Bakorinthe ba Pele

10 Banabešo, ke nyaka gore le tsebe gore borakgolokhukhu ba rena ka moka ba ile ba sepela ka tlase ga leru+ ebile ba tshetše lewatle.+ 2 Ba ile ba kolobetšwa gore e be balatedi ba Moshe ge ba be ba le ka tlase ga leru le ge ba be ba le lewatleng. 3 Ka moka ba jele dijo tše di swanago tšeo di tšwago go Modimo.+ 4 Ba be ba enwa meetse a swanago ao a tšwago go Modimo,+ ka gobane meetse ao a be a etšwa godimo ga leswika leo le bego le ba šala morago. Leswika leo le be le emela Kriste.+ 5 Ba bantši ba bona ba ile ba dira dilo tšeo di sa kgahlego Modimo, ka baka leo o ile a ba bolaela lešokeng.+

6 Re ka ithuta dilong tše e le gore re se ke ra dira dilo tše swanago.+ 7 Le se ke la rapela medimo ya diswantšho go swana le ba bangwe ba bona. Go etša ge mangwalo a re: “Batho ba dula, ba ja ba ba ba nwa gomme ba ipshina.”+ 8 Re se ke ra itshwara gampe ka tša thobalano* go swana le ba bangwe ba bona, ka gobane go ile gwa hwa ba 23 000 ba bona ka letšatši letee.+ 9 Re se ke ra leka Jehofa*+ go swana le ba bangwe ba bona ka gobane ba ile ba longwa ke dinoga gomme ba hwa.+ 10 Le se ke la ngongorega go etša ge ba bangwe ba bona ba ile ba ngongorega+ gomme ba bolawa ke morongwa wa Modimo.+ 11 Dilo tšeo di ngwaletšwe gore re ithute go tšona le go lemoša rena+ bao re phelago mehleng ye ya bofelo.*

12 Ka gona motho yo mongwe le yo mongwe yo a naganago gore o eme a hlokomele gore a se ke a wa.+ 13 Ga go na moleko wo o le welago wo o sa kago wa wela batho ba bangwe.+ Eupša Modimo o a botega, a ka se le dumelele le lekwa go feta ka mokgwa wo le ka kgonago go kgotlelela ka gona.+ Ge le lekwa, Modimo o tlo le thuša gore le kgone go kgotlelela.+

14 Ka gona banabešo ba rategago, ralokelang kgole le medingwana ya diswantšho.+ 15 Ke bolela le lena bjalo ka batho bao ba nago le tlhaologanyo, ka gona itireleng phetho ya ge eba dilo tšeo ke di bolelago e le nnete. 16 Na komiki ya tšhegofatšo yeo re e rapelelago ga e dire gore re holwe ke madi a Kriste?+ Na senkgwa seo re se ngwathaganyago ga se dire gore re holwe ke mmele wa Kriste?+ 17 Go na le senkgwa setee, ka gona le ge re le ba bantši re mmele o tee,+ ka gobane ka moka ga rena re ja senkgwa seo setee.

18 Naganang ka Baisiraele. Na ge ba be ba eja dihlabelo tšeo di neelwago aletareng go be go sa swane le ge ba be ba eja le Modimo?+ 19 Na ke ra gore medingwana le dihlabelo tšeo di neetšwego medingwana di bohlokwa? 20 Aowa, ke ra gore dihlabelo tšeo batho ba ditšhaba ba di dirago ba di direla matemona e sego Modimo,+ le gona ga ke nyake gore le dirišane le matemona.+ 21 Le ka se nwe ka “komiking ya Jehofa” la ba la nwa ka komiking ya matemona. Le ka se jele “tafoleng ya Jehofa”+ la ba la jela tafoleng ya matemona. 22 Na re nyaka go dira gore Jehofa a be le mona?+ Na re mo feta ka maatla?

23 Dilo ka moka di dumeletšwe, eupša ga se dilo ka moka tšeo di holago. Dilo ka moka di dumeletšwe, eupša ga se dilo ka moka tšeo di agago.+ 24 Tšwelang pele le dira dilo tšeo di holago ba bangwe e sego tšeo di holago lena feela.+

25 Ejang nama le ge e le efe yeo e rekišwago mmarakeng. Ge e ba le kgetha go ja nama yeo, matswalo a lena ga se a swanela go le tshwenya. 26 Ka ge re tseba, “lefase ke la Jehofa le dilo ka moka tšeo di lego go lona.”+ 27 Ge e ba motho yo e sego Mokriste a ka le mema dijong gomme la ya, le je selo se sengwe le se sengwe seo a le fago sona. Le se ke la botšiša selo e le gore matswalo a lena a se ke a le tshwenya. 28 Eupša ge motho yo mongwe a ka re: “Nama ye e be e neetšwe medimo ya diswantšho,” le se ke la eja gore le se ke la gobatša letswalo la gagwe le a ba bangwe.+ 29 Ga ke bolele ka letswalo la lena, eupša ke bolela ka letswalo la motho yo mongwe. Le ge ke dira dilo tšeo ke di ratago, ga ke nyake go ahlolwa go ya ka letswalo la motho yo mongwe.+ 30 Ge e ba nka leboga Modimo+ ka baka la dijo tšeo a nneilego tšona, goreng batho ba bangwe ba swanetše go nkahlola ge ke di ja?

31 Ka gona go sa šetšwe gore le a ja, le a nwa goba le dira selo le ge e le sefe, dirang dilo ka moka gore le tumiše Modimo.+ 32 Le se ke la kgopiša motho, e ka ba Bajuda, Bagerika goba batho bao ba lego ka phuthegong ya Modimo.+ 33 Le nna ke leka go dira sona seo, ke leka go thabiša batho ka dilo ka moka tšeo ke di dirago. Ga ke nyake dilo tšeo di holago nna ke nnoši,+ eupša ke nyaka dilo tšeo di holago batho ba bantši e le gore Modimo a tle a ba phološe.+