Kutollo Yeo e Utolletšwego Johane
20 Ka bona morongwa a theoga legodimong a swere senotlelo seo se bulago sekoti+ ebile a swere le ketane e kgolo. 2 A swara drakone+ noga ya kgale,+ yeo e lego Diabolo+ le Sathane,+ a e tlema ka mengwaga e 1 000. 3 Ke moka a e lahlela sekoting+ a se tswalela gomme a bea leswao e le gore e se sa hlwa e timetša ditšhaba go fihlela ge mengwaga e 1 000 e fedile. Ka morago ga moo e swanetše go lokollwa ka nakwana.+
4 Ka bona ditulo tša bogoši gomme bao ba dutšego godimo ga tšona ba fiwa maatla a go ahlola. Ka bona madi a batho bao ba bolailwego* ka baka la bohlatse bjo ba bo filego ka Jesu le ka baka la go bolela ka Modimo. Ga se ba ka ba rapela sebata goba seswantšho sa sona ebile ga se ba ka ba dumela go swaiwa diphatleng tša bona goba matsogong a bona.+ Ba ile ba boela ba phela gape gomme ba buša le Kriste+ e le dikgoši ka mengwaga e 1 000. 5 Ye ke tsogo ya pele.+ (Bahu ba bangwe ka moka+ ga se ba ka ba boela ba phela go fihla ge mengwaga e 1 000 e fedile.) 6 Go thaba bao ba tsošwago pele bahung,+ bona bao ke ba bakgethwa. Ba ka se hwe+ lehu la bobedi+ eupša e tla ba baperisita+ ba Modimo le ba Kriste. Ba tla buša le Kriste e le dikgoši ka mengwaga e 1 000.+
7 Ge mengwaga e 1 000 e se na go fela, Sathane o tla lokollwa kgolegong ya gagwe, 8 a ya a timetša ditšhaba tšeo di lego dikhutlong tše nne tša lefase e lego Gogo le Magogo, e le gore a di kgobokeletše go ya ntweng. Palo ya tšona e swana le santa ya lewatle. 9 Ba phatlalala lefaseng ka moka gomme ba dikanetša kampa ya bakgethwa le motse wo o rategago. Eupša mollo wa theoga o etšwa legodimong wa ba tšhuma.+ 10 Ke moka Diabolo yo a bego a ba timetša a lahlelwa bodibeng bja mollo wo o tukago kudu,* moo sebata+ le moporofeta wa maaka ba bego ba šetše ba le gona.+ Ba tla tlaišwa* go ya go ile bošego le mosegare.
11 Ke moka ka bona setulo sa bogoši se segolo se sešweu le yoo a dutšego godimo ga sona.+ Legodimo le lefase tša tšhaba+ pele ga gagwe gomme tša se sa ba gona. 12 Ka bona bahu ba bagolo le ba banyenyane ba eme pele ga setulo sa bogoši gomme gwa bulwa mangwalo a go phuthwa. Eupša go ile gwa bulwa lengwalo le lengwe la go phuthwa, e be e le puku ya bophelo.+ Yo a dutšego setulong sa bogoši o be a ahlola bahu go ya ka dilo tšeo ba di dirilego tšeo di ngwadilwego ka mangwalong a go phuthwa.+ 13 Ke moka lewatle la ntšha bahu bao ba hwetšego ka gare ga lona, lehu le Lebitla* le tšona tša ntšha bahu bao ba bego ba le go tšona gomme yo mongwe le yo mongwe wa bona a ahlolwa go ya ka dilo tšeo a di dirilego.+ 14 Ka gona lehu le Lebitla tša lahlelwa bodibeng bja mollo wo o tukago.+ Bodiba bja mollo+ bo swantšhetša lehu la bobedi.+ 15 Go oketša moo, motho yo mongwe le yo mongwe yo a sego a ngwalwa ka pukung ya bophelo+ a lahlelwa bodibeng bja mollo wo o tukago.+