Doiteronomio

18 “Baperisita le Balefi ba bangwe, e lego moloko ka moka wa Lefi, ba ka se hwetše karolo goba bohwa, go swana le Baisiraele ba bangwe. Ba tla ja dibego tša go fišwa tšeo di direlwago Jehofa, e lego bjona bohwa bja gagwe. 2 Ba moloko wa Lefi, ba se ke ba newa bohwa go swana le meloko e mengwe, ka gobane Jehofa ke yena a tlago go ba hlokomela,* feela bjalo ka ge a ile a ba botša.

3 “Bjale setšhaba se swanetše go dula se nea baperisita dilo tše: Motho yo mongwe le yo mongwe yo a dirago sehlabelo, e ka ba ka kgomo goba ka nku, a nee moperisita legetla, mehlagare le mogodu. 4 A mo nee mabele ao a a bunnego pele, beine ya gagwe e mpsha, makhura a gagwe, le boya bja pele bjo a bo kotilego go dinku tša gagwe goba dipudi. 5 Jehofa Modimo wa lena o kgethile Balefi le barwa ba bona melokong ya lena ka moka, e le gore ba dule ba emela* yena Jehofa.

6 “Eupša ge e ba Molefi a ka tloga go o mongwe wa metse ya Isiraele moo a bego a dula gona, gomme a nyaka go ya lefelong leo Jehofa a tlago go le kgetha, 7 a hlankele Jehofa Modimo wa gagwe leineng la gagwe a le moo, go no swana le banababo ka moka e lego Balefi, bao ba hlankelago lefelong leo pele ga Jehofa. 8 A hwetše karolo yeo e lekanago le ya bona ya dijo, ntle le tšeo a tlago go di hwetša ge a rekiša dithoto tša lapa la gabo.

9 “Ge o fihla nageng yeo Jehofa Modimo wa gago a go neago yona, o se ke wa leka go ekiša mekgwa yeo e šišimišago ya ditšhaba tša moo. 10 Mo nageng ya lena, go se ke gwa ba le motho yo a dirago sehlabelo ka morwa wa gagwe goba morwedi wa gagwe mollong.* Go se be le motho yo a loyago, yo a dirago maleatlana, goba yo a dirišago dipheko. 11 E bile go se be le motho yo a fošago batho ba bangwe ka meleko, goba yo a phasago badimo, goba yo a rego o bolela dilo tšeo di tlago go direga nakong e tlago, goba motho le ge e le ofe yo a lekago go boledišana le bahu. 12 Ka gobane motho le ge e le ofe yo a dirago dilo tše o šišimiša Jehofa. Ke ka baka leo Jehofa Modimo wa lena a rakago ditšhaba tše nageng yeo le yago go yona, ka gobane di dira dilo tše tšeo di šišimišago. 13 Le be bao ba hlwekilego ka mo go feletšego pele ga Jehofa Modimo wa lena.

14 “Ka gobane ditšhaba tše, tšeo o yago go di amoga naga, di be di theetša batho bao ba dirago maleatlana le baloi. Eupša ge e le wena, Jehofa Modimo wa gago ga se a ka a go dumelela gore o dire selo le ge e le sefe seo se swanago le se. 15 Jehofa Modimo wa lena o tla le kgethela moporofeta yo a swanago le nna mo setšhabeng sa gabo lena, gomme le mo theetšeng. 16 Ye ke karabo ya seo le ilego la se botšiša Jehofa Modimo wa lena nakong ya ge le be le kgobokane kua Thabeng ya Horebe ge le be le re: ‘Re tšhaba gore ge re ka tšwela pele re ekwa lentšu la Jehofa Modimo wa rena, le go bona mollo wo o mogolo gape, re tlo hwa.’ 17 Ke moka Jehofa a re go nna: ‘Tšeo ba di boletšego di a kwagala. 18 Ke tla ba kgethela moporofeta yo a swanago le wena mo setšhabeng sa gabo lena. Ke tla mmotša seo a tlago go se bolela, gomme yena o tla ba botša dilo ka moka tšeo ke mmotšago tšona. 19 Motho yo mongwe le yo mongwe yo a sa theetšego seo moporofeta yo a tlago go se bolela ka leina la ka, ke tla mo sekiša.

20 “‘Moporofeta le ge e le ofe yo a ka gapeletšago go bolela ka leina la ka dilo tšeo ke sego ka mmotša gore a di bolele, goba yo a bolelago ka leina la medimo e mengwe, moporofeta yoo a bolawe. 21 Eupša ge e ba o ka ipotšiša wa re: “Re tla tseba bjang seo Jehofa a sego a se bolela?” 22 Le tla tseba ka se: Ge e ba moporofeta yo a ka bolela ka leina la Jehofa, gomme dilo tšeo a di boletšego tša se direge goba tša se phethagale, gona go ra gore ga se Jehofa a boletšego dilo tšeo. Moporofeta yoo o boletše dilo tšeo a ikgogomoša. A se ke a le tšhoša.’