Bakorinthe ba Pele
3 Banabešo, ga se ka kgona go bolela le lena go swana le batho bao ba hlahlwago ke moya o mokgethwa+ eupša ke ile ka bolela le lena go swana le batho bao ba hlahlwago ke tsela yeo batho ba naganago ka yona. Ke bolela le lena go swana le bana ba banyenyane+ bao ba sa kgonego go kwešiša dithuto tša mabapi le Kriste. 2 Ga se ka le fa dijo tšeo di tiilego, eupša ke le file maswi ka gobane le be le se la tšwa le tia ebile le gona bjale ga se la tšwa le tia.+ 3 Le sa nagana ka tsela yeo batho ba naganago ka yona.*+ Ka ge le na le mona ebile le elwa seng sa lena, le bontšha gore le itshwere go swana le batho ba lefase le.+ 4 Ge yo mongwe a re: “Nna ke wa Paulo,” eupša yo mongwe a re: “Nna ke wa Apollo,”+ na seo ga se dire gore le swane le batho ba lefase?
5 Apollo ke mang? Paulo yena ke mang? Rena re no ba bahlanka ba Morena+ bao ba le thušitšego gore le be badumedi. Re dirile seo Morena a rilego re se dire. 6 Nna ke bjetše peu,+ Apollo a nošetša,+ eupša Modimo ke yena a dirilego gore e gole. 7 Motho yo a bjalago le yo a nošetšago ga ba bohlokwa, eupša Modimo ke yena a lego bohlokwa ka gobane ke yena a godišago.+ 8 Motho yo a bjalago le yo a nošetšago, ba šoma gotee ebile yo mongwe le yo mongwe o tla hwetša moputso go ya ka mošomo wo a o dirilego.+ 9 Rena re bašomigotee le Modimo. Lena le bjalo ka tšhemo yeo Modimo a e lemago, le swana le moago wo Modimo a o agago.+
10 Ke dirišitše mpho yeo Modimo a nneilego yona go dira fantešeni+ go swana le moagi yo a nago le bokgoni. Bjale motho yo mongwe o aga godimo ga yona. Eupša motho yo mongwe le yo mongwe o swanetše go šetša gore o aga bjang godimo ga fantešeni yeo. 11 Modimo o dirile gore Jesu Kriste e be fantešeni, ka gona ga go na motho yo mongwe yo a ka dirago fantešeni e nngwe.+ 12 Motho yo mongwe a ka aga godimo ga fantešeni yeo a diriša gauta, silifera goba maswika a bohlokwa. Yo mongwe yena a ka šomiša dikota, bjang goba mahlaka. 13 Bjale ge letšatši la go lekwa le etla go tla bonagala gore yo mongwe le yo mongwe o dirile mošomo wa mohuta mang. Ge mollo o etla+ o tla bontšha gore motho o dirile mošomo o mobotse goba bjang. 14 Ge e ba dilo tšeo motho yoo a agilego ka tšona di ka se swe, o tla hwetša moputso. 15 Eupša ge di ka swa, o tla lahlegelwa. Yena o tla phologa eupša go tla ba bjalo ka ge eka o phologa mollong.
16 Na ga le tsebe gore lena le tempele+ ya Modimo, le gore moya wa Modimo o go lena?+ 17 Modimo o tlo fediša motho yo a senyago tempele ya gagwe, ka gobane tempele ya Modimo ke e kgethwa gomme lena le tempele yeo.+
18 Le se ke la iphora. Motho yo mongwe le yo mongwe yo a naganago gore o bohlale lefaseng le, a e be lešilo e le gore a hlalefe. 19 Bohlale bja lefase le ga bo na mohola go Modimo ka gobane mangwalo a re: “O dira gore ba bohlale ba tanywe ke maano a bona.”+ 20 Le gona a re: “Jehofa* o a tseba gore dilo tšeo ba bohlale ba di naganago ga di na mohola.”+ 21 Ka gona a go se be le motho yo a ikgantšhago ka dilo tšeo batho ba ka di dirago, ka gobane dilo ka moka ke tša lena. 22 Paulo, Apollo, Kefase,*+ lefase, bophelo, lehu, dilo tše di lego gona gona bjale goba dilo tšeo di sa tlago go tla, ka moka ga tšona ke tša lena. 23 Lena le ba Kriste,+ Kriste yena ke wa Modimo.