Baroma

6 Na re swanetše go tšwela pele re dira sebe e le gore botho bjo bogolo bja Modimo bo oketšege? 2 Aowa! Ka ge re se sa laolwa ke sebe,+ re ka tšwela pele bjang re se dira?+ 3 Na ga le kwešiše gore ka moka ga rena bao re kolobeleditšwego go Kriste Jesu+ re kolobeleditšwe lehung la gagwe?+ 4 Modimo o re bolokile le yena ge re be re kolobetšwa lehung la gagwe.+ Ka ge Modimo a tsošitše Kriste bahung ka maatla a gagwe, ga bjale re phela bophelo bjo boswa.+ 5 Ge e ba re ile ra hwa go swana le yena, re tla tsošwa go swana le yena.+ Seo ke sona se dirago gore re be batee le yena.+ 6 Ka gobane re a tseba gore semelo sa rena sa kgale, se kokotetšwe koteng le yena,+ e le gore re se sa ba le sebe mebeleng ya rena+ le gore re se sa ba makgoba a sebe.+ 7 Ka gobane motho yo a hwilego o lebaletšwe sebe sa gagwe.

8 Ka ge re hwile le Kriste, re dumela gore re tlo phela le yena. 9 Ka gobane re a tseba gore ka ge Kriste a tsošitšwe bahung+ a ka se sa hwa.+ Lehu leo le swanago le kgoši, ga le sa na maatla go yena. 10 O ile a hwa gore a tloše sebe gatee ya ba moka.+ Ga bjale o phelela go dira seo Modimo a se ratago. 11 Ka mo go swanago le lena iponeng le hwile ge go tliwa tabeng ya go dira sebe, eupša le ipone le phela e le gore le dire seo Modimo a se ratago bjalo ka balatedi ba Kriste Jesu.+

12 Le se ke la dumelela sebe se buša bjalo ka kgoši maphelong a lena. Le se ke la laolwa ke dikganyogo tša mebele ya lena yeo e hwago.+ 13 Le gona le se ke la neela mebele ya lena sebeng ka go dira dilo tše mpe, eupša e neeleng go Modimo bjalo ka batho bao ba tsošitšwego bahung. Neelang mebele ya lena go Modimo ka go dira dilo tšeo di lokilego.+ 14 Le se ke la laolwa ke sebe ka gobane ga le ka tlase ga molao+ eupša le ka tlase ga botho bjo bogolo bja Modimo.+

15 Na taba ye e ra gore re swanetše go no dira sebe ka gobane Modimo a re bontšha botho ebile re se ka tlase ga molao?+ Aowa. 16 Na ga le tsebe gore ge e ba le kgetha go kwa motho yo mongwe le itira makgoba a motho yoo? Ka gona ge e ba le kgetha go ba makgoba a sebe,+ le tlo hwa,+ eupša ge e ba le kgetha go ba makgoba a Modimo le go mo kwa,+ Modimo o tlo re le lokile. 17 Ka gona re leboga Modimo ka gobane le ge le be le le makgoba a sebe, ga bjale le mo kwa go tšwa pelong ebile le latela dilo tšeo le di rutwago. 18 Ka morago ga gore le lokollwe sebeng+ le bile makgoba a Modimo gomme la dira seo se lokilego.+ 19 Ke diriša mehlala ye ka baka la ge le na le sebe. Le be le dula le dumelela dikganyogo tša lena tša nama di le diriša dilo tše mpe le tšeo di sa hlwekago. Ga bjale le swanetše go phegelela dikganyogo tšeo di dirago gore le be makgoba a Modimo e le gore le dire dilo tše di lokilego le tše kgethwa.+ 20 Ka gobane ge le be le le makgoba a sebe le be le sa hloke gore le dire selo seo se lokilego.

21 Ditlamorago tša tsela yeo le bego le itshwara ka yona ke dife? Le be le dira dilo tšeo gona bjale di le lešago dihlong. Dilo tšeo di be di tlo dira gore mafelelong le hwe.+ 22 Bjale ka ge le lokolotšwe sebeng, dirang dilo tše kgethwa+ bjalo ka makgoba a Modimo. Ge le ka dira bjalo le tla hwetša bophelo bjo bo sa felego.+ 23 Gobane moputso wa sebe ke lehu+ eupša mpho yeo Modimo a re neago yona, ke bophelo bjo bo sa felego+ ka Morena wa rena Jesu Kriste.+