Jesu Kriste

Tlhaloso: Morwa yo a tswetšwego a nnoši wa Modimo, Morwa a nnoši yo a ilego a tšweletšwa ke Jehofa ka noši. Morwa yo ke leitšibulo la tlholo ka moka. Dilo tše dingwe ka moka di ile tša hlolwa legodimong le lefaseng ka yena. Ke motho wa bobedi o mogolo legohleng. Ke yena Morwa yo yoo Jehofa a ilego a mo romela lefaseng go tla go gafa bophelo bja gagwe e le topollo ya batho, gomme a bula tsela ya go ya bophelong bjo bo sa felego ya bana ba Adama bao ba bego ba tla bontšha tumelo. Yena Morwa yo yo a bušeditšwego letagong la legodimo mo nakong ye o buša e le Kgoši, gomme o neilwe matla a go senya ba babe ka moka le gore a phethe morero wa mathomo wa Tatagwe ka lefase. Sebopego sa Sehebere sa leina Jesu se bolela “Jehofa ke Phološo”; Kriste ke leina letee le leo la Ma·shiʹach (Mesia) ya Sehebere, yeo e bolelago “Motlotšwa.”

Na Jesu Kriste e be e le motho wa kgonthe wa histori?

Beibele ka noši ke bohlatse bjo bogolo bja gore Jesu Kriste ke motho wa histori. Pego e lego Diebangeding ga se feela kanegelo e hlokago mohola ya ditiragalo tše di bilego gona ka nako e sa kgonthišwego le lefelong leo le sa bolelwego ka leina. E bolela ka mo go kwalago nako le lefelo ka botlalo. Ka mohlala, bona Luka 3:1, 2, 21-23.

Josephus ra-dihistori wa mo-Juda wa lekgolo la pele la nywaga o boletše ka go kgatlwa ka mafsika ga “Jakobo, ngwanabo Jesu yo a bego a bitšwa Kriste.” (The Jewish Antiquities, Josephus, Puku XX, kar. 200) Tšhupetšo e lebanyago le e ratwago kudu e bolelago ka Jesu e hwetšwago go Puku XVIII, dikarolo 63, 64, e ganeditšwe kudu ke ba bangwe bao ba bolelago gore e swanetše go ba mo gongwe e ile ya oketšwa ka morago goba go kgabišwa ke Bakriste; eupja go dumelwa gore mantšu le mokgwa wa wona ke ao e lego a Josephus, gomme temana e hwetšwa mengwalong ka moka e lego gona.

Tacitus ra-dihistori wa mo-Roma yo a phetšego karolong ya mafelelo ya lekgolo la nywaga la pele Mehleng ya Rena, o ngwadile ka gore: “Christus [“Kriste” ka Selatine], yo leina [Mokriste] le metšego go yena o ile a kwišwa bohloko bjo bogolo kudu nakong ya pušo ya Tiberio diatleng tša o mongwe wa babuši ba rena, e lego Pontio Pilato.”—The Complete Works of Tacitus (New York, 1942), “The Annals,” Puku 15, ser. 44.

The New Encyclopædia Britannica ge e bolela ka dipolelo tša pele tša histori tša bao e bego e se Bakriste tše di boletšwego ke Jesu, e re: “Dipego tše tše di ikemetšego di hlatsela gore mehleng ya kgale gaešita le manaba a Bokriste le ka mohla ga se a ka a belaela therešo ya histori ka Jesu, yeo go ilego gwa tšewa kgang ka yona la pele ka mabaka a sa kwalego ke bangwadi ba bantšinyana bofelong bja lekgolo la bo-18 le nakong ya lekgolo la bo-19, gaešita le mathomong a lekgolo la bo-20.”—(1976), Macropædia, Puku 10, letl. 145.

Na Jesu Kriste e be e le feela motho wa go loka?

Se se kgahlišago, ruri Jesu o ile a kgalemela motho yo a bego a mmitša ka sereto sa gore ‘Morutiši o Botse’ ka gobane Jesu o be a lemoga gore ga se yena, eupja ke Tatagwe yo e bego e le yo botse. (Mar. 10:17, 18) Lega go le bjalo, go bapa le seo batho gantši ba se bolelago ge ba bolela gore motho o lokile, ruri Jesu o swanetše go ba e be e le yo a rerešago. Ee, gaešita le manaba a gagwe a boletše gore o be a le bjalo. (Mar. 12:14) Yena ka noši o boletše gore o bile gona pele ga ge e ka ba motho, gore e be e le Morwa wa kgonthe wa Modimo, gore e be e le Mesia, yena yo go tla ga gagwe go bego go boletšwe e sa le pele Mangwalong ka moka a Sehebere. Le gona e be e se seo a bego a se boletše goba gaešita le go ba moferehli yo mobe, eupja ga go taba yeo e ka dumelelwago gore a lebelelwe e be e le feela ‘motho o botse.’—Joh. 3:13; 10:36; 4:25, 26; Luka 24:44-48.

Na Jesu e be e le feela moporofeta yo matla a gagwe a bego a swana le ao a Moše, Buddha, Mohammede le baetapele ba bangwe ba tsebjago kudu ba bodumedi?

Jesu ka noši o rutile gore e be e le Morwa wa kgonthe wa Modimo (Joh. 10:36; Mat. 16:15-17), Mesia yo a bego a boletšwe e sa le pele (Mar. 14:61, 62), gore o bile gona legodimong pele ga ge e ka ba motho (Joh. 6:38; 8:23, 58), gore o be a tla bolawa gomme ka morago a tsošetšwa bophelong ka letšatši la boraro, gomme go tloga moo o be a tla boela legodimong. (Mat. 16:21; Joh. 14:2, 3) Na dipolelo tše e be e le tša therešo gomme na o be a arogile e le ka kgonthe go baporofeta ka moka ba bangwe ba therešo ba Modimo, le go aroga o šoro go baetapele ka moka bao ba bego ba itirile ba bodumedi? Therešo ya taba e be e tla ba molaleng letšatšing la boraro go tloga lehung la gagwe. Na Modimo o ile a mo tsoša bahung e le go kgonthiša gore Jesu Kriste o be a boletše therešo, le gore e be e le Morwa wa therešo wa Modimo e le ka kgonthe? (Ba-Roma 1:3, 4) Dihlatse tše di ka fetago 500 di ile tša bona Jesu a phela e le ka kgonthe ka morago ga tsogo ya gagwe, gomme baapostola ba gagwe ba botegago e bile dihlatse tše di bonego ka mahlo ge a be a rotogela legodimong gomme a timelela pele ga mahlo a bona ka go khupetšwa ke leru. (1 Ba-Kor. 15:3-8; Dit. 1:2, 3, 9) Ba be ba kgodišegile ka ntle le pelaelo gore o be a tsošitšwe bahung, moo ba bantši ba bona ba ilego ba gafa maphelo a bona gore ba botše ba bangwe ka seo.—Dit. 4:18-33.

Ke ka baka la’ng ba-Juda ka kakaretšo ba se ba ka ba amogela Jesu e le Mesia?

Encyclopaedia Judaica e re: “Ba-Juda ba mehleng ya Roma ba be ba dumela gore [Mesia] o be a tla tšweletšwa ke Modimo go roba joko ya boheitene le go buša ka godimo ga mmušo wo o tsošološitšwego wa Isiraele.” (Jerusalem, 1971, Puku 11, kar. 1407) Ba be ba nyaka go hunollwa jokong ya Roma. Histori ya ba-Juda e hlatsela gore motheong wa boporofeta bja Mesia bjo bo ngwadilwego go Daniele 9:24-27, ruri go be go e-na le ba-Juda bao ba bego ba lebeletše Mesia nakong ya lekgolo la pele la nywaga Mehleng ya Rena. (Luka 3:15) Eupja boporofeta bjoo bo be bo bile bo kgomaganya go tla ga gagwe le ‘go fedišwa ga dikarogo,’ gomme Jesaya kgaolo ya 53 e be e bontšhitše gore Mesia ka noši o be a tla hwa e le gore a dire gore se se kgonege. Eupja ba-Juda ka kakaretšo ba be ba sa nyake gore motho o mongwe a hwele dibe tša bona. Ba be ba dumela gore ke bao ba lokilego pele ga Modimo ka baka la ge ba be ba e-tšwa go Aborahama. A Rabbinic Anthology e re, “[Matla] a Aborahama ke a magolo kudu moo a ka kgonago go boelanya makgopo ka moka a dirilwego le maaka a boletšwego ke ba-Isiraele lefaseng le.” (London, 1938, C. Montefiore le H. Loewe, letl. 676) Ba-Juda ka go gana ga bona Jesu e le Mesia, ba ile ba phetha boporofeta bjo bo boletšwego e sa le pele mabapi le yena: “Ó nyaditšwe bo-ka moxerulwa; xa r’a ka ra mo re selô.”—Jes. 53:3.

Moše pele ga lehu la gagwe o ile a bolela gore setšhaba se be se tla furalela borapedi bja therešo le gore ka baka la se, ruri madimabe a be a tla se wela. (Bala Doiteronomio 31:27-29.) Puku ya Baahlodi e hlatsela gore se se ile sa direga gantši. Mehleng ya moporofeta Jeremia, ruri go se botege ga setšhaba go ile gwa se dira gore se išwe bothopja Babele. Ke ka baka la’ng Modimo a ile a dumelela le ka ba-Roma gore ba senye Jerusalema le tempele ya yona ka 70 Mehleng ya Rena? Setšhaba se be se e-na le molato ofe wa go se botege moo Modimo a ilego a se ke a se šireletša, go etša ge a be a dirile nakong ya ge se be se mmotile? E bile gatee-tee pele ga se moo ba ilego ba gana Jesu e le Mesia.

Na Jesu Kriste ruri ke Modimo?

Joh. 17:3: “[Jesu o ile a rapela Tatagwe ka gore:] Bophêlô byo bo sa felexo ké xe ba Xo tseba, Wene Modimo-dimo [“wa therešo,” RS; “wene Modimo e le ka kgonthe,” NE] Ò le nnoši. Ba tsebê le Moromiwa wa xaxo Jesu Kriste.” (Hlokomela gore Jesu ga a bolele ka yena ka noši, eupja o bolela ka Tatagwe wa legodimo e le ‘Modimo o nnoši wa therešo.’)

Joh. 20:17: “Jesu a bolêla naê [Maria Magdalena] a re: Se nthswarê; xobane ke sa tlo rotoxêla xo Tate. Sepela O yê xo bana bešo, O ba botšê O re: Ke rotoxêla xo Tate, le xo Tata-weno, xo Modimo wa-ka, le xo Modimo wa lena.” (Ee, go Jesu yo a tsošitšwego, Tate e be e le Modimo, go etša ge Tate e be e le Modimo go Maria Magdalena. Se se kgahlišago, ruri Mangwalong ga go na moo re hwetšago Tate a bolela Morwa e le “Modimo wa-ka.”)

Bona le matlakala 115, 120, 121 ka tlase ga hlogo ya ditaba ya “Boraro Botee.”

Na Johane 1:1 e hlatsela gore Jesu ke Modimo?

Joh. 1:1: “Mathomong E A bexo a le xôna ké Yêna LENTŠU. Xomme Yêna LENTŠU ó be a le xo Modimo. Xomme Yêna LENTŠU e be e le Modimo.” [Gape le RS, KJ, JB, Dy, Kx, NAB].” NE e balega ka gore “seo Modimo a bego a le sona, le Lentšu o be a le sona.” Mo e re “Logos e be e le seka-modimo.” AT le Sd di re botša gore “Lentšu e be e le seka-modimo.” Mmalo wa lentšu ka lentšu wa ED o re “modimo e be e le Lentšu.” NW e balega ka gore “Lentšu e be e le modimo”; NTIV e diriša mantšu a swanago.

Ke’ng seo bafetoledi ba se bonago lengwalong la Segerika seo se dirago ba bangwe ba bona gore ba lese go bolela gore “Lentšu e be e le Modimo”? Lebopi-kgetho (ho) le tšwelela pele ga go tšwelela ga pele ga the·osʹ (Modimo) eupja e sego go tšwelela ga bobedi ga yona. Ge pele ga leina-ntšu le šupa go tsebja, ge go se be gona ga lebopi go bontšha leina-ntšu pele ga lediri (go etša ge lefoko le agwa ka Segerika) leo le šupago boemo ka motho o mongwe. Ka gona lengwalo ga le bolele gore Lentšu (Jesu) e be e le yena Modimo yo le bego le e-na le yena, eupja go e na le moo le bolela gore Lentšu e be le seka-modimo, e le modimo. (Bona kgatišo ya 1984 ya Ditšhupetšo ya NW, letl. 1579.)

Moapostola Johane o be a bolela’ng ge a be a ngwala Johane 1:1? Na o be a bolela gore Jesu ka noši ke Modimo, goba gore Jesu ke Modimo o tee le Tate? Kgaolong yona yeo, go Joh 1 temana ya 18 Johane o ngwadile gore: “Xa xo e a [“ga go motho,” KJ, Dy] bilexo a bôna Modimo le neng, wa xo re bea seetšeng ké Yêna Morwa-motswalwa-esi [“modimo yo a tswetšwego a nnoši,” NW], e a lexo difarong tša Tata’xwe.” Na go na le motho yo a kilego a bona Jesu Kriste, yena Morwa? Ee! Ka gona, na Johane o be a bolela gore Jesu ke Modimo? Ruri, o be a sa bolele bjalo. Johane go ya mafelelong a Ebangedi ya gagwe o akareditše ditaba ka gore: “Tšeo di ngwadilwe gore le dumele gobane Jesu ke Kriste, [e sego Modimo, eupja] Morwa wa Modimo.”—Joh. 20:31, PK.

Na go makala ga Tomase mo go lego go Johane 20:28 go hlatsela gore Jesu ke Modimo e le ka kgonthe?

Johane 20:28 e balega ka gore: “Tomase a fetola a re: Morêna wa-ka! Modimo wa-ka!”

Ga go na kganetšo tabeng ya go bolela Jesu e le “Modimo,” ge e ba se e be e le seo Tomase a bego a gopola ka sona. Se se be se tla dumelelana le go tsopolwa moo go dirilwego ke Jesu ga Psalme yeo go yona banna ba matla, e lego baahlodi ba bego ba bitšwa “medimo.” (Joh. 10:34, 35, PK; Ps. 82:1-6, PK) Ee, Kriste o madulong a phagamego kudu go feta a banna ba bjalo. Ka baka la go ba ga kgonthe ga madulo a gagwe tswalanong le Jehofa, ruri go Johane 1:18 (NW) Jesu o bolelwa e le “modimo yo a tswetšwego a nnoši.” (Bona gape le Ro, By.) Jesaya 9:5 le yona e hlalosa Jesu ka mokgwa wa boporofeta e le “Modimo yo matla,” eupja e sego Modimo Ra-matla-ohle. Se ka moka se dumelelana le go ba ga Jesu e le yo a hlaloswago e le “modimo” goba “seka-modimo” go Johane 1:1 (NW, AT).

Lengwalo le re thuša gore re bone ditaba gabotse go tšwa go se. Gatee-tee pele ga lehu la Jesu, ruri Tomase o be a kwele thapelo ya Jesu yeo go yona a bego a biditše Tatagwe gore ke ‘Modimo o nnoši wa therešo.’ (Joh. 17:3) Jesu ka morago ga tsogo ya gagwe o be a ile a romela molaetša go baapostola ba gagwe go akaretša Tomase, woo go wona a bego a itše: “Ke rotoxêla xo . . . Modimo wa-ka le xo Modimo wa lena.” (Joh. 20:17) Moapostola Johane ka morago ga go ngwala seo Tomase a ilego a se bolela ge a bone le ge a swara e le ka kgonthe Kriste yo a bego a tsošitšwe, o itše: “Tše di ngwadilwexo ké tša xore Le dumêlê xe Jesu è le Yêna Kriste, le xore ka xo dumêla Le bê le bophelô ’ineng la xaxwe.” (Joh. 20:31) Ka gona, ge e ba motho o mongwe a ka fetša ka go bolela ka lebaka la polelo ya Tomase gore Jesu ka noši ke ‘Modimo o nnoši wa therešo’ goba gore Jesu ke “Modimo-Morwa” wa Boraro botee, gona o swanetše gore a ele hloko gape seo Jesu ka noši a se boletšego (Joh 20 tem. 17) le mantšu a mafelelo ao a boletšwego gabotse ke moapostola Johane (Joh 20 tem. 31).

Na Mateo 1:23 e bontšha gore Jesu ge a be a le lefaseng e be e le Modimo?

Mat. 1:23: “Bônang, kxarebê e tlo ima, ya bêlêxa morwa; ba tlo mo rea leina la Imanuele, xe le fetolwa ké xo re: Modimo ó na le rena.”

Morongwa wa Jehofa ge a be a tsebiša ka go belegwa mo go tlago ga Jesu, ruri na o ile a bolela gore ngwana e be e tla ba Modimo ka noši? Aowa, tsebišo e bile ya gore: “Yêna-eo e tlo ba e moxolo, ó tlo bitšwa Morwa wa Yo-xodimo-dimo.” (Luka 1:32, 35; mongwalo wo o sekamego o okeditšwe.) Jesu le ka mohla ga se a ka a ipolela gore ke Modimo, eupja go e na le moo o itše ke “Morwa wa Modimo.” (Joh. 10:36; mongwalo wo o sekamego o okeditšwe.) Jesu o be a rometšwe lefaseng ke Modimo; ka gona ka Morwa yo yo a tswetšwego a nnoši, ruri Modimo o be a e-na le batho.—Joh. 3:17; 17:8.

E be e se mo go se gwa tlwaelwago gore maina a Sehebere a akaretše ka go ona lentšu Modimo goba gaešita le sebopego se se khutsufaditšwego sa leina leo e lego la Modimo. Ka mohlala, leina Eliatha le bolela gore “Modimo O Tlile”; leina Jehu le bolela gore “Jehofa Ke Yena”; leina Eliya le bolela gore “Modimo Wa-ka Ke Jehofa.” Eupja ga go leina le letee la maina a leo le bontšhago gore mong wa lona e be e le Modimo ka noši.

Johane 5:18 e bolela’ng?

Joh. 5:18: “Ké tšôna tše Ba-Juda ba mo hloetšexo tšôna ka xo fetiša ba rata xo mmolaya, ba re: Ó re xo xoboša Sabatha, a buša a re Modimo ké Tat’axwe ka sebele, a itekanya le Modimo.”

E be e le ba-Juda bao ba sa dumelego bao ba bego ba bolela gore Jesu o leka go itira yo a lekanago le Modimo, ka go bolela Modimo e le Tatagwe. Gaešita lege a be a bolela ka tshwanelo Modimo e le Tatagwe, ruri Jesu le ka mohla ga se a ka a ipolela a lekana le Modimo. O ile a araba ba-Juda ka go se dika-dike, ka gore: “Ruri, ruri, ke a Le botša, xa xo se Morwa a kxônaxo xo se dira ka la xaxwe; xobane tše Tat’axwe a di diraxo ké tšôna tše le Morwa a di diraxo.” (Joh. 5:19; bona gape le Johane 14:28; Johane 10:36.) Le gona e be e le bona ba-Juda bao ba go se dumele bao ba boletšego gore Jesu o roba Sabatha, eupja le ka yona taba ye ba be ba phošitše. Jesu o hlomphile Molao e le ka kgonthe gomme o ile a bolela gore: “Xo dumeletšwe xo dira botse ka Sabatha.”—Mat. 12:10-12.

Na therešo ya gore borapedi bo newa Jesu e hlatsela gore ke Modimo?

Go Ba-Hebere 1:6, barongwa ba laelwa go “rapela” Jesu, ka go ya kamoo go lego ka gona go RS, TEV, KJ, JB le NAB. Beibele ya Sepedi ya Phetolelo ya Kgale gotee le NW di re “khunamela.” Go Mateo 14:33, barutiwa ba Jesu ba bolelwa gore ba ile ba “mo rapela,” ka go ya ka RS, TEV, KJ; diphetolelo tše dingwe di bolela gore ba ile ba “mo hlompha” (NAB), “ba mo khunamela” (JB), “ba wela maotong a gagwe” (NE), “ba tla ba mo khunamela” (Beibele ya Sepedi go Phetolelo ya Kgale le NW).

Lentšu la Segerika le le bolelago go “rapela” ke pro·sky·neʹo, leo A Greek-English Lexicon of the New Testament and Other Early Christian Literature e bolelago gore le be le “dirišwa go bontšha mokgwa wa ge motho a khunama pele ga motho o mongwe gomme a atla dinao tša gagwe, morumo wa seaparo sa gagwe le mmu.” (Chicago, 1979, Bauer, Arndt, Gingrich, Danker; kgatišo ya bobedi ya Seisemane; letl. 716) Le ke lentšu le le dirišitšwego go Mateo 14:33 go bontšha seo barutiwa ba ilego ba se dira go Jesu; go Ba-Hebere 1:6 go bontšha seo barongwa ba swanetšego go se dira go Jesu; go Genesi 22:5 ka go Septuagint ya Segerika go hlalosa seo Aborahama a ilego a se dira go Jehofa le go Genesi 23:7 go hlalosa seo Aborahama a ilego a se dira ka go dumelelana le mokgwa wa nakong yeo go batho bao a bego a rekelana le bona; go 1 Dikxoši 1:23 ka go Septuagint go hlalosa seo moporofeta Nathane a ilego a se dira ge a e-tla go Kgoši Dafida.

Jesu go Mateo 4:10 o itše: “O khunamêlê [e tšwago go pro·sky·neʹo] [Jehofa] Modimo wa xaxo, O dirêlê Yêna a nnoši!” (Go Doiteronomio 6:13, PK yeo Jesu mo a bego a e tsopola e le ka kgonthe, go tšwelela leina la Modimo, e lego Tetragrammaton.) Ka go dumelelana le se, ruri re swanetše go kwešiša gore ke pro·sky·neʹo gotee le kgopolo e itšego ya pelo le mogopolo yeo e swanetšego go lebišwa go Modimo feela.

Na mehlolo e dirilwego ke Jesu e hlatsela gore ke Modimo?

Dit. 10:34, 38: “Petro a ahlama a bolêla a re: . . . Ké taba ya Jesu wa Natsaretha, Yo Modimo a mo tloditšexo ka Môya-mokxêthwa le ka matla, a tšama a sétša batho, a fodiša bohle ba xo katakêlwa ke Diabolo, xobane Modimo ó be a na le Yêna.” (Petro ka baka la mehlolo yeo a bego a e bone ruri ga se a ka a phetha ka go bolela gore Jesu e be e le Modimo, eupja go e na le moo o boletše gore Modimo o be a e-na le Jesu. Bapiša le Mateo 16:16, 17.)

Joh. 20:30, 31, PK: “Jesu a dira le dipontšho [“mehlolo,” TEV, Kx] tše dingwe tše ntši pele ga barutiwa ba gagwe tše di sa ngwalwago pukung ye. Gomme tšeo di ngwadilwe gore le dumele gobane Jesu ke Kriste, Morwa wa Modimo le gore ka go dumela le be le bophelo leineng la gagwe.” (Ka gona, seo re swanetšego go phetha ka go se bolela ka tshwanelo mabapi le mehlolo, ke gore Jesu ke “Kriste,” e lego Mesia, “Morwa wa Modimo.” Polelo “Morwa wa Modimo” e fapane kudu le “Modimo-Morwa.”)

Baporofeta ba pele ga Bokriste ba swanago le Eliya le Elisa ba ile ba dira mehlolo e swanago le yeo ya Jesu. Fela seo ruri ga se bohlatse bja gore e be e le bo-Modimo.

Na Jesu ke selo setee le Jehofa “Testamenteng ya Kgale”?

Bona matlakala 211, 212 tlase ga hlogo e kgolo ya ditaba ya “Jehofa.”

Na go dumela go Jesu Kriste ke sona feela seo se nyakegago gore re phološwe?

Dit. 16:30-32: “Marêna! E ka kxôna ke dirê bya’ng xore ke phološwê? Bôná [Paulo le Silase] ba re: Dumêla Morêna Jesu Kriste; ké mo O tl’o xo phološwa le ba ntlô ya xaxo. Ba mmotša Lentšu la Modimo [“molaetša wa Modimo,” AT] à n’e ba ntlo ya xaxwe.” (Na ‘go dumela ga monna yoo Morena Jesu’ e be e le feela taba ya go bolela ga gagwe ka go kgonthiša gore o a dumela? Paulo o bontšhitše gore go be go nyakega se sengwe se segolo; e lego go dumela le go amogela Lentšu la Modimo ka ge Paulo le Silase ba be ba tšwela pele go le bolela go mohlapetši wa kgolego. Na go dumela ga motho go Jesu go be go ka ba ga kgonthe ge e ba a be a sa rapele Modimo yoo Jesu a bego a mo rapela, ge e ba a be a sa diriše seo Jesu a se rutilego ge e le ka batho bao e swanetšego go ba barutiwa ba gagwe, goba ge e ba a be a sa dire modiro woo Jesu a bego a laetše balatedi ba gagwe go o dira? Re ka se ke ra hwetša phološo; e hwetšwa feela motheong wa go dumela mohola wa sehlabelo sa bophelo bja motho bja Jesu. Eupja maphelo a rena a swanetše go dumelelana le tumelo yeo re bolelago gore re na le yona, gaešita lege seo se ka akaretša mathata. Jesu go Mateo 10:22 o itše: “E a tlo xo kxôtlêlêla xo iša bofelong, ké yêna a tl’o xo phološwa.”)

Na Jesu o be a ile a ba gona pele legodimong pele ga ge a ka ba motho?

Ba-Kol. 1:15-17: “[Jesu] ké Yêna seswanthšô sa Modimo e a sa bonwexo, tháka-letswálô yá dibopya tšohle. . . . Ka moka di hlodilwe ke Yêna, di hloletšwe Yêna. Ké Yêna Mo-ba-xôna wa mola lexohle le sešô la ba xôna.”

Joh. 17:5: “[Jesu ge a rapela o itše:] Nea Nna letaxô, Wene Tata, kè le kxaufsi le Wene, ka letaxô le ke bexo ke na nalô’ kè na naxô’ mola lefase lè sešo la ba xôna.” (Gape le Johane 8:23)

Na Jesu o na le mmele wa gagwe wa nama legodimong?

1 Ba-Kor. 15:42-50: “Le xo tsoxa xa bahu xo byalo. Xo byalwa mmele o bôlaxo; xo tlo tsoxa wo o sa bolexo. . . . O byalwa ò fôkôla; o tlo tsoxa e le wa matla. . . . Byalo ka xe xo ngwadilwe xwa thwe: Motho wa pele, Adama, a napa a ba môya o phelaxo, le Adama [Jesu Kriste, yo e bego e le motho yo a phethagetšego go etša ge Adama a be a le bjalo mathomong] wa mafêlêlô Yêna ke môya (spirit) wo o phedišaxo. . . . Se nna ke se bolêlaxo Bana bešo, ke re: Nama le madi xa se tšôna di tl’o xo ja lefa mmušong wa Modimo. Le tša xo bôla di ka se je lefa la tše di sa bolexo.” (Mongwalo o sekamego o okeditšwe.)

1 Pet. 3:18, NW: “Le yena Kriste o hwile gatee ya ba moka bakeng sa dibe . . . o bolailwe nameng, eupja a phedišwa moyeng (spirit) [“moyeng,” NE, AT, JB, Dy].” (Bona letlakala 334.)

Seswantšho: Ge e ba motho a lefa mogwera wa gagwe molato, eupja a re gatee-tee a tšea tšhelete yeo, gona molato o tla dula o le gona. Ka mokgwa o swanago, Jesu ge nkabe a re ka nako yeo a bego a tsošwa ka yona a tšee gape mmele wa gagwe wa nama le madi woo a bego a o gafetše gore e be theko ya topollo, gona seo nkabe se bile le mohola ofe tokišetšong yeo a bego a e dira ya go imolla batho ba ba botegago molatong wa sebe?

Ke therešo gore Jesu o ile a tšwelela ka mmele wa nama go barutiwa ba gagwe ka morago ga tsogo ya gagwe. Eupja dinakong tše dingwe, ruri ke ka baka la’ng ba ile ba se ke ba thoma ka go mo tseba? (Luka 24:15-32; Joh. 20:14-16) Jesu ka nako e nngwe gore a tle a hole Tomase yo a bego a belaela, ruri o ile a tšwelela ka mmele wa nama wo o bego o e-na le mabadi a dipikiri diatleng tša gagwe le ntho e bego e dirilwe ke lerumo ka lehlakoreng la gagwe. Eupja go ile gwa kgonega bjang nakong yeo go yena gore a tšwelele gatee-tee gare ga bona gaešita lege mejako e be e tswaletšwe? (Joh. 20:26, 27) Jesu ruri o ile a ikapeša ka mebele ya nama dinakong tše go etša ge barongwa ba be ba dira nakong e fetilego ge ba be ba tšwelela bathong. Go senya mmele wa Jesu wa nama nakong ya tsogo ya gagwe go be go sa thatafalele Modimo. Se se kgahlišago ke gore gaešita lege mmele wa nama o be o se wa tlogelwa ke Modimo ka lebitleng (mo gongwe gore a matlafatše tumelo ya barutiwa ya gore Jesu o be a tsošitšwe e le ka kgonthe), fela mašela ao a bego a o tatile a be a tlogetšwe moo; eupja Jesu yo a bego a tsošitšwe o ile a tšwelela gantši a apere e le ka kgonthe.—Joh. 20:6, 7.

Na Jesu Kriste ke motho o tee le Mikaele morongwa o mogolo?

Leina la Mikaele yo le tšwelela ka makga a mahlano feela ka Beibeleng. Motho yo a tagafaditšwego wa moya yo a bitšwago ka leina le o bolelwa e le “e mongwê wa balaodi ba baxolo,” “kxoši e kxolo ye e tl’o xo êmêla ba sethšaba sa xeno [sa gabo Daniele]” le “morongwa e moxolo.” (Dan. 10:13; 12:1; Juda 9) Mikaele e bolela gore “Ke Mang Yo a Swanago Le Modimo?” Leina gabotse-botse le bontšha Mikaele e le motho yo a etelelago pele tabeng ya go thekga bogoši bja Jehofa le go senya manaba a Modimo.

Taelo ya Jesu Kriste go 1 Ba-Thesalonika 4:16 yeo e laelago gore tsogo e thome, e hlaloswa e le “kxowa ya morongwa-moxolo,” gomme Juda 9 e bolela gore morongwa o mogolo ke Mikaele. Na e tla ba mo go swanetšego go swantšha mokgoši o laelago wa Jesu le woo wa motho yo a lego ka tlase? Aowa, ka gobane Mikaele yo e lego morongwa o mogolo ke yena Jesu Kriste. (Se se kgahlišago ke gore lentšu “morongwa-moxolo” le ka mohla ga se la ka la hwetšwa le le ka bontši Mangwalong, e lego seo se bontšhago gore go na le ka o tee feela.)

Kutollo 12:7-12 e bolela gore Mikaele le barongwa ba gagwe ba be ba tla lwa le Sathane gomme ba mo leleke gotee le barongwa ba gagwe ba babe legodimong, nakong ya ge matla a bogoši a be a tla ba a newa Kriste. Jesu ka morago o bolelwa e le yo a eteletšego madira a legodimo pele go ya ntweng ya go lwa le ditšhaba tša lefase. (Kut. 19:11-16) Na ga se mo go kwalago gore Jesu e tla ba ya ba motho yo a tlago go gata mogato malebana le motho yo a mo hlalosago e le “mmuši wa lefase lé,” e lego Sathane Diabolo? (Joh. 12:31) Daniele 12:1 e kgomaganya ‘go ema ga Mikaele’ gore a diriše matla gotee le ‘lebaka la ditlaišego tšeo go sešogo gwa ka gwa ba le tše bjalo go tloga mola batho ba bago gona.’ Se ruri se be se tla swanela seo ditšhaba di bego di tla se bona nakong ya ge Kriste yo e lego moahlodi wa legodimo a gata mogato malebana le tšona. Ka gona, bohlatse bo bontšha gore Morwa wa Modimo o be a tsebja e le Mikaele pele ga ge a ka tla lefaseng gomme e bile o tsebja ka leina lona leo ga e sa le go tloga ge a boetše legodimong, moo a dutšego gona e le Morwa yo a tagafaditšwego wa moya wa Modimo.

Ge e ba o Mongwe a Bolela Gore

‘Ga o dumele Jesu’

Mo gongwe o ka araba ka gore: ‘Ruri o motho yo a dumelago Jesu. Ee, le nna ke a mo dumela; ge e ba go be go se bjalo, gona nkabe ke se ka tla mo legaeng la gago lehono.’ Mo gongwe o ka oketša ka gore: ‘Ge e le gabotse, bohlokwa bja go dumela go Jesu bo bontšhwa kudu dipukung tša rena. (Phetla kgaolo e swanetšego ka pukung lege e le efe yeo o e sepedišago gomme o diriše ye e le motheo wa poledišano, gomme o bolele kudu ka karolo ya Jesu e le Kgoši. Goba bala seo se bolelwago letlakaleng la 2 la Morokami mabapi le morero wa makasine.)’

Goba o ka re: ‘Na o ka belaela ge e ba nka go botšiša lebaka leo ka lona o naganago ka tsela yeo?’

Tsela e nngwe ya go araba: ‘Go molaleng gore motho o mongwe o go boditše seo, eupja anke ke re seo ga se bjalo e le ka kgonthe, ka gobane re na le tumelo e tiilego kudu go Jesu Kriste.’ Mo gongwe o ka oketša ka gore: (1) ‘Fela ga re dumele dilo tšohle tšeo batho ba di bolelago ka Jesu. Ka mohlala, ba bangwe ba bolela gore e be e le feela motho wa go loka, e sego Morwa wa Modimo. Ga re dumele seo, na wena o a se dumela? . . . Se ga se seo Beibele e se rutago.’ (2) ‘Ga re dumele dithuto tša dihlopha tšeo di ganetšago seo Jesu ka noši a se boletšego ka tswalano ya gagwe le Tatagwe. (Joh. 14:28) Tatagwe ke yena a mo neilego matla ao a kgomago maphelo a rena ka moka lehono. (Dan. 7:13, 14)’

‘Na o amogela Jesu e le Mophološi wa gago?’

Mo gongwe o ka araba ka gore: ‘Beibele e bolela seo ka mo go kwalago . . . (tsopola Ditiro 4:12). Ke dumela seo. Fela ke ithutile le gore boikarabelo bjo bogolo bo sepedišana le seo. Ka mokgwa o bjang? Ee, ge e ba ke dumela Jesu, gona nka se ke ka dumela go yena feela ge se e le seo se bonalago se swanetše.’ Mo gongwe o ka oketša ka gore: ‘Bophelo bja gagwe bjo bo phethagetšego bjo bo gafilwego bo dira gore go kgonege go rena go lebalelwa dibe. Eupja ke tseba gore e bile ke gabohlokwa go ela hloko ditaelo tša gagwe mabapi le boikarabelo bja rena ka ge re le Bakriste. (Dit. 1:8; Mat. 28:19, 20)’

Goba o ka re: ‘(Ka morago ga ge o kgonthišitše therešo ya gore o dumela Jesu e le Mophološi yo e sego wa gago feela, eupja e le wa bao ka moka ba dumelago go yena . . . ) Ke gabohlokwa gore re amogele ka tebogo e sego feela seo a se dirilego nakong e fetilego, eupja re amogele le ka seo a se dirago mo nakong ye. (Mat. 25:31-33)’

‘Ke amogetše Jesu e le Mophološi wa-ka’

Mo gongwe o ka araba ka gore: ‘Ke thabela go kwa gore o dumela go Jesu, ka gobane go na le batho ba bantši kudu lehono bao ba sa elego hloko le gatee seo Jesu a re diretšego sona. Wena ka ntle le pelaelo o tseba gabotse lengwalo la Johane 3:16, na ga go bjalo? . . . Eupja batho ba bjalo ba tla phela kae ka mo go sa felego? Ba bangwe ba tla ba le Kriste legodimong. Eupja na Beibele e bontšha gore batho ka moka ba ba lokilego ba ya moo? (Mat. 6:10; 5:5)’