a fodišitšwego ka mohlolo o be a na le mengwaga e fetago e 40.
23 Ka morago ga gore ba lokollwe ba ile ba ya go barutiwa ba bangwe gomme ba ba botša dilo tšeo baperisita ba bagolo le banna ba bagolo ba ba boditšego tšona. 24 Ge ba ekwa ditaba tše, ba rapela Modimo ba le ka moka ba re:
“Mmuši Morena, ke wena yo a dirilego legodimo, lefase, lewatle le dilo ka moka tšeo di lego go tšona,+ 25 ebile ke wena o boletšego o diriša moya o mokgethwa le Dafida rakgolokhukhu wa rena,+ yena mohlanka wa gago wa re: ‘Ke ka baka lang ditšhaba di baka tlhakatlhakano gomme merafo e naganišiša ka dilo tša go se re selo? 26 Dikgoši tša lefase di itokišeleditše go lwa gomme babuši ba ipopile ngatana e tee gore ba lwe le Jehofa* le motlotšwa wa gagwe.’+ 27 Heroda, Pontio Pilato+ le batho ba ditšhaba gotee le Baisiraele ba ile ba kgobokana motseng wo gore ba lwe le mohlanka wa gago yo mokgethwa, yena Jesu yo o mo tloditšego.+ 28 Ba ile ba bokana gotee gore ba dire seo o se boletšego e sa le pele. Dilo tše di diregile ka baka la ge o na le maatla* le ka baka la ge o be o nyaka gore di direge.+ 29 Jehofa, theetša dilo tšeo ba re tšhošetšago ka tšona gomme o dumelele rena bahlanka ba gago gore re tšwele pele re bolela lentšu la gago ka sebete, 30 ge o dutše o otlolla letsogo la gago gore o fodiše malwetši, ebile go direga mehlolo le dilo tše di makatšago+ ka leina la mohlanka wa gago yo mokgethwa Jesu.”+
31 Ka morago ga gore ba rapele go tšwa pelong, lefelo leo ba bego ba bokane go lona le ile la šikinyega, gomme ka moka ga bona ba tlala moya o mokgethwa+ ba bolela lentšu la Modimo ka sebete.+
32 Le gona go be go na le barutiwa ba bantši gomme ka moka ga bona e be e le ngatana e tee.* Ba be ba abelana dilo, go se na yo a bolelago gore dilo tšeo a nago le tšona ke tša gagwe a nnoši.+ 33 Baapostola ba ile ba tšwela pele ba hlatsela ka tsela e maatla gore Morena Jesu+ o tsošitšwe bahung, ebile Modimo o ile a ba bontšha botho bja gagwe bjo bogolo. 34 Ge e le gabotse, go be go se na motho yo a hlokago selo gare ga bona,+ ka gobane batho ka moka bao ba bego ba na le mašemo goba dintlo ba be ba di rekiša gomme ba tliša tšhelete yeo, 35 ba e nea baapostola.+ Ke moka baapostola ba be ba abela barutiwa tšhelete yeo go ya le ka dilo tšeo ba di hlokago.+ 36 Ka gona, Josefa yoo baapostola ba bego ba mmitša Baranaba+ (yeo e bolelago gore “Morwa wa Khomotšo”), yo e bego e le Molefi yo a tswaletšwego Tsipero, 37 o be a na le tšhemo gomme o ile a e rekiša a tliša tšhelete yeo a e nea baapostola.+