Ebangedi ya Mareka
12 Le gona a thoma go bolela le bona ka dipapišo a re: “Monna yo mongwe o ile a bjala meterebe mašemong a gagwe,+ a a ageletša ka leboto gomme a epa segatelo sa diterebe a ba a aga le moago o motelele* moo.+ Ke moka a a fa balemi gore ba a hlokomele, yena a ya nageng ya kgole.+ 2 Ge sehla sa dienywa se fihla o ile a roma mohlanka wa gagwe go balemi gore a ye a tšee tše dingwe tša dienywa tša mašemong ao. 3 Eupša balemi bao ba ile ba mo swara, ba mmetha, ba mmušetša morago a se a swara selo. 4 A romela mohlanka yo mongwe gape go bona, le yena ba mo itia hlogo gomme ba mo hlompholla.+ 5 A romela yo mongwe gape, yena ba mmolaya ba ba ba bolaya le ba bangwe ba bantši, bao ba bangwe ba bona ba ilego ba ba betha gomme ba bangwe ba bona ba ba bolaya. 6 Ke moka mong wa mašemo a romela morwa wa gagwe yoo a bego a mo rata+ go balemi. A re: ‘Ba tla hlompha morwa wa ka.’ 7 Eupša balemi bao ba boledišana ba re: ‘Yo ke yena mojabohwa.+ Etlang re mmolayeng gomme bohwa e tla ba bja rena.’ 8 Ka gona ba mo swara, ba mmolaya ba mo lahlela ka ntle ga mašemo a meterebe.+ 9 Mong wa mašemo a meterebe o tla dirang? O tla tla a bolaya balemi bao gomme a nea balemi ba bangwe mašemo ao.+ 10 Na ga se la ka la bala lengwalo leo le rego: ‘Leswika leo baagi ba le gannego, le fetogile leswika le bohlokwa leo le lego khoneng ya moago’?+ 11 Na ga se la bala gore: ‘Se se tšwa go Jehofa ebile se a kgahliša mahlong a rena’?”+
12 Ke moka ba nyaka go mo swara eupša ba be ba tšhaba lešaba, ka gobane ba be ba tseba gore o boletše papišo yeo a naganne ka bona. Ka gona ba mo tlogela ba sepela.+
13 Ka morago ga moo ba romela ba bangwe ba Bafarasei le balatedi ba Heroda gore ba mo tanye ka dilo tšeo a di bolelago.+ 14 Bona ge ba fihla ba re go yena: “Morutiši, re a tseba gore o bolela nnete le gona ga o nyake go amogelwa ke batho ka gobane ga o lebelele gore motho o bonagala bjang, eupša dilo tšeo o di rutago ka Modimo ke tša nnete. Na go dumeletšwe ke molao gore motho yo mongwe le yo mongwe a ntšhetše Kesara motšhelo goba ga go bjalo? 15 Na re swanetše go patela motšhelo goba na ga se ra swanela go o patela?” Ge Jesu a lemoga boikaketši bja bona o ile a re go bona: “Le ntekelang? Ntlišetšeng tenariase* ke e bone.” 16 Ba e tliša. Ke moka a re: “Seswantšho se le leina le ke tša mang?” Ba re go yena: “Ke tša Kesara.” 17 Ke moka Jesu a re: “Efang Kesara tša Kesara+ eupša Modimo le mo fe tša Modimo.”+ Ba makala kudu.
18 Bjale Basadutsei, e lego bao ba sa dumelego gore go na le tsogo ya bahu,+ ba ile ba tla go yena ba mmotšiša ba re:+ 19 “Morutiši, Moshe o re ngwaletše gore ge morwarrago motho a ka hlokofala a se na ngwana eupša a tlogela mosadi, morwarragwe o swanetše go tšea mosadi yoo gomme a be le bana le yena legatong la morwarragwe.+ 20 Go be go na le bana ba motho ba šupago, wa pele a tšea mosadi, eupša ge a hlokofala o be a se na bana. 21 Wa bobedi a mo nyala, eupša a hlokofala a se na bana gomme gwa ba bjalo le ka wa boraro. 22 Bana bao ba motho ba šupago ba ile ba hlokofala ba se na bana. Mafelelong mosadi yoo le yena a hlokofala. 23 Ge bahu ba tsošwa, e tlo ba mosadi wa mang? Ka gobane bana bao ba motho ba šupago ka moka ba be ba mo nyetše.” 24 Jesu a re go bona: “Le a timela, ka baka la gore ga le tsebe Mangwalo ebile ga le tsebe maatla a Modimo.+ 25 Ka gobane ge ba tsošwa bahung, banna ba ka se nyale le basadi ba ka se nyalwe, eupša ba tla ba bjalo ka ge eka ke barongwa magodimong.+ 26 Na ga se la bala pukung ya Moshe mabapi le mohlare wa meetlwa? Modimo o be a bolela ka bahu bao ba bego ba tlo tsošwa ge a be a botša Moshe gore: ‘Ke nna Modimo wa Aborahama, Modimo wa Isaka le Modimo wa Jakobo.’+ 27 Ke Modimo wa ba phelago, e sego wa bahu. Le fošitše kudu.”+
28 Yo mongwe wa ditsebi tša molao yo a bego a theeditše seo ba bego ba boledišana ka sona, o ile a kwa kamoo Jesu a ilego a hlalosetša banna bao gabotse, ke moka a mmotšiša a re: “Taelo e bohlokwahlokwa go ditaelo ka moka ke efe?”+ 29 Jesu a re: “Ya pele ke ye: ‘Theetšang lena Baisiraele, Jehofa* Modimo wa rena ke yena Jehofa a nnoši, 30 gomme o rate Jehofa Modimo wa gago ka pelo ya gago ka moka, ka moya* wa gago ka moka, ka monagano wa gago ka moka le ka maatla a gago ka moka.’+ 31 Ya bobedi ke ye: ‘O rate moagišane wa gago ka mokgwa wo o ithatago ka wona.’+ Ga go na taelo e nngwe yeo e fetago tše.” 32 Setsebi seo sa molao sa re go yena: “Morutiši, o boletše gabotse ka go dumelelana le nnete. ‘Modimo ke o tee ebile ga go na yo mongwe ka ntle le yena,’+ 33 le gona, go mo rata ka pelo ka moka, ka monagano ka moka le ka maatla ka moka le go rata moagišane bjalo ka ge o ithata go phala dihlabelo ka moka le dibego ka moka tša go fišwa.”+ 34 Ge Jesu a lemoga gore monna yoo o arabile ka bohlale o ile a re go yena: “Ga o kgole le Mmušo wa Modimo.” Eupša ga go yo a ilego a hlwa a sa ba le sebete sa go mmotšiša dipotšišo.+
35 Le ge go le bjalo, ge Jesu a dutše a ruta tempeleng, o ile a re: “Go tla bjang gore ditsebi tša molao di re Kriste ke morwa wa Dafida?+ 36 Dafida o ile a bolela a thušwa ke moya o mokgethwa+ a re: ‘Jehofa o boditše Morena wa ka a re: “Dula ka letsogong la ka le letona go fihla ke dira gore o gatakele manaba a gago.”’*+ 37 Dafida ka boyena o mmitša Morena, bjale go tla bjang gore e be morwa wa gagwe?”+
Lešaba le legolo le be le thabela go mo theetša. 38 Ge a dutše a ruta o ile a re: “Hlokomelang ditsebi tša molao tšeo di ratago go itshepelela di apere diaparo tše ditelele gomme di nyaka go dumedišwa ka tlhompho mebarakeng+ 39 le go dula ditulong tša ka pele disinagogeng ebile di rata go dula mafelong ao a beetšwego batho ba bohlokwa menyanyeng.+ 40 Le gona di tšeela bahlologadi dintlo tša bona ebile di rapela dithapelo tše ditelele e le gore batho ba di rate. Tšona di tla otlwa go feta batho ba bangwe.”
41 A dula fase a lebane le mapokisi+ a moneelo a lebeletše kamoo batho ba bego ba lahlela meneelo ya bona ka mapokising. Bahumi ba bantši ba be ba lahlela ditšhelete tše dintši tša tšhipi.+ 42 Bjale mohlologadi wa modiidi a tla a lahlela ditšheletiana tša tšhipi tše pedi tša theko e nyenyane kudu.*+ 43 Ka gona, a bitša barutiwa ba gagwe a re go bona: “Ruri ke le botša gore mohlologadi yo wa modiidi o neetše go feta batho ka moka bao ba lahletšego tšhelete ka mapokising a moneelo.+ 44 Ka gobane ka moka ga bona ba ntšhitše go tšwa mahumong a bona, eupša mohlologadi yo le ge a diila o lahletše tšhelete yeo a nago le yona ka moka, e lego yeo a bego a tla iphediša ka yona.”+