Ebangedi ya Johane
5 Ka morago ga moo go ile gwa ba le monyanya+ wa Bajuda ke moka Jesu a rotogela Jerusalema. 2 Bjale kua Jerusalema, Keiting ya Dinku+ go be go na le bodiba bjoo ka Seheberu bo bitšwago Bethesida, go na le ditsela tše hlano tšeo di nago le marulelo ao a thekgilwego ka diphilara. 3 Gona moo go be go na le batho ba bantši bao ba babjago, bao e lego difofu, bao ba hlotšago le bao maoto a bona goba matsogo a bona a bego a omeletše.* 4* —— 5 Le gona, gona moo go be go na le monna yo mongwe yo a feditšego mengwaga e 38 a babja. 6 Ge Jesu a bona monna yoo a robetše moo gomme a lemoga gore o na le nako e telele a babja, a re go yena: “Na o nyaka go fola?”+ 7 Monna yoo wa go babja a re go Jesu: “Mohlomphegi, ga ke na motho yo a ka ntsenyago ka bodibeng ge meetse a bilogile. Ge ke sa re ke a tsena, yo mongwe o tsena pele ga ka.” 8 Jesu a re go yena: “Tsoga, tšea bolao bja gago o sepele.”+ 9 Monna yoo a napa a fola ka yona nako yeo, a tšea bolao bja gagwe gomme a thoma go sepela.
Letšatši leo e be e le Sabatha. 10 Ke moka Bajuda ba re go monna yo a fodišitšwego: “Molao ga o dumele gore o rwale bolao bjoo ka Sabatha.”+ 11 Eupša a ba araba a re: “Motho yo a mphodišitšego o itše go nna: ‘Tšea bolao bja gago o sepele.’” 12 Ba mmotšiša ba re: “Ke mang motho yo a go boditšego gore o bo tšee o sepele?” 13 Eupša monna yoo a bego a fodišitšwe o be a sa tsebe gore o fodišitšwe ke mang ka gobane Jesu o be a šetše a tlogile moo.
14 Ka morago ga moo Jesu a hwetša monna yoo a le ka tempeleng gomme a re go yena: “Akere o a bona gore o fodile. O se sa hlwa o dira sebe, e le gore o se ke wa tla wa diragalelwa ke selo se sebe go feta seo se go diragaletšego.” 15 Monna yoo a tloga a botša Bajuda gore o fodišitšwe ke Jesu. 16 Ka baka leo Bajuda ba ile ba thoma go tlaiša Jesu ka ge a be a dira dilo tše ka Sabatha. 17 Jesu a re go bona: “Tate o tšwetše pele a šoma go fihla mo nakong ye, ke ka baka leo le nna ke tšwelago pele ke šoma.”+ 18 Seo se ile sa dira gore Bajuda ba nyake dibaka tše dingwe tša gore ba mmolaye, ka gobane ba be ba nagana gore o be a tshela molao wa Sabatha ebile a re Modimo ke Tatagwe,+ a itira eka o lekana le Modimo.+
19 Ka gona Jesu ge a ba araba a re go bona: “Ruriruri ke re go lena, dilo ka moka tšeo Morwa a di dirago ga a inaganele tšona, eupša o dira dilo tšeo a bonego Tatagwe a di dira.+ Ka gobane dilo tšeo Tate a di dirago, Morwa le yena o a di dira. 20 Tate o rata Morwa+ ebile o mmontšha dilo ka moka tšeo a di dirago, le gona o tla mmontšha mediro e fetago ye e le gore le šale le makatše.+ 21 Go no swana le ge Tate a tsoša bahu,+ Morwa le yena o tsoša bao a nyakago go ba tsoša.+ 22 Tate ga a ahlole motho le gatee, eupša o file Morwa maatla a gore e be yena a ahlolago,+ 23 e le gore batho ka moka ba hlomphe morwa bjalo ka ge ba hlompha Tate. Yo a sa hlomphego morwa ga a hlomphe Tate yo a mo romilego.+ 24 Ruriruri ke re go lena: Yo a kwago seo ke se bolelago gomme a ba le tumelo go yo a nthomilego o tla hwetša bophelo bjo bo sa felego,+ ebile a ka se ahlolwe eupša o swana le motho yoo a bego a hlokofetše gomme gona bjale a phela.+
25 “Ruriruri ke re go lena: Nako e a tla, ebile ge e le gabotse e šetše e fihlile. Bahu ba tla kwa lentšu la Morwa wa Modimo gomme bao ba le kwelego ba tla phela. 26 Go no swana le ge Tate a na le maatla a go nea bophelo,+ o file Morwa maatla a gore le yena a nee bophelo.+ 27 Le gona o mo file maatla a go ahlola+ ka gobane ke yena Morwa wa motho.+ 28 Le se ke la makatšwa ke se, ka gobane go tla tla nako yeo bohle bao ba lego mabitleng ba tlago go kwa lentšu la gagwe+ 29 gomme ba tšwa, bao ba dirilego dilo tše dibotse ba tla tsošetšwa gore ba phele eupša bao ba dirilego dilo tše mpe, ba tla tsošetšwa gore ba ahlolwe.+ 30 Nka se dire selo le se setee seo ke inaganelago sona. Ke ahlola batho go ya le ka seo Tate a mpotšago sona. Ke ba ahlola ka tsela e lokilego+ ka gobane ga ke dire selo seo nna ke se ratago eupša ke dira seo se ratwago ke tate yo a nthomilego.+
31 “Ge e ba e le nna feela ke botšago batho ka nna gona ba ka se ntshepe.+ 32 Go na le yo mongwe yo a neago bohlatse ka nna ebile ke a tseba gore bohlatse bjoo a bo neago ka nna ke bja nnete.+ 33 Le rometše batho go Johane gomme yena o neile bohlatse bja nnete ka nna.+ 34 Le ge go le bjalo, ga ke hloke gore motho yo mongwe a botše batho ka nna eupša ke bolela dilo tše e le gore le tle le phološwe. 35 Monna yoo o be a tuka ebile a phadima go swana le seetša sa lebone gomme le be le ikemišeditše go thaba kudu seetšeng sa gagwe ka nakwana.+ 36 Eupša ke na le bohlatse bjo bontši go feta bja Johane, ka gobane mešomo yeo Tate a nkabetšego gore ke e dire, e lego yona yeo ke e dirago e nea bohlatse bja gore tate ke yena a nthomilego.+ 37 Le gona Tate yo a nthomilego o neile bohlatse ka nna+ eupša ga se la ka la mmona ebile ga se la ka la kwa lentšu la gagwe,+ 38 le gona lentšu la gagwe ga le gona ka dipelong tša lena ka gobane ga le dumele yo a mo romilego.
39 “Lena le nyakišiša Mangwalo+ le nagana gore ka go dira bjalo le tla hwetša bophelo bjo bo sa felego, ebile Mangwalo ona ao ke ona a neago bohlatse ka nna.+ 40 Eupša ga le nyake go ntatela+ e le gore le tle le hwetše bophelo bjo bo sa felego. 41 Ga ke nyake go retwa ke batho 42 ka gobane ke tseba gabotse gore ga le rate Modimo. 43 Ke tlile ka leina la Tate, eupša ga le nkamogele. Le ge go le bjalo, ge nkabe motho yo mongwe a tlile ka leina la gagwe, le be le tlo mo amogela. 44 Le ka se dumele go nna ka gobane ge le retana le a thaba, eupša ga le tsome theto yeo e tšwago go Modimo a nnoši.+ 45 Le se ke la nagana gore ke tla le latofatša go Tate ka gobane Moshe+ yo le mo tshepilego ke yena a le latofatšago. 46 Gabotsebotse ge nkabe le dumetše Moshe, le nna le be le tlo ntumela, ka gobane o ngwadile ka nna.+ 47 Eupša ge e ba le sa dumele seo a se ngwadilego, gona le tla dumela bjang seo ke se bolelago?”