Tito

1 Nna Paulo, ke mohlanka wa Modimo le moapostola wa Jesu Kriste. Tumelo ya ka e dumelelana le ya bao Modimo a ba kgethilego le dithuto tša nnete. Nnete yeo e dumelelana le go ineela go Modimo. 2 Go ineela moo go theilwe go kholofelong ya bophelo bjo bo sa felego+ bjoo Modimo yo go sa kgonegego gore a bolele maaka+ a bo tshepišitšego go tloga kgale, 3 eupša ka nako ya gagwe e swanetšego o ile a dira gore batho ba tsebe lentšu la gagwe a diriša ditaba tše dibotse tšeo ke ilego ka kgethwa+ gore ke di bolele ke laetšwe ke Mophološi wa rena, yena Modimo. 4 Ke ngwalela wena Tito ngwanaka wa makgonthe le modumedigotee le nna ke re:

Eka Modimo Tatago rena le Kriste Jesu Mophološi wa rena ba ka go bontšha botho bjo bogolo le go go nea khutšo.

5 Ke go tlogetše Kereta gore o lokiše dilo tšeo di nyakago go lokišwa le gore o kgethe bagolo motseng o mongwe le o mongwe, bjalo ka ge ke go laetše ka re: 6 Mogolo ga se a swanela go ba le seo batho ba mo latofatšago ka sona, a be le mosadi o tee, bana ba gagwe e be Bakriste bao ba sa latofatšwego ka gore ga ba laolege goba gore ga ba kwe.+ 7 Ka ge mogolo e le mohlanka wa Modimo, o swanetše go ba le leina le lebotse, a se ke a itirela boithatelo,+ e se be sefelapelwana,+ e se be setagwa, e se be ntwadumela, e se be yo a inyakelago dilo tša go ikhola ebile a se ke a ba le megabaru, 8 eupša e be yo a ratago go amogela baeng,+ yo a ratago go loka, yo a naganago gabotse,+ yo a dirago dilo tše di lokilego, yo a tshepegago,+ yo a kgonago go itshwara,+ 9 ge a ruta a latele kgauswi dithuto tša nnete+ e le gore a kgone go kgothatša a diriša dithuto tšeo,+ le go kgala+ bao ba ganetšanago le dithuto tšeo.

10 Gobane go na le batho ba bantši bao ba sa kwego, bao ba bolelago dilo tšeo di se nago mohola, bao ba forago batho ba bangwe, kudukudu bao ba rego batho ba swanetše go bolla.+ 11 O tswalele batho bao melomo, ka gobane ba aroša malapa ka go a ruta dilo tšeo ba sa swanelago go di ruta e le gore ba ikgobokeletše dilo tše dintši ka go se tshepege. 12 Yo mongwe wa bona, e lego yo mongwe wa baporofeta ba bona o itše: “Bakereta ba dula ba bolela maaka, ke dibata tše šoro ebile ke batho ba go tšwafa bao ba ratago go ja kudu.”

13 Bohlatse bjo ke bja nnete. Ka baka leo tšwela pele o ba kgalema ka maatla e le gore ba be le tumelo e tiilego, 14 ba se ke ba theetša ditori tšeo Bajuda ba inaganelago tšona le ditaelo tša batho bao ba tlogetšego nnete. 15 Dilo ka moka di hlwekile go batho ba hlwekilego,+ eupša go batho bao ba šilafetšego le bao ba se nago tumelo ga go na se se hlwekilego, ka gobane menagano ya bona le matswalo a bona di šilafetše.+ 16 Ba tšama ba botša batho gore ba tseba Modimo, eupša dilo tšeo ba di dirago ga di dumelelane le seo ba se bolelago+ ka gobane ba a šišimiša, ga ba kwe ebile ga ba swanelege go dira selo le ge e le sefe se sebotse.