Lengwalo le le Yago go Baefeso

2 Le gona ka baka la dibe tša lena go be go le bjalo ka ge eka le hwile, eupša Modimo a le phediša. 2 Dibe tšeo le be le di dira ka ge le be le phela go swana le batho ba lefase le, go ya ka mmuši yo a laolago moya woo ga bjale o šomago go bana ba go se kwe. 3 Ka moka ga rena re be re phela go swana le bona re laolwa ke dikganyogo tša rena, re be re dira dilo tšeo di kganyogwago ke mebele ya rena le dikgopolo tša rena, le gona re belegwe re swanelwa ke kgalefo ya Modimo go swana le ba bangwe ka moka. 4 Eupša ka ge Modimo a na le kgaugelo e kgolo e bile a re rata kudu, 5 o dirile gore re phele gotee le Kriste, le ge go be go le bjalo ka ge eka re hwile ka baka la dibe tša rena. Ge e le gabotse le phološitšwe ka baka la botho bja gagwe bjo bogolo. 6 Le gona, o dirile gore re phele gotee le Kriste Jesu gomme a re dudiša gotee le yena legodimong, 7 gore nakong e tlago* a re bontšhe botho bja gagwe bjo bogolo ka ge re le balatedi ba Kriste Jesu.

8 Ka ge le na le tumelo go Modimo, o ile a le phološa ka botho bja gagwe bjo bogolo. Ga se gore phološo yeo e be e le swanela, eupša Modimo o le file yona e le mpho. 9 Ga se la phološwa ka baka la mediro ya lena gore go se ke gwa ba le motho yo a ikgantšhago. 10 Re bopilwe ke Modimo, le gona ka ge re le barutiwa ba Kriste Jesu re bopetšwe go dira mediro e mebotse yeo Modimo a rerilego e sa le pele gore re e dire.

11 Ka gona gopolang gore lena bao le sego Bajuda le bitšwa bao ba sa bollago ke bao ba boloditšwego ke batho. 12 Ka nako yeo le be le sa tsebe Kriste, go be go se na selo seo se le kopanyago le mmušo wa Isiraele. Ka ge le se Bajuda le be le se karolo ya dikgwerano tša dilo tšeo Modimo a bego a di tshepišitše Bajuda, ka go re’alo le be le phela lefaseng le se na kholofelo e bile le sa tsebe Modimo. 13 Eupša lena bao le bego le sa tsebe Modimo, gona bjale le barutiwa ba Kriste Jesu e bile le tseba Modimo ka baka la madi a Kriste. 14 Ka gobane Kriste o re file khutšo le go kopanya dihlopha tše pedi ka go thuba leboto leo le bego le di arogantše. 15 O ile a diriša mmele wa gagwe e le sehlabelo gore a fediše Molao wa Moshe woo o bego o dira gore dihlopha tše tše pedi e be manaba. Se se ile sa dira gore dihlopha tše e be barutiwa ba gagwe bao ba kwanago le bao ba nago le khutšo. 16 Le gona o ile a dira gore dihlopha tše di be le segwera se sebotse le Modimo ka go bolaelwa koteng ya tlhokofatšo* gomme lehu la gagwe le ile la dira gore dihlopha tše e se sa ba manaba. 17 O tlile a bolela ditaba tše dibotse tša khutšo go lena bao le bego le sa tsebe Modimo le go bao ba bego ba mo tseba, 18 ka gobane ka sehlabelo sa gagwe rena bao re lego dihlopheng tše tše pedi, re kgona go batamela go Tate go se na seo se re šitišago ka ge ka moka ga rena re na le moya o mokgethwa.

19 Ka gona, ga le sa le batho bao ba tšwago nageng e nngwe, eupša le agile nageng e tee le bakgethwa gomme le karolo ya lapa la Modimo. 20 Le agilwe bjalo ka ntlo godimo ga baapostola le baporofeta, mola Kriste Jesu yena e le leswika le bohlokwa kudu la motheo.* 21 Ntlo yeo le dikarolo tša yona ka moka e kopantšwe gotee gomme ya gola ya ba tempele e kgethwa ya Jehofa. 22 Ka ge le le boteeng le Kriste, Modimo o dirile gore lena le ba bangwe le be ntlo yeo a dulago go yona, ka gobane moya wa gagwe o dula moo.