Ebangedi ya Mateo

22 Jesu a bolela le bona gape a diriša dipapišo a re: 2 “Mmušo wa magodimo o ka swantšhwa le kgoši yeo e diretšego morwa wa yona lenyalo.+ 3 Ya roma bahlanka ba yona gore ba yo bitša bao ba memilwego lenyalong leo, eupša ba be ba sa nyake go tla.+ 4 Ya roma bahlanka ba bangwe gape, ya re go bona: ‘Botšang bao ba memilwego gore ke ba lokišeleditše dijo tša mosegare, dikgomo tša ka le diphoofolo tša ka tšeo di nonnego di hlabilwe gomme dilo ka moka di lokile. A ba tle lenyalong.’ 5 Eupša ba se tšeele taba yeo godimo, ba ya ba itirela dilo tša bona. Yo mongwe a ya tšhemong ya gagwe gomme yo mongwe a ya kgwebong ya gagwe.+ 6 Eupša ba bangwe ka moka, ba swara bahlanka ba kgoši ka moka ba ba betha gomme ba ba bolaya.

7 “Kgoši ya galefa kudu, ya romela mašole a yona gore a yo bolaya babolai bao le go fiša motse wa bona.+ 8 Ke moka ya re go bahlanka ba yona: ‘Dilo ka moka di lokile, eupša bao ba bego ba memilwe lenyalong ba be ba sa swanelege.+ 9 Ka baka leo, eyang ditseleng tšeo di tšwelago ka ntle ga motse gomme le meme motho yo mongwe le yo mongwe yo le mo hwetšago gore a tle lenyalong.’+ 10 Ka gona bahlanka bao ba ya ditseleng ba mema batho ka moka bao ba ba hwetšago, ba mema batho ba babe le ba go loka. Ke moka lefelo la lenyalo la tlala ka batho bao ba tlilego lenyalong.*

11 “Ge kgoši e etla go bona baeng, e ile ya bona monna yo a bego a se a apara seaparo sa go tla lenyalong. 12 Ka gona ya re go yena: ‘Wešo, o tsene bjang mo o se wa apara seaparo sa go tla lenyalong?’ Monna yoo a se mo arabe. 13 Ke moka kgoši ya re go bahlanka ba yona: ‘Mo tlemeng maoto le matsogo gomme le mo lahleleng leswiswing ka kua ntle. O tla lla a ba a lomantšha meno* a le moo.’

14 “Ka gobane bao ba memilwego ke ba bantši, eupša bao ba kgethilwego ke ba sego kae.”

15 Ke moka Bafarasei ba sepela gomme ba logela Jesu maanomabe e le gore ba tle ba mo tanye ka dilo tšeo a di bolelago.+ 16 Ka gona ba romela barutiwa ba bona le balatedi ba Heroda+ go yena, ba re: “Morutiši, re a tseba gore o bolela nnete ebile dilo tšeo o di rutago ka Modimo ke tša nnete. Le gona, ga o nyake go amogelwa ke batho ka gobane ga o lebelele gore motho o bonagala bjang. 17 Bjale, re botše gore taba ye o e bona bjang. Na go dumeletšwe ke molao gore motho yo mongwe le yo mongwe a ntšhetše Kesara motšhelo goba ga go bjalo?” 18 Eupša Jesu ka ge a be a tseba maanomabe ao ba bego ba mo logetše ona, o ile a re: “Ke ka baka la eng le nteka lena baikaketši? 19 Mpontšheng tenariase.”* Ke moka ba mo tlišetša tenariase. 20 A re go bona: “Seswantšho se le leina le ke tša mang?” 21 Ba re: “Ke tša Kesara.” Ke moka a re go bona: “Ka gona, efang Kesara tša Kesara eupša Modimo le mo fe tša Modimo.”+ 22 Ge ba ekwa seo ba makala gomme ba mo tlogela ba sepela.

23 Ka letšatši leo Basadutsei, e lego bao ba sa dumelego gore go na le tsogo ya bahu,+ ba ile ba tla go yena ba mmotšiša ba re:+ 24 “Morutiši, Moshe o itše: ‘Ge monna a ka hlokofala a se na bana, morwarrago monna yoo a nyale mosadi yoo e bego e le wa monna yoo gomme a be le bana le yena legatong la morwarragwe.’+ 25 Bjale go be go na le banna ba šupago bao e bego e le bana ba motho. Wa pele o ile a nyala mosadi gomme monna yoo a hlokofala eupša ka ge a be a se na bana, mosadi wa gagwe o ile a nyalwa ke morwarrago monna yoo. 26 Go ile gwa direga se se swanago ka wa bobedi le wa boraro go ba go fihlela go wa bošupa. 27 Mafelelong mosadi yoo le yena a hlokofala. 28 Ka baka leo, ge bahu ba tsošwa, gare ga banna ba ba šupago, mosadi yoo e tla ba wa mang ka gobane ka moka ba be ba mo nyetše?”

29 Jesu a ba araba a re: “Le a timela, ka baka la gore ga le tsebe Mangwalo ebile ga le tsebe maatla a Modimo.+ 30 Ka gobane nakong ya ge bahu ba tsošwa, banna ba ka se nyale le basadi ba ka se nyalwe, eupša ba tla ba bjalo ka ge eka ke barongwa bao ba lego legodimong.+ 31 Na ga se la bala seo Modimo a le boditšego sona mabapi le tsogo ya bahu ge a be a re: 32 ‘Ke nna Modimo wa Aborahama, Modimo wa Isaka le Modimo wa Jakobo’?+ Yena ke Modimo wa ba ba phelago, e sego wa bahu.”+ 33 Ge mašaba a ekwa seo a ile a makatšwa ke tsela yeo a bego a ruta ka yona.+

34 Ge Bafarasei ba kwele gore o tswaletše Basadutsei melomo, ba ile ba ipopa ngatana e tee ba tla go yena. 35 Yo mongwe wa Bafarasei bao yo a tsebago Molao a mo leka ka go mmotšiša gore: 36 “Morutiši, molao o bohlokwa kudu Molaong wa Moshe ke ofe?”+ 37 A re go yena: “‘O rate Jehofa* Modimo wa gago ka pelo ya gago ka moka, ka moya* wa gago ka moka le ka monagano wa gago ka moka.’+ 38 Wo ke molao wa pele le wa bohlokwa kudu. 39 Wa bobedi wa go swana le wona o re: ‘O rate moagišane wa gago ka mokgwa wo o ithatago ka wona.’+ 40 Molao ka moka le mantšu a baporofeta di tšwa melaong ye e mebedi.”+

41 Bjale ge Bafarasei ba be ba sa le moo, Jesu o ile a ba botšiša a re:+ 42 “Le nagana eng ka Kriste? Ke morwa wa mang?” Bona ba re: “Ke morwa wa Dafida.”+ 43 A re go bona: “Bjale go tla bjang gore moya o mokgethwa+ o hlahle Dafida gore a mmitše Morena, a re: 44 ‘Jehofa o boditše Morena wa ka a re: “Dula ka letsogong la ka le letona go fihla ke dira gore o gatakele manaba a gago”’?*+ 45 Bjale ge e ba Dafida a mmitša Morena, gona go tla bjang gore e be morwa wa gagwe?”+ 46 Le gona ga go na yo a ilego a kgona go mo araba, ebile go tloga ka letšatši leo ga go na yo a ilego a ba le sebete sa go mmotšiša gape.