Baroma

5 Bjale, ka ge go boletšwe gore re lokile ka ge re na le tumelo,+ a re thabeleng khutšo le Modimo ka baka la Morena wa rena Jesu Kriste.+ 2 Tumelo ya rena go Jesu e dira gore re kgone go batamela Modimo le gore Modimo a re bontšhe botho bja gagwe.+ Re a thaba ka gobane re na le kholofelo ya gore Modimo o tla re tagafatša. 3 Ga re thabišwe ke seo feela, eupša re a thaba le ge re tlaišega+ ka gobane re a tseba gore ge re tlaišega re tlo kgona go kgotlelela.+ 4 Ge re kgotlelela, Modimo o tlo re amogela.+ Ge a re amogela re tlo ba le kholofelo.+ 5 Kholofelo yeo e ka se dire gore re nyame le gatee,+ ka gobane Modimo o dirišitše moya wa gagwe o mokgethwa wo a re neago wona go bontšha gore o a re rata.+

6 Ge re be re na le sebe,*+ Kriste o ile a hwela batho bao ba dirago dilo tše mpe. O ile a dira seo ka nako e beilwego. 7 Ka gobane ga se gantši motho a ka hwela moloki eupša ge e le motho yo botse yena, mohlomongwe yo mongwe a ka beta pelo a mo hwela. 8 Eupša Modimo o bontšhitše gore o a re rata ka gobane Kriste o ile a re hwela le ge re be re sa le badiradibe.+ 9 Bjale re kgodišegile gore re tlo phološwa nakong ya ge Modimo a tla be a galefile+ ka gobane go boletšwe gore re lokile ka baka la madi+ a Jesu Kriste. 10 Le ge re be re le manaba a Modimo, lehu la Morwa wa gagwe+ le ile la dira gore re be bagwera ba gagwe. Ka ge ga bjale re le bagwera ba Modimo, re tloga re kgodišegile gore re tla phološwa ka ge Jesu a re hwetše. 11 Seo Modimo a re diretšego sona ka Morena wa rena Jesu Kriste se dira gore re thabe, ka gobane bjale re kgona go ba bagwera ba gagwe.+

12 Sebe se tsene lefaseng ka motho o tee gomme sebe sa tliša lehu.+ Ka gona lehu le aparetše batho ka moka ka gobane ka moka ga bona ba dirile sebe.+ 13 Ka gobane sebe se bile gona mo lefaseng pele go ka ba le Molao eupša batho ba ka se bonwe molato ge e ba go se na molao.+ 14 Le ge go le bjalo, lehu le ile la buša e le kgoši go tloga mehleng ya Adama go fihla mehleng ya Moshe. Le ile la buša le bao ba sego ba dira sebe sa go swana le seo Adama a se dirilego. Adama o be a swantšhetša motho yo go boletšwego gore o tlo tla.+

15 Eupša mpho ya Modimo ga e swane le sebe seo Adama a se dirilego, ka gobane sebe seo se dirile gore batho ba bantši ba hwe. Eupša batho ba bantši ba holwa ke mpho yeo Modimo a ba neago yona ka baka la botho bjo a bo bontšhago+ le ka baka la botho bjo Jesu Kriste a bo bontšhago.+ 16 Mpho yeo Modimo a re filego yona* ga e swane le sebe seo se dirilwego ke motho o tee,+ ka gobane ka morago ga gore motho yo a dire sebe o ile a bonwa molato.+ Eupša Modimo o ile a fa batho mpho ka morago ga gore ba dire sebe. Ka baka leo Modimo o ile a bolela gore batho ba lokile.+ 17 Lehu le bušitše bjalo ka kgoši ka baka la sebe seo se dirilwego ke motho o tee,+ eupša re kgodišegile gore batho bao Modimo a ba bontšhago botho bja gagwe bjo bogolo,+ bao mpho yeo e dirago gore e be ba ba lokilego ba tlo buša e le dikgoši+ ka baka la Jesu Kriste.+

18 Ka gona ka ge sebe setee se dirile gore batho ba mehuta ka moka ba bonwe molato,+ le selo setee seo se lokilego se dirile gore batho ka moka ba bolelwe gore ba lokile+ le gore ba tlo phela ka mo go sa felego.+ 19 Go etša ge go se kwe ga motho o tee go dirile gore batho ba bantši e be badiradibe,+ ka mo go swanago go kwa ga motho o tee go tlo dira gore batho ba bantši e be bao ba lokilego.+ 20 Bjale Molao o bile gona gore o thuše batho gore ba bone gore ba na le dibe tše dintši.+ Mo go tletšego sebe, botho bjo bogolo bja Modimo bo bonagala gabotse. 21 Go etša ge sebe se ile sa buša e le kgoši se na le lehu,+ ka mo go swanago gona bjale botho bjo bogolo bja Modimo bo buša ka toka bjalo ka kgoši. Seo se tlo dira gore re hwetše bophelo bjo bo sa felego ka Jesu Kriste Morena wa rena.+