Baroma

12 Banabešo, ka ge Modimo a le gaugetše, ke kgopela gore le neele mebele ya lena+ le maphelo a lena bjalo ka sehlabelo se sekgethwa+ seo Modimo a ka se amogelago, le gona le šomiše mabjoko a lena ka moka ge le dutše le hlankela Modimo.+ 2 Le se ke la ekiša batho ba lefase le,* eupša fetogang ka go fetoša tsela yeo le naganago ka yona+ e le gore le kgone go kwešiša+ dilo tšeo Modimo a nyakago le di dira, e lego dilo tše dibotse, tšeo di phethagetšego le tšeo di mo kgahlago.

3 Ka ge Modimo a mpontšhitše botho bjo bogolo, ke eletša yo mongwe le yo mongwe wa lena gore a se ke a ipona a le bohlokwa kudu,+ eupša yo mongwe le yo mongwe a nagane gabotse go ya ka tumelo yeo Modimo a mo filego yona.+ 4 Mmele o na le ditho tše dintši,+ eupša ditho tšeo tša mmele ga di dire mošomo o tee, 5 le ge re le ba bantši, re mmele o tee ka gobane re batee le Kriste, re ditho tša mmele o tee ebile re a hlokana.+ 6 Ka moka ga rena re na le dimpho tša go fapafapana tšeo Modimo a re filego tšona go ya ka botho bja gagwe bjo bogolo.+ Bjale ge e ba re na le mpho ya go porofeta a re porofeteng go ya ka tumelo yeo re nago le yona. 7 Ge e ba re kgona go thuša batho ba bangwe a re ba thušeng, yo a kgonago go ruta a a rute.+ 8 Yo a kgonago go kgothatša a a tšwele pele a kgothatša ba bangwe,+ yo a nago le mpho ya go fa a tšwele pele a efa,+ yo a etelelago pele a dire bjalo ka mafolofolo,+ yo a gaugelago ba bangwe, a a ba gaugele ka pelo e tšhweu.+

9 Le se ke la itira eka le rata batho,+ eupša ba rateng ka nnete go tšwa pelong. Hloyang se sebe+ le dule le dira se sebotse. 10 Ratanang kudu go swana le kamoo bana ba motho ba ratanago ka gona. Yo mongwe le yo mongwe wa lena a etelele pele tabeng ya go hlompha batho ba bangwe.+ 11 Šomang ka thata, le se ke la tšwafa.+ Dumelelang moya o mokgethwa o dira gore le be le mafolofolo+ le be le šomeleng Jehofa* ka dipelo tša lena ka moka.+ 12 Thabang ka baka la kholofelo yeo le nago le yona, kgotlelelang le ge le na le mathata+ ebile le dule le rapela.+ 13 Thušang banababo lena* ka dilo tšeo ba di hlokago.+ Dulang le nyaka menyetla ya go amogela baeng.*+ 14 Tšwelang pele le kgopela Modimo gore a šegofatše batho bao ba le tlaišago,+ ebile le se ke la bolela gampe ka bona.+ 15 Thabang le bao ba thabago, le lle le bao ba llago. 16 Lebelelang batho ba bangwe ka tsela yeo le lena le itebelelago ka yona,* le se ke la ipona le le bohlokwa go feta batho ba bangwe,* go e na le moo le ikokobetšeng.+ Le se ke la ipona okare le bohlale go feta batho ba bangwe.+

17 Le se ke la itefeletša.+ Dirang dilo tšeo batho ka moka ba di bonago di lokile. 18 Ge e ba go kgonega, dirang sohle seo le ka se kgonago gore le be le khutšo le batho ka moka.+ 19 Banabešo ba ba rategago, le se ke la itefeletša, eupša tlogelelang Jehofa gore a bontšhe bogale bja gagwe+ go etša ge Mangwalo a re: “Ke nna ke lefetšago le go otla batho ba babe.”+ 20 Bjale “ge e ba lenaba la gago le swerwe ke tlala, le fe dijo, ge e ba le nyorilwe, le fe sa go nwa. Ka gobane ge o dira bjalo le ka lewa ke dihlong gomme la fetoga, gwa ba bjalo ka ge eka o kgobelela magala hlogong ya lona.”*+ 21 Tšwela pele o dira dilo tše dibotse le ge batho ba go dira dilo tše mpe, ge o dira bjalo o tla be o fenya bobe ka botse.+