Baroma

7 Ke boledišana le lena banabešo bao ba tsebago Molao. Na ga le tsebe gore Molao o buša motho ge feela a sa phela? 2 Go ya ka Molao wa Moshe mosadi yo a nyetšwego o dula a nyalane le monna wa gagwe ge monna yoo a sa phela. Eupša ge monna yoo a ka hlokofala, mosadi yoo o lokologile go ka nyalwa ke monna yo mongwe.*+ 3 Ge a ka nyalwa ke monna yo mongwe mola monna wa gagwe a sa phela, gona ke sehlotlolo* eupša ge e ba monna wa gagwe a ka hlokofala, o lokologile go nyalwa ke monna yo mongwe.+ Ka gona ge a ka nyalwa ke monna yo mongwe, o tla be a sa hlotlole.+

4 Ka mo go swanago banabešo, sehlabelo sa Kriste se le lokolotše Molaong wa Moshe.* Se se diragetše gore le be ba Kriste+ yo a tsošitšwego bahung+ le gore le kgone go hlankela Modimo.*+ 5 Ge re be re phela ka go dumelelana le dikganyogo tša nama, Molao o ile wa dira gore re bone gore dikganyogo tša rena di dira gore re dire sebe. Sebe seo ke sona se dirago gore re hwe.+ 6 Gona bjale re lokolotšwe Molaong+ ebile Molao woo ga o sa na maatla a go re laola. Ka baka leo re swanetše go ba makgoba ka ge re hlahlwa ke moya o mokgethwa+ e sego ka baka la ge re hlahlwa ke molao.+

7 Na Molao ke sebe? Aowa. Ke be nka se tsebe gore sebe ke eng ge nkabe e se ka Molao.+ Ka mohlala ke be nka se tsebe gore go duma tša ba bangwe ke phošo ge nkabe Molao o se wa re: “O se ke wa duma go tšea dilo tša batho ba bangwe.”+ 8 Eupša molao o ile wa dira gore ke dume dilo tša go fapafapana tše mpe. Pele molao woo o ka ba gona sebe se be se se na maatla.+ 9 Ge e le gabotse, ke be ke phela pele molao o ka ba gona eupša ka morago ga gore molao woo o be gona, ke ile ka thoma go bona gore ke na le sebe gomme gwa ba bjalo ka ge eka ke hwile.+ 10 Molao wo o bego o swanetše go dira gore ke phele,+ o ile wa dira gore ke hwe. 11 Ka baka la Molao, sebe se ile sa hwetša tsela ya go nteka le go mpolaya. 12 Ka baka leo, Molao ke o mokgethwa le dilo tšeo Molao o di bolelago ke tše kgethwa, di lokile ebile di a hola.+

13 Na se sa ra gore selo seo se nago le mohola se dirile gore ke hwe? Aowa, ke bolailwe ke sebe. Molao o na le mohola, eupša ke wona o bontšhitšego gabotse gore sebe ke sona se mpolayago+ le gore sebe ga se kgahliše le gatee.+ 14 Re a tseba gore Modimo o re neile Molao a diriša moya wa gagwe eupša ga se ka phethagala, ke rekišitšwe gore ke be lekgoba la sebe.+ 15 Ga ke kwešiše gore ke ka baka la eng ke dira dilo tšeo ke di dirago. Ka gobane go e na le go dira dilo tšeo ke nyakago go di dira, ke dira dilo tšeo ke di hloilego. 16 Ke a dumela gore Molao o a hola eupša ke sa phela ke dira dilo tšeo ke sa nyakego go di dira. 17 Ga se nna ke dirago dilo tše tše mpe eupša sebe seo se lego mo mmeleng wa ka ke sona se dirago dilo tšeo.+ 18 Ke a tseba gore ka mo gare ga ka, ke gore nameng ya ka, ga go dule selo se sebotse ka gobane le ge ke kganyoga go dira se sebotse, ga ke kgone.+ 19 Ga ke dire dilo tše dibotse tšeo ke nyakago go di dira, go e na le moo ke dira dilo tše mpe tšeo ke sa nyakego go di dira. 20 Bjale ge ke dira dilo tšeo ke sa nyakego go di dira go ra gore ga se nna ke di dirago, di dirwa ke sebe seo se lego go nna.

21 Nnete ke gore ge ke nyaka go dira seo se lokilego, ke no ikhwetša ke dira se sebe.+ 22 Ke tloga ke rata molao wa Modimo ka pelo ya ka ka moka.+ 23 Eupša mmeleng wa ka go na le molao o mongwe wo o lwago le molao wo o lego monaganong wa ka+ ebile o dira gore ke laolwe ke sebe+ seo se lego mmeleng wa ka. 24 Ruri ke hlomola pelo! Ke mang a tlago go mphološa mmeleng wo wo o dirago gore ke hwe? 25 Ke leboga Modimo ka gobane o mphološa a diriša Morena wa rena Jesu Kriste. Ka monaganong wa ka ke lekgoba la molao wa Modimo. Eupša mmele wa ka ke lekgoba la molao wa sebe.+