Baroma
10 Banabešo, selo seo ke se dumago le seo ke se rapelelago ka pelo ka moka ke gore Modimo a phološe batho ba gešo.+ 2 Ke kgodišegile gore ba hlankela Modimo ka mafolofolo+ eupša ga ba kwešiše seo Modimo a se nyakago, 3 ka ge ba sa tsebe dilo tšeo Modimo a rego di lokile,+ ba dira dilo tšeo bona ba naganago gore di lokile.+ Ka gona ga ba theetše melao ya Modimo yeo e bontšhago gore ke dilo dife tšeo di lokilego.+ 4 Kriste o fedišitše Molao+ e le gore motho yo mongwe le yo mongwe yo a bontšhago tumelo go yena a lebelelwe a lokile.+
5 Moshe o ile a re motho yo a dirago dilo tše di lokilego go ya ka Molao o tla phela.+ 6 Eupša mangwalo ge a bolela ka motho yo a lokilego ka gobane a bontšha tumelo a re: “O se ke wa bolela ka pelong ya gago+ wa re: ‘Ke mang yo a tlago go rotogela legodimong+ gore a theoše Kriste?’ 7 goba gore: ‘Ke mang yo a tlago go ya sekoting?’+ Ke gore, gore a yo tsoša Kriste bahung.” 8 Eupša mangwalo ona a reng? A re: ‘Lentšu leo le kgauswi le lena, le ka melomong ya lena le ka dipelong tša lena.’+ “Lentšu” leo ke molaetša wo re o bolelago. 9 Go nyakega gore motho a be le tumelo gore a o dumele, ge e ba o bolela pele ga batho gore Jesu ke Morena+ ebile o dumela ka pelong gore Modimo o mo tsošitše bahung, o tla phološwa. 10 E le gore motho a bontšhe gore o lokile o swanetše go ba le tumelo ka pelong ya gagwe. Eupša e le gore a phološwe o swanetše go botša ba bangwe molaetša woo.+
11 Mangwalo a re: “Motho yo mongwe le yo mongwe yo a dumelago go Jesu a ka se ke a nyama.”+ 12 Ga go na phapano magareng ga Mojuda le Mogerika,+ ka moka ga rena re na le Morena o tee, yo a thušago batho ka moka bao ba mo kgopelago gore a ba thuše. 13 Ka gobane “yo mongwe le yo mongwe yo a bitšago leina la Jehofa* o tla phološwa.”+ 14 Eupša ba tla mmitša bjang ge e ba ba sa dumele go yena? Ba tla dumela go yena bjang ge e ba ba sa ka ba kwa ka yena? Le gona ba tla kwa bjang ge e ba go se na motho yo a bolelago ka yena? 15 Ba tla bolela bjang ge e ba go se na yo a ba romilego?+ Mangwalo a re: “Go botse gakaakang go bona maoto a yo a tlišago ditaba tše dibotse!”+
16 Le ge go le bjalo, ga se batho ka moka bao ba ilego ba theetša ditaba tše dibotse. Ka gobane Jesaya o ile a re: “Jehofa, ke mang yo a dumetšego seo re se boletšego?”+ 17 Motho o ba le tumelo ka baka la seo a se kwelego.+ Seo a se kwelego ke seo se ilego sa bolelwa ge a be a rutwa ka Jesu Kriste. 18 Na Baisiraele ga se ba ka ba kwa? Ba ile ba kwa ebile mangwalo a re: “Modumo wa ditaba tše o kwagetše lefaseng ka moka le molaetša wa tšona o kwagetše lefaseng ka moka.”+ 19 Na se se ra gore Baisiraele ga se ba kgona go kwešiša?+ Le gatee, ba kwešišitše. Moshe o ile a re: “Ke tla dira gore o be le mona ke diriša batho bao e sego setšhaba, ke tla dira gore o galefe ke diriša setšhaba sa ditlaela.”+ 20 Jesaya yena o ile a bolela ka sebete a re: “Ke ile ka hwetšwa ke batho bao ba bego ba sa nnyake,+ ka tsebja ke batho bao ba bego ba sa botšiše selo ka nna.”+ 21 Eupša ge a bolela ka Baisiraele o ile a re: “Ke feditše letšatši ka moka ke kgopela batho ba dinganga gore ba boele go nna.”+