Ditiro tša Baapostola

15 Bjale banna ba bangwe bao ba tšwago Judea, ba ile ba ya Antiokia gomme ba ruta banababo rena ba moo ba re: “Ge e ba le sa latele Molao wa Moshe wa gore le bolotšwe+ gona le ka se phološwe.” 2 Eupša Paulo le Baranaba ba ile ba ngangišana le bona kudu, ke moka banababo rena ba ile ba dira phetho ya gore Paulo, Baranaba le ba bangwe ba iše taba yeo go baapostola le bagolo Jerusalema.+

3 Barutiwa ba bangwe ba ile ba ba felesetša gomme ba ba gomela tseleng. Paulo, Baranaba le batho bao ba bego ba na le bona, ba ile ba tšwela pele ka leeto, ba feta Fenikia le Samaria. Ba be ba tšama ba hlalosetša barutiwa ba moo ka ditaba tše dibotse tša gore batho ba ditšhaba ba fetoga badumedi. Ge barutiwa ba ekwa ditaba tšeo ba be ba thaba kudu. 4 Ge ba fihla Jerusalema, phuthego, baapostola le bagolo ba ile ba ba amogela ka diatla tše pedi. Ke moka Paulo le Baranaba ba ile ba ba botša ka dilo tše dintši tšeo Modimo a ba thušitšego go di dira. 5 Eupša barutiwa bao e kilego ya ba Bafarasei, ba ile ba emelela ba re: “Barutiwa bao e sego Bajuda ba swanetše go bolotšwa ebile ba laelwe gore ba latele Molao wa Moshe.”+

6 Ka gona baapostola le bagolo ba ile ba kopana gore ba boledišane ka taba ye. 7 Ba ile ba fetša nako e telele ba boledišana* ka taba ye. Ke moka Petro a ema a re go bona: “Banabešo le a tseba gore go tloga kgale Modimo o ile a nkgetha gare ga lena gore ke yo botša batho ba ditšhaba ditaba tše dibotse e le gore ba fetoge barutiwa.+ 8 Modimo yo a tsebago dipelo+ o bontšhitše gore o a ba amogela ka go ba nea moya o mokgethwa,+ bjalo ka ge le rena a ile a re nea wona. 9 O dirile gore go se ke gwa ba le phapano magareng ga rena le bona,+ ka gobane o ile a hlwekiša dipelo tša bona ka ge ba na le tumelo.+ 10 Bjale ke ka baka lang le leka Modimo ka go rweša barutiwa morwalo o boima+ woo rena le borakgolokhukhu ba rena re sa kago ra kgona go o rwala?+ 11 Gona bjale re na le tumelo ya gore re tla phološwa ka baka la botho bja Morena Jesu+ go no swana le ge le rena re phološitšwe.”+

12 Ke moka batho bao ka moka ba homola gomme ba theetša ge Baranaba le Paulo ba ba botša ka mehlolo le dilo tše dintši tše di makatšago tšeo Modimo a ba thušitšego go di dira gare ga ditšhaba. 13 Ge ba feditše go bolela, Jakobo a re: “Banabešo, ntheetšeng. 14 Simeoni*+ o re hlaloseditše kamoo Modimo a ilego a thoma go amogela batho ba ditšhaba tše dingwe gore le bona ba bitšwe ka leina la gagwe.+ 15 Ditaba tšeo di dumelelana le dilo tšeo di ngwadilwego ka dipukung tša Baporofeta tšeo di rego: 16 ‘Ka morago ga dilo tše ke tla boa ka tsošološa ntlo ya Dafida yeo e welego. Ke tla tsošološa le marope a yona ka ba ka a aga leswa, 17 e le gore batho bao ba šetšego ba hlankele nna Jehofa* ka pelo ka moka, ba na le batho ka moka ba ditšhaba bao ba bitšwago ka leina la ka. Ke nna Jehofa ke bolelago dilo tše ebile ke nna ke di dirago.+ 18 Ke kgale ke dirile phetho ya go dira dilo tše.’+ 19 Ka gona ke bona go sa hlokagale gore re tshwenye batho bao ba tšwago ditšhabeng tše dingwe bao ba fetogilego barutiwa.+ 20 Eupša a re ba ngwaleleng gore ba ralokele kgole le dilo ka moka tšeo di sepedišanago le medingwana,+ le go itshwara gampe ka tša thobalano,*+ le gore ba se ke ba ja madi+ le diphoofolo tše di kgamilwego.* 21 Ga e sa le go tloga kgale, motseng o mongwe le o mongwe go be go dutše go na le batho bao ba rutago batho ba bangwe ka dilo tšeo Moshe a di ngwadilego. Ka gobane mangwalo a gagwe a balelwa godimo disinagogeng ka sabatha e nngwe le e nngwe.”+

22 Ka gona baapostola, bagolo gotee le phuthego ka moka ba ile ba kwana gore go kgethwe banna ba babedi bao ba etelelago pele ka phuthegong gore ba ye Antiokia le Paulo le Baranaba. Banna bao e be e le Judase yo a bego a bitšwa Barasaba le Silase.+ 23 Ba ile ba ba fa lengwalo leo le bego le re:

“Rena baapostola le bagolo, re a le dumediša lena banababo rena bao ba lego Antiokia,+ Siria le Tsilitsia bao ba tšwago ditšhabeng tše dingwe. 24 Re a tseba gore go na le batho ba bangwe bao ba tšwago mo, bao ba ilego ba tla go lena ba bolela dilo tšeo di le kwešago bohloko+ ebile ba leka go dira gore le tlogele go hlankela Modimo. Bjale tsebang gore ga se rena re ba romilego. 25 Eupša rena re dumelelane ka gore re kgethe banna ba babedi gore ba tle go lena ba na le Baranaba le Paulo bao re ba ratago. 26 Paulo le Baranaba ba ile ba bea maphelo a bona kotsing ka baka la ge ba dumela leineng la Morena wa rena Jesu Kriste.+ 27 Ka gona re roma Judase le Silase gore le bona ba le botše dilo tšeo di ngwadilwego lengwalong le.+ 28 Moya o mokgethwa+ o re thušitše gore re dire phetho ya gore re se ke ra le imetša ka dilo tše dintši, eupša re le fe ditaelo tše tše bohlokwa: 29 le ralokeleng kgole le dilo tšeo di hlabetšwego medingwana ya diswantšho,+ le go itshwara gampe ka tša thobalano,+ ebile le se ke la ja madi+ le diphoofolo tše di kgamilwego.+ Ge le ka latela ditaelo tše dilo di tlo le sepelela botse bophelong. Re tla bonana!”

30 Banna bao ba ile ba sepela ba ya Antiokia. Ge ba fihla moo ba ile ba kgobokanya barutiwa gomme ba ba fa lengwalo leo. 31 Ge barutiwa ba feditše go bala lengwalo le leo le kgothatšago, ba ile ba thaba kudu. 32 Ka ge Judase le Silase le bona e be e le baporofeta, ba ile ba fa dipolelo tše dintši tšeo di ilego tša kgothatša banababo bona ba ba ba ba matlafatša.+ 33 Ka morago ga ge ba feditše nakonyana ba le moo, barutiwa ba moo ba ile ba ba laela ke moka ba boela morago Jerusalema. 34* —— 35 Eupša Paulo le Baranaba bona ba ile ba šala Antiokia. Ba be ba ruta ebile ba bolela ditaba tše dibotse tša lentšu la Jehofa ba na le barutiwa ba bangwe ba bantši.

36 Ka morago ga nakonyana Paulo o ile a botša Baranaba gore: “A re ye re etele barutiwa motseng o mongwe le o mongwe wo re ilego ra bolela lentšu la Jehofa go wona, gore re yo bona ge e ba ba sa phetše gabotse.”+ 37 Baranaba yena o be a tloga a nyaka gore ba sepele le Johane yo a bego a bitšwa Mareka.+ 38 Eupša Paulo o be a sa nyake gore ba sepele le yena, ka gobane o ile a ba tlogela ge ba be ba le Pamfilia gomme a se sepele le bona ge ba be ba eya go yo bolela ditaba tše dibotse.+ 39 Taba ye e ile ya dira gore Paulo le Baranaba ba ngangišane kudu ba kwatile ba ba ba feleletša ba arogane. Ke moka Baranaba+ o ile a sepela le Mareka ka sekepe ba ya Tsipero. 40 Paulo yena a kgetha Silase gomme ka morago ga gore banababo ba rapele Jehofa gore a mo hlokomele, o ile a sepela.+ 41 Paulo o ile a feta Siria le Tsilitsia, a tšama a matlafatša diphuthego.