Kutollo Yeo e Utolletšwego Johane
18 Ka morago ga dilo tše ka bona morongwa yo mongwe a theoga legodimong a na le maatla a magolo gomme lefase la phadima ka baka la letago la gagwe. 2 A goeletša ka lentšu le maatla, a re: “O wele! Babilona o Mogolo o wele+ gomme o fetogile lefelo le go dulago matemona, meoya yeo e sa hlwekago le nonyana e nngwe le e nngwe e sa hlwekago le e hloilwego!+ 3 Ka gobane batho ba ditšhaba ka moka ba tagilwe ke beine yeo e swantšhetšago boitshwaro bja gagwe bjo bobe bja tša thobalano,*+ gomme dikgoši tša lefase di itshwere gampe ka tša thobalano le yena.+ Borakgwebo ba humile ka baka la dilo tša go tura tšeo mosadi yo a ikgobokeletšago tšona. Le gona dilo tšeo ga di mo swabiše.”
4 Ka kwa lentšu le lengwe le le tšwago legodimong le re: “Etšwang go yena batho ba ka,+ ge e ba le sa nyake go dira dibe gotee le yena, le ge e ba le sa nyake go otlwa go swana le yena.+ 5 Ka gobane dibe tša gagwe di pakelane go fihla legodimong+ gomme Modimo o tla mo ahlola ka baka la dilo tše mpe tšeo a di dirilego.+ 6 Dilo tšeo a bego a di dira ba bangwe+ le mo direng tšona gabedi+ gomme motswako woo a o tšhetšego ka komiking,+ le mo tswakele wona gabedi.+ 7 Ka ge a ikgogomoša ebile a na le mahumo ao a sa swabišwego ke go a kgoboketša, le yena o swanetše go tlaišega a be a lle ka gobane pelong ya gagwe o dula a ipotša gore: ‘Ke nna kgošigadi, ga ke mohlologadi. Le gona nka se tsoge ka lla.’+ 8 Ke ka lebaka leo dikotlo tša gagwe di tlago go tla ka letšatši letee, e lego lehu, sello le tlala. Le gona o tla fišwa lorelore ka mollo+ ka gobane Jehofa* Modimo yo a mo ahlotšego o na le maatla.+
9 “Dikgoši tša lefase tšeo di itshwerego gampe ka tša thobalano le yena le tšeo di ipshinnego ka mahumo ao a sa swabišwego ke go a kgoboketša, di tla lla tša ba tša itshetla dihuba ge di bona muši wa ge a e swa. 10 Di tla emela kgojana ka ge di tšhaba go tlaišwa go swana le yena gomme tša re: ‘Wena Babilona, motse o mogolo+ le o maatla, o yo madimabe ka gobane kahlolo ya gago e fihlile ka iri e tee.’
11 “Le gona batho bao ba rekišago ba nyamile ebile ba a lla ka baka la gago ka gobane ga go sa na yo a rekago dithoto tša bona ka moka, 12 dithoto ka moka tša gauta, silifera, maswika a bohlokwa, dipheta,* lešela le lebotse la linene, lešela le lephepolo, lešela la silika, lešela le lekhwibidukhwibidu, dilo ka moka tšeo di dirilwego ka kota yeo e nkgago bose, dilo ka moka tšeo di dirilwego ka lenaka la tlou le tšeo di dirilwego ka kota e bohlokwa, koporo, tšhipi le mmabole 13 gotee le sinamone, dimelana tšeo di nkgago bose tša India, diorelo, makhura ao a nkgago bose, diorelo tše ditšhweu,* beine, makhura a mohlware, folouru yeo e šitšwego gabotse, korong, dikgomo, dinku, dipere, dikariki, makgoba le batho. 14 O tšeetšwe dienywa tše di butšwitšego tšeo o bego o di kganyoga gomme o lahlegetšwe ke dilo tše dibotse le dilo tšeo di kgahlišago ebile di ka se sa hwetšwa le ka mohla.
15 “Batho bao ba rekišago bao ba rekišitšego dilo tše, bao ba ilego ba huma ka baka la gago, ba tla emela kgojana ka ge ba tšhaba go tlaišwa go swana le yena gomme ba tla nyama ba ba ba lla, 16 ba re: ‘Wena motse o mogolo, wena yoo a aperego diaparo tše di dirilwego ka lešela le lebotse la linene le diaparo tša mmala o mophepolo le o mokhwibidukhwibidu, ebile o ikgabišitše kudu ka dilo tša gauta, maswika a bohlokwa le diperela, o yo madimabe+ 17 ka gobane mahumo a gago a mantši a sentšwe ka iri e tee!’
“Le gona, balaodi ka moka ba dikepe, batho bao ba tšeago maeto ka dikepe, basepediši ba dikepe le batho ka moka bao ba šomago dikepeng, ba emetše kgojana 18 gomme ba goeletša ge ba bona muši wa ge a e swa, ba re: ‘Ke motse ofe wo o ka tlago wa swana le motse wo o mogolo?’ 19 Ba itšhela ka lerole dihlogong gomme ba goeletša ba nyamile ebile ba lla, ba re: ‘Wena motse o mogolo, wena yo batho ka moka bao ba nago le dikepe ka lewatleng ba humilego ka baka la gago, o yo madimabe ka gobane o sentšwe ka iri e tee!’+
20 “Wena legodimo+ le lena bakgethwa,+ baapostola le baporofeta, thabang ka baka la seo se diragaletšego motse wo ka gobane Modimo o o ahlotše ka baka la lena!”+
21 Ke moka morongwa yo maatla a kuka leswika leo le swanago le lwala le legolo a le lahlela lewatleng, a re: “Babilona, e lego motse o mogolo o tla lahlelwa fase ka lebelo ka mokgwa wo gomme o ka se hlwe o hwetšwa gape.+ 22 Ga go sa na motho yoo a tlago go kwa motho a opela ebile a letša harepa goba a kwa motho yoo a letšago mmino goba naka goba phalafala Babilona. Le gona ga go sa na motho yoo a tlago go šoma moo goba a šila korong e le gore a dire folouru. 23 Go ka se sa ba le seetša sa lebone seo se tlago go bonega go wena ebile go ka se sa kwagala lentšu la monyadi le la monyadiwa go wena ka gobane barekiši ba gago e be e le batho ba bohlokwa kudu lefaseng ebile o timeditše batho ba ditšhaba ka moka ka ge o dirišana le matemona.+ 24 Ruri go yena go hweditšwe madi a baporofeta le a bakgethwa+ le a batho ka moka bao ba bolailwego lefaseng.”+