Ebangedi ya Johane

6 Ka morago ga moo, Jesu a tloga a tshelela ka mošola wa lewatle la Galilea, leo gape le bitšwago Tiberiase.+ 2 Eupša batho ba bantši ba ile ba tšwela pele ba mo latela,+ ka gobane ba be ba bona mehlolo yeo a bego a e dira ya go fodiša balwetši.+ 3 Ka gona Jesu a ya thabeng gomme a dula moo le barutiwa ba gagwe. 4 Ka nako yeo, monyanya wa Bajuda e lego Paseka+ o be o le kgauswi le go ketekwa. 5 Eitše ge Jesu a lebelela, a bona batho ba bantši kudu ba etla go yena, a re go Filipi: “Re tla reka kae dinkgwa tša gore batho ba ba je?”+ 6 Eupša o be a botšiša Filipi potšišo yeo e le gore a mo leke, ka gobane yena o be a tseba gore o be a le kgauswi le go dira eng. 7 Filipi a re: “Le ge re ka reka dinkgwa tšeo di lekanago ditšhelete tša tšhipi* tše 200 di ka se ba lekane, gaešita le ge yo mongwe le yo mongwe wa bona a ka hwetša senkgwa se senyenyane.” 8 Yo mongwe wa barutiwa ba gagwe, e lego Andrea morwarrago Simone Petro a re: 9 “Mošemanyana yo o swere dinkgwa tše hlano tša go dirwa ka folouru ya mabele* le dihlapi tše pedi tše dinyenyane. Eupša ka ge batho ba e le ba bantši di ka se ba lekane?”+

10 Jesu a re: “Kgopela batho bao gore ba dule fase.” Ka ge lefelong leo go be go na le bjang bjo bontši, banna ba e ka bago ba 5 000 ba ile ba dula fase.+ 11 Ka gona, Jesu a tšea dinkgwa a rapela ke moka a di fa batho bao ba bego ba dutše moo, a dira se se swanago le ka dihlapi tšela tše dinyenyane gomme batho ba ja go fihlela ba kgotsofala. 12 Ka morago ga ge batho bao ba jele ba kgotsofetše, a re go barutiwa ba gagwe: “Kgoboketšang marathana ao a šetšego, e le gore go se ke gwa senywa selo.” 13 Ka gona, ba kgoboketša marathana ao a bego a šetše a dinkgwa tšela tše hlano tša go dirwa ka folouru ya mabele gomme ba tlatša mebanki e 12.

14 Ge batho ba bona mohlolo woo a o dirilego ba thoma gore: “Ka nnete yo ke moporofeta yoo go boletšwego e sa le pele gore o tlo tla mo lefaseng.”+ 15 Bjale ka ge Jesu a be a tseba gore ba be ba le kgauswi le go tlo mo gapeletša gore a be kgoši, a boela+ gape thabeng a le noši.+

16 Ge letšatši le dikela, barutiwa ba gagwe ba ile ba theogela lewatleng,+ 17 ba namela sekepe gomme ba ya Kaperenaume yeo e bego e le ka mošola wa lewatle. Ka nako yeo, e be e šetše e le leswiswi ebile Jesu o be a sešo a etla go bona.+ 18 Le gona, lewatle le be le thoma go galefa ka gobane go be go na le moya o montši.+ 19 Ge ba šetše ba sepetše ka sekepe dikhilomithara tše hlano goba tše tshelelago,* ba ile ba bona Jesu a sepela godimo ga lewatle, a etla kgauswi le sekepe gomme ba tšhoga kudu. 20 Ke moka a re go bona: “Ke nna, le se ke la tšhoga!”+ 21 Ba be ba nyaka go mo nametša sekepe, ka yona nako yeo sekepe se ile sa fihla nageng yeo ba bego ba eya go yona.+

22 Letšatšing le le latelago, batho bao ba bego ba le ka mošola wa lewatle ba ile ba bona gore e be e le sekepe se senyenyane feela moo. Ba ile ba lemoga le gore Jesu o be a se a namela sekepe seo le barutiwa ba gagwe, ka gobane barutiwa ba gagwe ba be ba sepetše ba le tee. 23 Ge batho bao ba bona dikepe tšeo di tšwago Tiberiase di fihla kgauswi le lefelo leo Jesu a ilego a ba fa dinkgwa gore ba di je ka morago ga gore a rapele, 24 ba ile ba bona gore Jesu le barutiwa ba gagwe ga ba gona moo. Ka gona, ba namela dikepe tša bona ba ya Kaperenaume gore ba yo nyaka Jesu.

25 Ge ba mo hwetša ka mošola wa lewatle ba re go yena: “Rabi,+ o fihlile nako mang mo?” 26 Jesu a re go bona: “Ruriruri ke re go lena, ga le nnyake ka gobane le bone mehlolo, eupša le nnyaka ka gobane le jele dinkgwa la khora.+ 27 Le se ke la šomela dijo tšeo di senyegago, eupša le šomele dijo tšeo di le fago bophelo bjo bo sa felego,+ tšeo Morwa wa motho a tlago go le fa tšona. Ka gobane Tate, yena Modimo wa legodimong, o mo swaile go bontšha gore o a mo amogela.”+

28 Ka gona ba re go yena: “Re swanetše go dira eng gore re dire mediro ya Modimo?” 29 Jesu a re go bona: “Modiro wa Modimo ke gore le bontšhe tumelo go yoo a mo romilego.”+ 30 Ke moka ba re go yena: “Bjale re direle mohlolo+ e le gore re o bone gomme re go tshepe. O tlo re direla mohlolo ofe? 31 Borakgolokhukhu ba rena ba jele manna lešokeng,+ go etša ge Mangwalo a re: ‘O ba file senkgwa seo se tšwago legodimong gore ba je.’”+ 32 Ke moka Jesu a re go bona: “Ruriruri ke re go lena, Moshe ga se a le fa senkgwa seo se tšwago legodimong, eupša Tate o le fa senkgwa sa nnete seo se tšwago legodimong. 33 Ka gobane senkgwa seo Modimo a le neago sona, ke yo a theogago legodimong gore a fe lefase bophelo.” 34 Ka gona ba re go yena: “Morena, o dule o re nea senkgwa se.”

35 Jesu a re go bona: “Ke nna senkgwa seo se neago bophelo. Yo a tlago go nna a ka se tsoge a swerwe ke tlala, gomme yo a dumelago go nna a ka se tsoge a nyorilwe.+ 36 Eupša ke itše go lena, le mpone. Le ge go le bjalo, ga le dumele.+ 37  Batho ka moka bao Tate a mphago bona ba tla tla go nna gomme nka se tsoge ke rakile yo a tlago go nna,+ 38 ka gobane ke theogile legodimong+ e le gore ke tlo dira thato ya yo a nthomilego,+ e sego go tlo dira thato ya ka. 39 Thato ya yo a nthomilego ke gore ke se ke ka lahlegelwa le ke motho o tee go bao a mphilego bona, go e na le moo ke ba tsoše bahung+ ka letšatši la mafelelo. 40 Le gona, thato ya Tate ke gore yo mongwe le yo mongwe yo a amogelago Morwa ke moka a dumela go yena, a tle a hwetše bophelo bjo bo sa felego,+ ebile ke tla mo tsoša bahung+ ka letšatši la mafelelo.”

41 Ke moka Bajuda ba thoma go ngongorega ka yena ka gobane o be a itše ke yena senkgwa seo se theogilego se etšwa legodimong.+ 42 Ke moka ba re: “Na yo ga se Jesu morwa wa Josefa, yoo re tsebago tatagwe le mmagwe?+ Bjale ke ka baka la eng a re o theogile a etšwa legodimong?” 43 Jesu a re go bona: “Tlogelang go ngunanguna. 44 Ga go na motho yo a ka tlago go nna a se a gogwa ke Tate yo a nthomilego,+ le gona ke tla mo tsoša ka letšatši la mafelelo.+ 45 Baporofeta ba ngwadile gore: ‘Ka moka ga bona ba tla rutwa ke Jehofa.’*+ Yo mongwe le yo mongwe yo a theetšago Tate gomme a ithuta go yena, o tla go nna. 46 Seo ga se bolele gore go na le motho yo a bonego Tate,+ eupša Tate o bonwe feela ke motho yo a tšwago go yena.*+ 47 Ruriruri ke re go lena: Yo a dumelago go nna o tla hwetša bophelo bjo bo sa felego.+

48 “Ke nna senkgwa seo se neago bophelo.+ 49 Borakgolokhukhu ba lena ba jele manna lešokeng, le ge go le bjalo ba ile ba hlokofala.+ 50 Se ke senkgwa seo se theogilego se etšwa legodimong, e le gore motho yo mongwe le yo mongwe yo a se jago a se ke a hwa. 51 Ke nna senkgwa se se fago bophelo seo se theogilego se etšwa legodimong. Motho yo a ka jago senkgwa se o tla phela go ya go ile. Ge e le gabotse, senkgwa seo ke tlago go se nea ke nama ya ka yeo ke tlago go e neela batho gore ba kgone go phela.”+

52 Ke moka Bajuda ba thoma go ngangišana, ba re: “Motho yo a ka re fa bjang nama ya gagwe gore re e je?” 53 Ka gona, Jesu a re: “Ruriruri ke re go lena: Ge e ba le ka se je nama ya Morwa wa motho la ba la nwa le madi a gagwe, gona le ka se hwetše bophelo.*+ 54 Yo a jago nama ya ka le go nwa madi a ka o tla hwetša bophelo bjo bo sa felego ebile ke tla mo tsoša bahung+ ka letšatši la mafelelo, 55 ka gobane nama ya ka ke sejo sa kgonthe, le madi a ka ke seno sa kgonthe. 56 Yo mongwe le yo mongwe yo a jago nama ya ka le go nwa madi a ka o dula a le boteeng le nna gomme le nna ke ba boteeng le yena.+ 57 Go no swana le ge Tate yo a phelago a nthomile ebile le nna ke phela ka baka la Tate, le motho yo a jago nama ya ka o tla phela ka baka la ka.+ 58 Se ke senkgwa seo se theogilego se etšwa legodimong. Ga se swane le senkgwa seo borakgolokhukhu ba lena ba se jelego gomme ka morago ba hlokofala. Mang le mang yo a jago senkgwa se o tla phela go ya go ile.”+ 59 Jesu o boletše dilo tše ge a be a ruta batho sinagogeng* kua Kaperenaume.

60 Ge barutiwa ba gagwe ba bantši ba ekwa seo ba re: “Dilo tše a di bolelago di a tšhoša, ke mang yo a ka di theetšago?” 61 Ka ge Jesu a be a tseba gore barutiwa ba gagwe ba be ba ngongorega ka baka la dilo tšeo a bego a di bolela, a re go bona: “Na dilo tše di a le kgopiša? 62 Bjale le tla dirang ge e ba le ka bona Morwa wa motho a rotogela moo a bego a le gona peleng?+ 63 Moya ke wona o neago bophelo,+ eupša nama ga e na mohola le gatee. Dilo tšeo ke le boditšego tšona di tšwa go moya o mokgethwa ebile di fa bophelo.+ 64 Eupša go na le ba bangwe gare ga lena bao ba sa dumelego.” Jesu o boletše seo ka gobane go tloga mathomong o be a tseba gore ke bomang bao ba bego ba sa dumele le gore ke mang yo a bego a tlo mo rekiša.+ 65 A tšwela pele ka gore: “Ke ka baka leo ke le boditšego gore ga go na yo a ka tlago go nna ge a se a dumelelwa ke Tate.”+

66 Seo se ile sa dira gore barutiwa ba gagwe ba bantši ba boele dilong tšeo ba bego ba di dira,+ gomme ba se sa hlwa ba sepela le yena. 67 Ka gona Jesu a botšiša baapostola ba gagwe ba 12 a re: “Na le lena le nyaka go sepela?” 68 Simone Petro a re go yena: “Morena, re tla ya go mang?+ Dilo tšeo o di bolelago di dira gore batho ba hwetše bophelo bjo bo sa felego.+ 69 Re dumetše ebile re a tseba gore o mohlanka yo Mokgethwa wa Modimo.”+ 70 Jesu a re go bona: “Ke le kgethile le le ba 12.+ Le ge go le bjalo, yo mongwe wa lena ke mothomeletši.”*+ 71 Ge e le gabotse, o be a bolela ka Judase morwa wa Simone Isikariote ka gobane o be a tla mo rekiša, gaešita le ge e le yo mongwe wa ba 12.+