Tsoma Khutšo Ya Kgonthe Gomme O E Phegelele!
“E a kxahlwaxo ké bophelô, a rata xo bôna matšatši a tše botse, . . . a a kxaoxanê le tše mpe, a dirê tše botse; a nyakê moláô a o kxanyêlêlê.” —1 PETRO 3:10, 11.
1. Ke mantšu afe a tumilego a Jesaya ao a tlago go atlega ka mo go kgonthišeditšwego?
“KÉ MO ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tlo xo tšwêla se sengwê lerumô; batho ba tlo lesa xo ithuta xo hlabana.” (Jesaya 2:4) Gaešita le ge temana ye e tumilego e bontšhitšwe kgaufsi le ntlo-kgolo ya lefase ya Ditšhaba tše Kopanego kua New York City, mokgatlo woo wa lefase ga se wa a phetha ka kgopolo le ge e le efe. Lega go le bjalo, tsebišo yeo e tla phethega ka ntle le go palelwa e le karolo ya lentšu le le sa folotšego la Jehofa Modimo.—Jesaya 55:10, 11.
2. Ke eng seo se swanetšego go “[direga] bofelong bya mabaka” go ya ka Jesaya 2:2, 3?
2 Mantšu ao a hwetšwago go Jesaya 2:4 ge e le gabotse ke karolo ya boporofeta bjo bo kgahlišago, e lego boporofeta bjo bo lego mabapi le khutšo ya kgonthe—e bile a a phethagala mehleng yona ye ya rena. Pele ga ge bo tsebatša ditebelelo tše di kgahlišago tša go se sa ba gona ga dintwa le dibetša tša ntwa, boporofeta bo re: “Bofelong bya mabaka thaba ya Ntlo ya Morêna e tlo ba e thekxilwe xodimo xa dithaba, è beilwe xodimo xa meboto; ’me dithšaba tšohle di tlo thšoloxêla mo xo yôna. Merafo-rafo e tlo ya xôna è re: A re yeng, re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe, xobane molaô o tlo tšwa Tsione, Lentšu la Morêna le tlo tšwa Jerusalêma.”—Jesaya 2:2, 3.
Batho e ka ba ba Khutšo
3. Motho a ka fetoga bjang go tloga go go ba ntwa-dumela go ya go go ba wa khutšo?
3 Ela hloko gore pele ga ge batho ba ka phegelela tsela ya khutšo, ba swanetše go rutwa ditsela tša Jehofa. Karabelo ya go kwa thutong ya Jehofa e ka fetola tsela ya motho ya go nagana le ya go dira dilo, e le gore motho yo e kilego ya ba ntwa-dumela a be le khutšo. Phetogo ye e phethwa bjang? Ba-Roma 12:2 e re: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” Re mpshafatša menagano ya rena goba ra e tutuetša ka tsela e fapanego ka go e tlatša ka melao ya motheo le melao e tšwago Lentšung la Modimo. Thuto ya ka mehla ya Beibele e re thuša go dira phetogo ye gomme ya dira gore re kgone go kgonthišetša seo e lego thato ya Jehofa go rena, e le gore re kgone go bona gabotse tsela yeo re swanetšego go sepela ka yona.—Psalme 119:105.
4. Motho o apara bjang motho yo mofsa wa khutšo?
4 Therešo ya Beibele ga e fetoše tsela ya rena ya go nagana feela, eupša e fetoša le ditiro tša rena le semelo. E re thuša gore re dire seo moapostola Paulo a se kgothaleditšego ge a re: “Apolang tše e lexo tša tsela ya kxalê, tša motho e motála, e a senyêxaxo à forilwe ke dikxanyoxô. Sa lena a e bê xo mphsafatšwa moyeng wa dipelo tša lena. Le aparê motho e mofsa, e a bopetšwexo xo etša Modimo xo lokeng le kxethexong ya makxonthe.” (Ba-Efeso 4:22-24) Matla ao a tutuetšago monagano ke a ka gare. A a fetoga gomme ya ba a magolo ge lerato la rena la go rata Jehofa le melao ya gagwe le dutše le gola, a re dira batho ba sekametšego dilong tša moya le ba khutšo.
5. “Molaô o mofsa” wo Jesu a o neilego barutiwa ba gagwe o tlaleletša bjang khutšong e lego gare ga bona?
5 Go nyakega ga go fetoga mo go bonwa taelong yeo Jesu a e neilego barutiwa ba gagwe diiring tša gagwe tša mafelelo le bona: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe kè Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:34, 35) Lerato le la go swana le la Kriste leo le se nago boithati le tlema barutiwa gotee boteeng bjo bo phethagetšego. (Ba-Kolose 3:14) Ke feela bao ba ikemišeditšego go amogela le go phela ka “molaô [wo] o mofsa” bao ba tlago go thabela khutšo yeo Modimo a e holofetšago. Na go na le batho le ge e le bafe bao ba dirago se lehono?
6. Ke ka baka la’ng Dihlatse tša Jehofa di e-na le khutšo go fapana le batho ba lefase?
6 Dihlatse tša Jehofa di katanela go bontšha lerato borwarreng bja tšona bja lefase ka bophara. Gaešita le ge di ntšhwa ditšhabeng ka moka tša lefase, ga di tsenele dingangišano tša lefase gaešita le ge di beilwe ka tlase ga kgateletšo e šoro ya tša dipolitiki le ya bodumedi. E le batho ba kopanego, ba rutwa ke Jehofa gomme ba thabela khutšo. (Jesaya 54:13) Ba dula ba sa tšee lehlakore dithulanong tša tša dipolitiki gomme ga ba tšee karolo dintweng. Ba bangwe bao pele e bego e le ba šoro ba lahlile tsela yeo ya go phela. Ba fetogile Bakriste ba ratago khutšo ba ekišago mohlala wa Kriste Jesu. Ba latela ka pelo ka moka keletšo ya Petro e rego: “E a kxahlwaxo ké bophelô, a rata xo bôna matšatši a tše botse, a a khutšišê leleme l’axwe bobe; le melomo ya xaxwe e se kê ya bua maaká. A a kxaoxanê le tše mpe, a dirê tše botse; a nyakê moláô a o kxanyêlêlê.”—1 Petro 3:10, 11; Ba-Efeso 4:3.
Bao ba Phegelelago Khutšo
7, 8. Nea mehlala ya batho bao ba ilego ba lahla ntwa gomme ya ba batsomi ba khutšo ya kgonthe. (Anega ka ba bangwe bao o ka bago o ba tseba.)
7 Ka mohlala, go na le Rami Oved yo e bego e le mohlankedi sehlopheng se se tlwaeditšwego ka mo go kgethegilego sa go lwantšha botšhošetši. O be a tlwaeditšwe go bolaya manaba a gagwe. O be a dumela ka pelo ka moka botšhabeng bja gabo bja Isiraele go fihlela letšatšing leo a ilego a lemoga gore bo-rabi ba be ba sa nyake gore a nyale mosadi yo a bego a mo rata, feela ka gobane e be e le mo-Asia, e lego wa-Ntle. O ile a thoma go tsoma therešo ka Beibeleng. Ka morago o ile a gahlana le Dihlatse tša Jehofa. Thuto ya gagwe ya Beibele le Dihlatse e ile ya mo kgodiša gore e be e ka se sa hlwa e e-ba modumedi yo a fišegelago thoko wa botšhaba. Lerato la Bokriste le be le bolela go lahla ntwa le dibetša le go ithuta go rata batho ba morafo o mongwe le o mongwe. O be a maketše gakaakang ge a be a amogela lengwalo le botho le le nago le mantšu a mathomo a rego, “Ngwanešo Rami”! Ke eng se se bego se makatša ka seo? Mongwadi e be e le Hlatse ya mo-Palestina. Rami o re: “Ke be ke nagana gore seo e be e le se se makatšago ka gobane ma-Palestina e be e le manaba a-ka, gomme bjale yo mongwe wa bona o be a mpitša ‘Ngwanešo.’” Rami le mosadi wa gagwe bjale ba phegelela khutšo ya kgonthe ka tsela ya Modimo.
8 Mohlala o mongwe ke wa Georg Reuter yo a bego a hlankela madireng a Jeremane ao a ilego a hlasela Russia nakong ya Ntwa ya II ya Lefase. Go se go ye kae o ile a lahlegelwa ke kholofelo ka baka la leano la Hitler la boikgantšho la go hwetša pušo ya lefase. Ge a be a boa ntweng o ile a thoma go ithuta Beibele le Dihlatse tša Jehofa. O ngwadile gore: “Mafelelong, dilo di be di thoma go kwagala go nna. Ke ile ka lemoga gore Modimo o be a se na molato wa tšhollo ka moka ya madi . . . Ke ile ka ithuta gore o be a rerile go hloma paradeise ya lefase ka bophara e e-na le ditšhegofatšo tša ka mo go sa felego bakeng sa batho ba kwago. . . . Hitler o be a ile a ikgogomoša mabapi le ‘Pušo ya Nywaga e Sekete,’ eupša o be a bušitše ka [nywaga] e 12 feela—ka ditla-morago tše di boifišago gakaakang! Ke Kriste e sego Hitler . . . yo a ka hlomago pušo ya nywaga e sekete lefaseng gomme o tla dira bjalo.” Mo nakong ye, Georg o be a dutše a hlankela e le motseta wa khutšo ya kgonthe ka nywaga e ka bago 50 bodireding bja nako e tletšego.
9. Phihlelo ya Dihlatse tša Jehofa kua Jeremane ya Bonazi e bontšha bjang gore di na le sebete le ge di e-na le khutšo?
9 Potego le boema-gare tša Dihlatse tša Jehofa kua Jeremane nakong ya pušo ya Nazi e tšwela pele e le bohlatse bja lerato la tšona la go rata Modimo le khutšo gaešita le mo nakong ye, e lego nywaga e fetago 50 ka morago. Pukwana yeo e gatišitšwego ke United States Holocaust Memorial Museum kua Washington, D.C. e re: “Dihlatse tša Jehofa di kgotleletše tlaišo e šoro kudu ka tlase ga pušo ya Nazi. . . . Sebete seo tše dintši di se bontšhitšego ka go gana [go latola bodumedi bja tšona] di lebeletšane le go tlaišwa, go swarwa gampe dikampeng tša tshwenyo gotee le polao ka dinako tše dingwe se dirile gore batho ba bantši bao ba bego ba phela le tšona ka nako yeo ba di hlomphe.” Ka gona e oketša ka gore: “Nakong ya ge di lokollwa dikampeng, Dihlatse tša Jehofa di ile tša tšwetša modiro wa tšona pele, di sepela gare ga baphologi di dira basokologi.”
Phetogo e Kgolo le go Feta
10. (a) Go nyakega phetogo efe e kgolo gore khutšo ya kgonthe e tle? (b) Se se bontšhitšwe bjang ka pukung ya Daniele?
10 Na se se bolela gore Dihlatse tša Jehofa di dumela gore di ka tlišetša lefase ka moka khutšo ka go sokolla ba bantši gore ba dumele boema-gareng bja Bokriste? Aowa! Go nyakega phetogo e kgolo le go feta gore khutšo e tsošološwe lefaseng. Ke efe? Pušo e aroganyago, e gatelelago le e šoro ya motho e swanetše go šuthelela pušo ya Mmušo wa Modimo woo Jesu a rutilego barutiwa ba gagwe gore ba o rapelele. (Mateo 6:9, 10) Eupša seo se tla direga bjang? Moporofeta Daniele o ile a lemoga torong e buduletšwego ke Modimo gore mehleng ya bofelo, Mmušo wa Modimo o be o tla pšhatla seswantšho se segolo se se emelago dipušo tša tša dipolitiki tša batho lefaseng go swana le ge lefsika le legolo le ‘kgomoga e se ka seatla sa motho.’ Ka gona o ile a tsebatša gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:31-44.
11. Jehofa o tla tliša phetogo e nyakegago bakeng sa khutšo ka tsela efe?
11 Ke ka baka la’ng go tla direga phetogo ye e kgolo kudu lefaseng? Ka gobane Jehofa o holofeditše gore o tla tloša bao ba šilafatšago lefase le go le senya lefaseng. (Kutollo 11:18) Phetogo ye e tla direga ntweng ya Jehofa ya go loka malebana le Sathane le lefase la gagwe le kgopo. Re bala go Kutollo 16:14, 16 gore: “Ké yôna [ke gore, dipolelo tše di šilafetšego tše di buduletšwego] meôya ya masathane e diraxo mehlôlô, ye e yaxo xo dikxoši [babuši ba tša dipolitiki] tša lefase ka moka, ya di rapa xo ya ntweng ya mohla-moxolo wa Modimo Ra-matla-ohle. Xomme ó ba bokanthšitše felô mo xo bitšwaxo Haramagedone.”
12. Haramagedone e tla swana le eng?
12 Haramagedone e tla swana le eng? E ka se ke ya ba kutollo ya nuclear goba masetla-pelo a bakilwego ke batho. Aowa, ke ntwa ya Modimo ya go fediša dintwa ka moka tša batho le go fediša bao ba hlohleletšago dintwa tše bjalo. Ke ntwa ya Modimo ya go tlišetša bao ba ratago khutšo, khutšo ya kgonthe. Ee, Haramagedone e tla bjalo ka ge Jehofa a rulagantše. E ka se ke ya diega. Moporofeta wa gagwe Habakuku o ile a budulelwa gore a ngwale gore: “Pônô e beetšwe lebaka la yôna; e bola tša bofêlô, xa e fore. Xe e sa phêthêxe ka pelá, xôna e letêlê. Xo tla di tlo tla, di ka se diêxe.” (Habakuku 2:3) Ka baka la maikwelo a rena a batho e ka bonala eka e diegile, eupša Jehofa o kgomarela thulaganyo ya gagwe. Haramagedone e tla tla ka nako yeo Jehofa a e rulagantšego e sa le pele.
13. Modimo o tla kgalemela mohlohleletši wa kgonthe Sathane Diabolo bjang?
13 Mogato wo wa makgaola-kgang o tla kgorela khutšo ya kgonthe tsela! Eupša gore khutšo ya kgonthe e hlongwe ka go tia go swanetše go dirwa selo se sengwe—e lego go tlošwa ga yo a bakago karogano, lehloyo le ntwa. Ke sona seo Beibele e porofetago gore se tla latela—e lego go lahlelwa ga Sathane yo e lego mohlohleletši wa ntwa le mohlami wa maaka sekoting. Moapostola Johane o ile a bona tiragalo ye ponong ya boporofeta, go etša ge e begilwe go Kutollo 20:1-3 ka gore: “Ka bôna Morongwa à fofa lexodimong á swere sekxonyu sa Sekoti, a swere le kêtanê e kxolo ka seatla. A swara Nôxa-kxolo, Nôxa yela ya mehleng, e lexo yêna Diabolo le Sathane, a e tlêma xore e fetšê nywaxa e sekete è tlemilwe. A e lahlêla Sekoting, a e kxonyeletša moo, a tiiša ka seká sa leswaô, xore e se hlwê e aroša dithšaba, xo bê xo fetê nywaxa e sekete.”
14. Mogato wa Jehofa wa phenyo malebana le Sathane o ka hlaloswa bjang?
14 Ye ga se toro; ke kholofetšo ya Modimo—gomme Beibele e re: “Modimo . . . a ka se ke a aketša.” (Ba-Hebere 6:18, PK) Ka go rialo, Jehofa o be a ka bolela ka moporofeta wa gagwe Jeremia gore: “[Ke] Nna Morêna, ke dirišaxo kxauxêlô le molaô le xo loka mo ’faseng, è le tšôna di nkxahlaxo. Ó r’yalo Morêna.” (Jeremia 9:23) Jehofa o gata mogato ka toka le go loka gomme o thabela khutšo yeo a tlago go e tliša lefaseng.
Pušo ka Kgoši ya Khutšo
15, 16. (a) Ke mang yo a kgethilwego ke Jehofa gore a buše e le Kgoši? (b) Pušo yeo e hlaloswa bjang, gona ke bomang bao ba tlago go ba le karolo go yona?
15 Go kgonthišetša gore khutšo ya kgonthe e tla tlela bohle bao ba phelago ka tlase ga thulaganyo ya gagwe ya Mmušo, Jehofa o neile Kgoši ya kgonthe ya Khutšo e lego Jesu Kriste pušo go etša ge go boletšwe e sa le pele go Jesaya 9:5, 6 gore: “Xobane re tswaletšwe ngwana, re neilwe morwa, yo pušô e lexo lexetleng la xaxwe. Leina la xaxwe ké: Matete, Moeletši, Modimo yo matla, Tatê wa xo sa felexo, Kxoši ya [Khutšo, NW]. Mmušô wó ké wa kênêlô, wa khutšô ye e sa felexo . . . Tšeo di tlo dirwa ke xo pelofala xa Morêna wa mašaba.” Mopsalme le yena o ngwadile ka tsela ya boporofeta ka pušo ya Mesia ya khutšo gore: “Mehleng ya xaxwe xo taxê moloki, moláô o xolê ò e-ya le dikxwedi di sa kxaotše xo balama.”—Psalme 72:7.
16 Go tlaleletša moo, banababo Kriste ba 144000 bao ba tloditšwego ka moya ba tla be ba buša le yena legodimong. Ba ke baja-bohwa-gotee le Kriste bao Paulo a ngwadilego ka bona gore: “Modimo wa moláô ó tlo tloxa a kxabutlanya Sathane la mo xata ka dinaô. Kxauxêlô ya Mong ’a rena Jesu Kriste a e bê le lena.” (Ba-Roma 16:20) Ee, ba ba tla tšea karolo ba le legodimong phenyong ya Kriste godimo ga mohlohleletši wa ntwa Sathane Diabolo!
17. Re swanetše go dira’ng gore re hwetše bohwa bja khutšo ya kgonthe?
17 Bjale-ge, potšišo ke gore, O swanetše go dira’ng gore o hwetše bohwa bja khutšo ya kgonthe? Khutšo ya kgonthe e ka tla feela ka tsela ya Modimo, gomme o swanetše go gata megato e nepagetšego gore o e hwetše. O swanetše go amogela Kgoši ya Khutšo gomme o retologele go yona. Se se bolela gore o swanetše go amogela Kriste karolong ya gagwe e le Morekolodi le Molopolodi wa batho ba sebe. Jesu ka boyena o boletše mantšu a tumilego a rego: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Na o ikemišeditše go dumela go Kriste Jesu e le Motseta wa Modimo bakeng sa go tliša khutšo ya kgonthe le phološo? Ga go na leina le lengwe ka tlase ga legodimo leo le ka hlomago khutšo gomme la e kgonthišetša. (Ba-Filipi 2:8-11) Ka baka la’ng? Ka gobane Jesu ke Mokgethwa wa Modimo. Ke motseta yo mogolo-golo wa khutšo yo a kilego a sepela lefaseng. Na o tla theetša Jesu gomme wa latela mohlala wa gagwe?
18. Re swanetše go dira’ng gore re arabele mantšung a Jesu a begilwego go Johane 17:3?
18 Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Bjale ke nako ya go amogela tsebo e nepagetšego ka go ba gona ka mehla dibokeng tša Dihlatse tša Jehofa Holong ya Mmušo. Diboka tše tša thuto di tla go tutueletša go abelana tsebo ya gago le kholofelo ya gago le ba bangwe. Le wena o ka ba motseta wa khutšo ya Modimo. O ka thabela khutšo gona bjale ka go bota Jehofa Modimo go etša ge go boletšwe go Jesaya 26:3 go ya ka New International Version gore: “Wa kgopolo e tsepamego o tla mmoloka a e-na le khutšo e phethagetšego, ka gobane o a go bota.” O swanetše go bota mang? “Bôtang Morêna ka mehla le mehla; xobane xe Le na le Yêna, Le na le Morêna Lentswê la mehleng.”—Jesaya 26:4.
19, 20. Ke eng se se letetšego bao ba tsomago khutšo le go e phegelela lehono?
19 Emela bophelo bjo bo sa felego gona bjale lefaseng le lefsa la Modimo la khutšo. Lentšu la Modimo le re kgonthišetša go Kutollo 21:3, 4 gore: “Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” Na bjoo ga se bokamoso bja khutšo bjo o bo hlologetšwego?
20 Ka gona, gopola seo Modimo a se holofeditšego. “Ba bolêta e tlo ba bôná beng ba naxa; ba tlo thaba ka botlalô bya moláô. Šetša moloki O bônê yo boló; monna wa moláô ó tlo bôna ditloxolo.” (Psalme 37:11, 37) Ge letšatši leo la lethabo le fihla, eka re ka bolela ka lethabo gore, “Khutšo ya kgonthe mafelelong! Re leboga Jehofa Modimo, mothopo wa khutšo ya kgonthe!”
Na o ka Hlalosa?
◻ Ke eng se se ka thušago motho go dira diphetogo monaganong le ditirong?
◻ Dihlatse tša Jehofa di bontšhitše bjang lerato la tšona la go rata khutšo ya kgonthe e le batho ka o tee ka o tee le ge e le sehlopha?
◻ Jehofa o tla kgalemela bao ba tutuetšago lehloyo le ntwa bjang?
◻ Pušo ka Kgoši ya Khutšo e tla direla batho eng?
[Seswantšho go letlakala 14]
Mantšu a Jesaya a phethagatšwa ke bao ba arabelago thutong ya Jehofa, eupša e sego UN
[Seswantšho go letlakala 15]
Banna ba ba babedi ba dirile diphetogo tša go phegelela khutšo
[Seswantšho go letlakala 15]
Rami Oved
[Seswantšho go letlakala 15]
Georg Reuter
[Seswantšho go letlakala 16]
Go tla aparela khutšo ya kgonthe ka tlase ga pušo ya Kgoši ya Khutšo