Kutollo Yeo e Utolletšwego Johane

22 Ke moka morongwa a mpontšha noka ya meetse ao a neago bophelo.+ Meetse a gona a be a hlwekile go swana le leswika leo le bitšwago legakabje ebile a be a elela a etšwa setulong sa bogoši sa Modimo le sa Kwana.+ 2 Noka yeo e be e theogela bogareng bja seterata se segolo sa motse. Ka mahlakoreng a mabedi a noka yeo, go be go na le mehlare ye e neago bophelo yeo e bego e enywa dienywa ga 12 ka ngwaga. Se se bolela gore e be e enywa dienywa kgwedi e nngwe le e nngwe. Matlakala a mehlare yeo a be a alafa batho ba ditšhaba.+

3 Modimo a ka se sa rogaka mohlare woo. Go e na le moo, setulo sa bogoši sa Modimo le sa Kwana+ di tla ba motseng woo gomme bahlanka ba Modimo ba tla mo hlankela ka tsela yeo e kgethegilego. 4 Ba tla bona sefahlego sa gagwe+ gomme leina la gagwe le tla ngwalwa diphatleng tša bona.+ 5 Le gona go ka se sa ba le bošego+ ebile ba ka se sa hloka lebone goba seetša sa letšatši ka gobane Jehofa* Modimo o tla ba hlabišetša seetša+ gomme bona e tla ba dikgoši go ya go ile.+

6 A re go nna: “Mantšu a ke nnete ebile a a tshepega.+ Le gona Jehofa Modimo yo a bolelago a diriša baporofeta+ o romile morongwa wa gagwe gore a bontšhe bahlanka ba gagwe dilo tše di swanetšego go direga e se kgale. 7 Ke tla kapelapela.+ Go thaba mang le mang yo a phelago ka go dumelelana le mantšu a a boporofeta bja lengwalo le la go phuthwa.”+

8 Bjale, nna Johane ke nna ke kwelego dilo tše ka ba ka di bona. Ge ke be ke ekwa le go bona dilo tše, ke ile ka khunama dinaong tša morongwa yoo a bego a mpontšha tšona gore ke mo rapele. 9 Eupša a re go nna: “Aowa! O se ke wa dira bjalo! Nna ke no ba mohlanka go swana le wena le banabeno bao e lego baporofeta gotee le bao ba kwago mantšu a lengwalo le la go phuthwa. Rapela Modimo.”+

10 A ba a re go nna: “O se ke wa boloka mantšu a a boporofeta bja lengwalo le la go phuthwa e le sephiri, ka gobane nako yeo e beilwego e kgauswi. 11 Yo a sa lokago a a tšwele pele a dira go se loke, yo a šilafetšego a a tšwele pele ka ditšhila tša gagwe, eupša yo a lokilego a a tšwele pele a dira go loka gomme yo mokgethwa a a tšwele pele a dira tše dikgethwa.

12 “‘Ke tla kapelapela, le gona ke tla putsa yo mongwe le yo mongwe go ya ka modiro wa gagwe.+ 13 Ke nna Alfa le Omega,*+ wa pele le wa mafelelo. 14 Go thaba bao ba hlatswago diaparo tša bona tše ditelele,+ e le gore ba be le tshwanelo ya go ya mehlareng yeo e neago bophelo+ le gore ba kgone go tsena motseng ka dikeiti tša wona.+ 15  Batho bao ba sa hlwekago,* ba go dirišana le matemona,* ba go itshwara gampe ka tša thobalano,* babolai, ba go rapela medimo ya diswantšho le batho ka moka bao ba ratago maaka ba ka se dumelelwe go tsena motseng woo.’+

16 “‘Nna Jesu, ke romile morongwa wa ka gore a le nee bohlatse ka dilo tše e le gore diphuthego di holege. Ke nna modu wa Dafida ebile ke nna ngwana wa gagwe+ le gona ke nna naledi ya go phadima ya mesong.’”+

17 Moya o mokgethwa le monyadiwa+ ba tšwela pele ba re: “Etla!” Motho yo mongwe le yo mongwe yo a kwago a a re: “Etla!” Motho yo mongwe le yo mongwe yo a swerwego ke lenyora a a tle,+ le yo mongwe le yo mongwe yo a ratago a a tle a tšee meetse ao a neago bophelo mahala.+

18 “Ke botša yo mongwe le yo mongwe yo a kwago mantšu a boporofeta bja lengwalo le la go phuthwa ke re: Ge e ba motho a ka oketša dilo tše tšeo di ngwadilwego,+ gona Modimo le yena o tla mo okeletša dikotlo tšeo di ngwadilwego lengwalong le la go phuthwa.+ 19 Ge e ba motho a ka tloša a mangwe a mantšu ao a ngwadilwego lengwalong le la go phuthwa la boporofeta, Modimo a ka se mo dumelele gore a hwetše dilo tše dibotse tšeo go boletšwego ka tšona lengwalong le, ebile a ka se mo dumelele gore a je dienywa tša mohlare wo o neago bophelo.+ Le gona a ka se mo dumelele gore a tsene motseng o mokgethwa.+

20 “Yo a rego dilo tše ka moka ke nnete o re: ‘Ke tla kapelapela.’”+

“Amene! Etla wena Morena Jesu.”

21 Ke rapela Modimo gore Morena Jesu Kriste a bontšhe bakgethwa botho bjo bogolo.