Timotheo wa Pele
2 Sa pele, ke kgopela gore le rapelele batho ba mehuta ka moka go tšwa pelong, le kgopele Modimo gore a ba thuše le be le mo leboge. 2 Ke kgopela le gore le rapelele dikgoši le batho ka moka ba maemo a godimo,+ e le gore re tle re phele re iketlile re sa tshwenywe ke selo, re botegela Modimo ebile re dira dilo ka moka ka mafolofolo.+ 3 Se ke se sebotse ebile se lokile go Mophološi wa rena, yena Modimo+ 4 yo a nyakago gore batho ba mehuta ka moka ba phološwe+ le gore ba tsebe nnete. 5 Ka gobane go na le Modimo o tee+ le motho o tee yo e lego mmoelanyi*+ wa kgwerano yeo Modimo a e dirilego le batho.+ Motho yoo ke Kriste Jesu,+ 6 yoo a ilego a neela bophelo bja gagwe e le topollo yeo e bego e nyakega e le gore batho ka moka ba lokollwe sebeng.+ Batho ba tla bolela ka taba ye ka nako e swanetšego. 7 Ke ka baka leo+ Modimo a nkgethilego gore ke be moapostola,+ le gore ke rute batho bao e sego Bajuda+ nnete le gore ba be le tumelo. Ke le botša nnete, ga ke le botše maaka.
8 Ka gona ke duma gore lefelong le lengwe le le lengwe leo le kopanago go lona, banna e dule e le ba bakgethwa ge ba emišetša diatla tša bona godimo ba rapela,+ ebile ba se ke ba galefa+ le go ngangišana le batho ba bangwe.+ 9 Basadi le bona ke ba kgothaletša gore ba ikgabiše ka go apara gabotse, ka tsela yeo e sa solegego le yeo e bontšhago gore ba nagana gabotse. Ba se ke ba ikgabiša ka go loga meriri ka tsela e feteletšego, ba ikgabiša ka gauta, diperela goba ka diaparo tšeo di turago kudu,+ 10 eupša ba ikgabiše ka go dira mediro e mebotse, e lego tsela ya go ikgabiša yeo e swanelago basadi bao ba ipolelago gore ba ineetše go Modimo.+
11 Anke mosadi a ikhomolele gomme a ikokobetše ge a rutwa.+ 12 Ga ke dumelele mosadi go ruta goba go laola monna, eupša o swanetše go homola.+ 13 Ka gobane Adama o bopilwe pele, ke moka ka morago gwa bopša Efa.+ 14 Le gona Adama ga se a forwa, eupša mosadi ke yena a ilego a forwa+ ka mo go feletšego gomme a tshela molao. 15 Eupša mosadi o tla holega ka go belega bana+ ge e ba a dula a na le tumelo, lerato, e le yo mokgethwa ebile a dira dilo tšeo di bontšhago gore o nagana gabotse.+