Lefitiko

19 Jehofa a tšwela pele a bolela le Moshe a re: 2 “Botša setšhaba ka moka sa Isiraele o re: ‘Le be ba bakgethwa, ka gobane nna Jehofa Modimo wa lena ke yo mokgethwa.+

3 “‘Yo mongwe le yo mongwe wa lena a hlomphe mmagwe le tatagwe+ gomme le boloke disabatha tša ka.+ Ke nna Jehofa Modimo wa lena. 4 Le se ke la rapela medingwana,+ goba la itirela medingwana ya diswantšho.+ Ke nna Jehofa Modimo wa lena.

5 “‘Bjale ge e ba le dira dihlabelo tša go dira khutšo le Jehofa,+ le di dire ka tsela yeo e tlago go dira gore a le amogele.+ 6 Nama ya dihlabelo tšeo e jewe letšatšing leo le latelago, eupša seo se šetšego go ba go fihla letšatšing la boraro se fišwe ka mollo.+ 7 Ge e ba nama yeo e šetšego e ka jewa ka letšatši la boraro, sehlabelo seo Modimo a ka se se amogele ka gobane nama yeo ke ditšhila. 8 Motho yo a ka ejago o tla otlwa ka baka la molato wa gagwe ka gobane ga se a hlompha selo se sekgethwa sa Jehofa. Motho yoo a bolawe.

9 “‘Ge le buna mašemong a lena le šie tšeo di lego ka mathoko a mašemo a lena, le gona ge le be le buna le se ke la budutša.*+ 10 Le gona le se ke la tšea diterebe tšeo di šetšego mašemong a lena a diterebe ebile le se ke la topa diterebe tšeo di welego ka mašemong a lena a diterebe. Le di šadišetše modiidi+ le motho yo e sego Moisiraele yo a dulago nageng ya gabo lena. Ke nna Jehofa Modimo wa lena.

11 “‘Le se ke la utswa,+ le se ke la bolela maaka,+ gomme le se ke la radia batho ba bangwe. 12 Le se ke la ena ka leina la ka e le gore le bolele maaka,+ ka go dira bjalo la goboša leina la Modimo wa lena. Ke nna Jehofa. 13 Le se ke la radia batho ba bangwe+ ebile le se ke la ba amoga dilo tša bona.+ Le swanetše go patela motho yo le mo hirilego ka lona letšatši leo.+

14 “‘O se ke wa roga sefoa, le gona o se ke wa bea selo seo se ka wišago sefofu.+ O boife Modimo wa gago.+ Ke nna Jehofa.

15 “‘Le se ke la ahlola ka go hloka toka. Le se ke la gaugela modiidi feela ka gobane e le modiidi, goba la kgetha go bontšha mohumi toka.+ Le ahlole ba bangwe ka toka.

16 “‘O se ke wa tšama o bolela batho gampe.+ O se ke wa bea bophelo bja motho yo mongwe kotsing.+ Ke nna Jehofa.

17 “‘O se ke wa hloya ngwaneno ka pelong ya gago.+ Eupša o mo kgaleme+ e le gore o se ke wa tla wa ba le molato go swana le yena.

18 “‘O se ke wa itefeletša+ le gona o lebalele batho ba setšhaba sa geno. O rate moagišane wa gago ka tsela yeo o ithatago ka yona.+ Ke nna Jehofa.

19 “‘Le latele melao ye ya ka: Le se ke la goelanya diruiwa tša mehuta e mebedi. Le se ke la tswaka dipeu tša mehuta e mebedi tšhemong ya lena ge le bjala.+ Le gona le se ke la apara seaparo seo se logilwego ka digarane tša mehuta e mebedi.+

20 “‘Ge monna a ka robala le mosadi yo e lego lekgoba la monna yo mongwe, eupša lekgoba leo le se la tšwa le patelelwa ka mo go feletšego goba le lokollwa, gona ba otlwe. Ba se ke ba bolawa ka gobane mosadi yoo o be a se a tšwa a lokollwa. 21 Monna yoo a tliše nku e tona ya sebego sa molato go Jehofa mojakong wa taberenakele.+ 22 Moperisita a mo direle sehlabelo* ka nku e tona ya sebego sa molato pele ga Jehofa ka baka la sebe seo a se dirilego. Ke moka Modimo o tla mo lebalela sebe seo sa gagwe.

23 “‘Ge le fihla nageng yeo ke le neago yona, gomme la bjala mehlare ya dienywa, le se ke la ja dienywa tšeo go fihlela go fetile mengwaga e meraro. Mo go lena dienywa tšeo e be tšeo di sa hlwekago le tšeo le thibetšwego go di ja. Le se ke la di ja. 24 Eupša ka ngwaga wa bone dienywa tšeo ka moka e tla ba tše kgethwa gomme la di neela Jehofa le thabile.+ 25 Ngwageng wa bohlano le ka ja dienywa tša yona. Dienywa tšeo le di kgobokeditšego mehlareng yeo, di tla oketša dilo tšeo le di bunnego. Ke nna Jehofa Modimo wa lena.

26 “‘Le se ke la ja selo seo se nago le madi.+

“‘Le se ke la diriša dipheko goba go dira maleatlana.+

27 “‘Le se ke la kota moriri ka mathoko a dihlogo tša lena ebile le se ke la kota mathoko a ditedu tša lena.+

28 “‘Le se ke la itshega mebele ya lena ka baka la mohu,+ le gona le se ke la ikgaya mebeleng. Ke nna Jehofa.

29 “‘O se ke wa goboša morwedi wa gago ka go mo dira mogwebakammele,+ go sego bjalo naga ya lena e tla šilafatšwa ke bagwebakammele, gomme ya tlala ka boitshwaro bjo bobe.+

30 “‘Le bolokeng disabatha tša ka+ ebile le hlomphe lefelo la ka le lekgethwa. Ke nna Jehofa.

31 “‘Le se ke la ya go batho bao ba lekago go boledišana le bahu+ le go bao ba rego ba kgona go bolela dilo tšeo di tlago go direga nakong e tlago,+ e le gore ba se ke ba le šilafatša. Ke nna Jehofa Modimo wa lena.

32 “‘O hlomphe motho yo a nago le moriri o mošweu.+ Le gona o hlomphe motšofadi,+ gomme o boife nna Modimo wa gago.+ Ke nna Jehofa.

33 “‘Ge e ba motho yo e sego Moisiraele a dula le lena nageng ya gabo lena, le se ke la mo swara gampe.+ 34 Motho yo e sego Moisiraele yo a dulago nageng ya gabo lena, le mo sware bjalo ka ge eka ke Moisiraele.+ Le mo rate bjalo ka ge le ithata ka gobane le lena le kile la dula nageng ya Egepeta.+ Ke nna Jehofa Modimo wa lena.

35 “‘Le se ke la hloka toka ge le meta botelele, boima goba le kala diela.+ 36 Le be le dikala tšeo di šomago gabotse le gona le kale dilo gabotse.*+ Ke nna Jehofa Modimo wa lena yo a le ntšhitšego nageng ya Egepeta. 37 Le phele ka melao ya ka ka moka ebile le latele ditaelo tša ka ka moka.+ Ke nna Jehofa.’”