Dipotšišo tše Tšwago go Babadi

◻ Na Jesu ke Mmoelanyi wa Bakriste ba tloditšwego ka moya feela goba wa batho ka moka, ka ge 1 Timotheo 2:5, 6 e mmolela e le “mmoelanyi” yo a “ikxafilexo a ba selefá sa xo lefêla bohlê”?

Beibele e rwele bobedi dithuto tša motheo le ditherešo tše tseneletšego, tšeo e lego dijo tše tiilego bakeng sa go ithuta. Thuto e nngwe e bjalo e akaretša karolo ya Jesu Kriste e le Mmoelanyi. Moapostola Paulo o ngwadile gore: “Xobane Modimo ké Yêna o tee yó; le Mmoêlanyi wa xo boêlanya Modimo le batho ké Yêna o tee yó, Yêna motho Jesu Kriste, Yêna a ikxafilexo a ba selefá sa xo lefêla bohlê; ké byôna bohlatse bya xo tla ka lebaka lé la byôna.”—1 Timotheo 2:5, 6.

Gore re kwešiše seo Paulo a se bolelago, sa pele re swanetše go lemoga gore Beibele e nea mafelelo a mabedi bakeng sa batho ba botegago: (1) bophelo bjo bo phethagetšego paradeiseng ya lefase le (2) bophelo bja legodimong bakeng sa “mohlatswana o monyenyane” wa Kriste, wa ba 144 000. (Luka 12:32; Kutollo 5:10; 14:1-3) Bojakane bo ruta gore batho ka moka ba lokilego ba ya legodimong, e lego boemo bjo e sego bja mangwalo bjo e lego pono ya batho ka kakaretšo, e lego gore Jesu o lebelelwa e le mmaditsela wa batho ba bjalo ka moka. Ka gona, Beibele e bontšha’ng?

Lentšu la Segerika me·siʹtes, le le dirišitšwego bakeng sa “mmoelanyi,” le bolela ‘motho yo a emego gare ga dihlopha tše pedi.’ E be e le ‘lentšu le nago le dibopego tše ntši la tša mahlale la leleme la molao la Segerika.’ Moprofesara Albrecht Oepke (Theological Dictionary of the New Testament) o bolela gore me·siʹtes e be e le “le lengwe la mantšu a tša mahlale ao a dirišwago ka ditsela tše ntši kudu tlotlontšung ya molao wa Segerika.”

Eupja ke ka baka la’ng Beibele e diriša lentšu la molao bakeng sa karolo ya Jesu ya boboelanyi? Ela hloko seo Paulo a se ngwadilego ka Molao wa Modimo wo o neilwego ba-Isiraele bao ba bokanego ka pele ga Thaba ya Sinai e le motheo: “O laetšwe ka barongwa ka seatla sa mmoelanyi.” (Ba-Galatia 3:19, 20, Phetolelo ya Kgale) Mmoelanyi yoo e be e le Moše. E be e le moemedi magareng ga Jehofa le setšhaba sa nama sa Isiraele. Moemedi wa eng? Bakeng sa go hloma kgwerano goba kwano ya molao magareng ga Modimo le setšhaba.a

Na se se bolela gore go na le kgopolo e kgethegilego ya molao e akaretšwago karolong ya Jesu e le Mmoelanyi? Ee. Ela hloko tlhaloso ya Paulo go Ba-Hebere 8:6. Ka morago ga go bolela ka tabarenakele le diswantšho tše dingwe tše swanago tlase ga kgwerano ya Molao, o ngwadile gore: “Byale ó [Jesu] xafetšwe bolaki byo bo fetaxo bya bála kxolê-kxolê, ka xe a tlile a ba Khumedi [mmoelanyi] ya kxwêranô ye e fetaxo yela ka boxolo, kxwêranô ye e tiišitšwexo ka dikholofedišô tše di fetaxo tša yela.” “Kxwêranô ye e fetaxo yela” e be e le kgwerano e mpsha, e lego ye e tšerego sebaka sa kgwerano yeo mmoelanyi wa yona e bego e le Moše. (Ba-Hebere 8:7-13) Kgwerano e mpsha e be e ‘hlomilwe ka molao.’ E theile motheo bakeng sa balatedi ba bangwe ba Kriste, go thoma ka baapostola, wa go “tsêna Sekxêthwa-kxethweng,” e lego legodimo ka bolona.—Ba-Hebere 9:24; 10:16-19.

Go sa na le dipontšho tše dingwe tša molao tša karolo ya Jesu e le Mmoelanyi wa “kxwêranô e mpsha.” Ge a be a hlalosa ka kholofetšo ya Modimo go Psalme 110:4, Paulo o ngwadile gore: “Jesu o bile moemedi [enʹgy·os] wa kgwerano e phadišago yela.” (Ba-Hebere 7:22, Phetolelo ya Kgale) Ke mo feela moo Beibele e dirišago lentšu enʹgy·os. The New International Dictionary of New Testament Theology e re:“Engyos o be a kgonthišetša gore taelo ya molao e a phethagatšwa.” Ka gona Jesu e le Mmoelanyi wa kgwerano e mpsha o dira e le moemedi wa molao gore ‘kholofelo e botse’ e phethege.—Ba-Hebere 7:19.

Go na le mo gongwe moo Paulo a dirišago lentšu le lengwe le le nago le kgopolo ya molao, ar·ra·bonʹ, le le fetoletšwego “seswantšho.” Pukuntšu yona yeo e re: “Lentšu la Segerika arrabōn . . . ke kgopolo ya molao e tšwago lelemeng la tša kgwebo le mediro.” Ela hloko kamoo Paulo a dirišago lentšu le la molao: “Yo a re kgethilego ke Modimo. Le gona o beile seka go rena gomme a re nea seswantšho sa seo se tlago go tla, ke gore, moya, dipelong tša rena.” (2 Ba-Korinthe 1:21, 22, NW) Go tšwelela mo gongwe gape ga ar·ra·bonʹ ka makga a mabedi ke mo go lego mabapi le go tlotša ga Modimo Bakriste ka moya, a ba tlišetša ‘moputso wa ka go sa felego goba bohwa legodimong’ e le barwa ba moya ba Modimo.—2 Ba-Korinthe 5:1, 5; Ba-Efeso 1:13, 14; bona Kingdom Interlinear Translation of the Greek Scriptures.

Ka gona, go molaleng gore kgwerano e mpsha ga se thulaganyo e fokolago e buletšwego batho ka moka. Ke thulaganyo ya molao e rulagantšwego ka kelohloko e akaretšago Modimo le Bakriste ba tloditšwego.

Se se swanetše go re thuša go kwešiša 1 Timotheo 2:5, 6. Mo go boletšwe ka “mmoelanyi” ka morago ga go tšwelela ga lentšu ka makga a mangwe a mahlano mangwalong a ngadilwego pele. Ka gona, Timotheo o be a tla ba a kwešišitše boboelanyi bja Jesu e le karolo ya Gagwe ya molao e tswalanago le kgwerano e mpsha. The Pastoral Epistles, e ngwadilwego ke Dibelius le Conzelmann, e dumela gore go 1 Timotheo 2:5 ‘lentšu “mmoelanyi” le na le tlhaloso ya molao,’ le gore “gaešita lege temaneng ye, go fapana le go Ba-Heb. 8:6, [kgwerano] e sa bolelwa, lega go le bjalo motho ga a swanela go kamaka hlaloso ‘mmoelanyi wa kgwerano,’ bjalo ka ge moko wa taba o bontšha bjalo.” Moprofesara Oepke o bolela gore 1 Timotheo 2:5 e tšweletša Jesu e le “ramolao le mmoleledi.”

Seswantšho sa mehleng yeno mo gongwe se ka thuša go hlatholla se, kudu-kudu ge e ba o se Mokriste yo a tloditšwego ka moya. Nagana ka molato woo go wona ramolao a akaretšwago. Karolo ya gagwe mo gongwe e ka ba e sa swanego ka kudu le ya ramolao yo a ngangišanago ka toka go swana le ya yo e lego mmoelanyi goba yo a tlišago kgokagano ya molao e amogelegago le e holago dihlopha tše pedi. Ee, ga o akaretšwe molatong woo, ka gona ka kgopolo yeo ga a dire e le ramolao wa gago. Lega go le bjalo, mo gongwe e ka ba mogwera wa gago wa kgaufsi-ufsi yo a go neago thušo e holago ka ditsela tše dingwe.

Ka dinako tše dingwe modiro wa ramolao o tšweletša mafelelo a holago ba bangwe ba bantši. Go bjalo ka mediro ya Jesu ya molao e le Mmoelanyi wa kgwerano e mpsha. E tšweletša seo kgwerano ya Molao e sa kago ya se dira, e lego “mmušo wa baperisita” wa legodimong. (Ekisodo 19:6; 1 Petro 2:9, NW) Ka morago ga moo Bakriste ba tloditšwego ba tla šoma Mmušong gotee le Jesu ba le legodimong go tliša tšhegofatšo go “ditšhaba ka moka tša lefase.”—Genesi 22:18.

Batho ba ditšhaba ka moka bao ba nago le kholofelo ya bophelo bjo bo sa felego lefaseng ba holega gaešita le mo nakong ye ka ditirelo tša Jesu. Gaešita lege e se Mmoelanyi wa bona wa molao ka ge ba se kgweranong e mpsha, ke yena tsela ya bona ya go batamela Jehofa. Jesu o itše: “Tsela ké nna, le therešô, le bophelô. Xa xo e a tlaxo xo Tate xe e se ka Nna.” (Johane 14:6) Bohle bao ba tlago go hwetša bophelo lefaseng ba swanetše go iša dithapelo tša bona go Jehofa ka Jesu. (Johane 14:13, 23, 24) Le gona Jesu o dira e le Moperisita o Mogolo yo a nago le kwelobohloko yo a kgonago go diriša mehola ya sehlabelo sa gagwe bakeng sa bona, a ba dumelela go hwetša tshwarelo le phologo mafelelong.—Ditiro 4:12; Ba-Hebere 4:15.

Ka gona, 1 Timotheo 2:5, 6 ga e diriše “mmoelanyi” ka kgopolo e nabilego go swana le malemeng a mantši. Ga e bolele gore Jesu ke mmoelanyi magareng ga Modimo le batho ka moka. Go e na le moo, e šupa Jesu e le Mmoelanyi wa molao (goba “ramolao”) wa kgwerano e mpsha, ye e le tsela e lekanyeditšwego yeo ka yona Beibele e dirišago lentšu le. Jesu le gona ke topollo ya bohle bao ba lego kgweranong yeo, bobedi ba-Juda le Ba-ntle, bao ba tlago go amogela bophelo bja go se hwe legodimong. Moapostola Johane o boletše ka ba go 1 Johane 2:2. Eupja o bontšhitše gore ba bangwe le bona ba tla amogela mohola wa sehlabelo sa Kriste: “Ké Yêna seloba sa dibe tša rena; xomme xa se sa tša rena fêla; ké Yêna seloba sa dibe tša lefase ka moka.”

Ba “lefase ka moka” ke bohle bao ba tlago go hwetša bophelo bjo bo sa felego paradeiseng e tsošološitšwego ya lefase. Dimilione tša bahlanka ba bjalo ba amogetšwego ba Modimo di na le kholofelo e bjalo ya lefase mo nakong ye. Ba lebelela Jesu e le Moperisita wa bona o Mogolo le Kgoši yoo ka yena ba ka kgonago go batamela Jehofa letšatši le letšatši. Ba ithekga ka topollo ya Jesu, yeo ba e neilwego go swana lege e tla newa banna ba swanago le Aborahama, Dafida le Johane Mokolobetši ge ba tsošwa. (Mateo 20:28) Ka gona, sehlabelo sa Kriste se tla lebiša batho ka moka bao ba kwago bophelong bjo bo sa felego.

[Mongwalo wa tlase]

[Seswantšho go letlakala 31]

Mo Thabeng ya Sinai, Moše o dirile e le mmoelanyi wa kgwerano ya Molao

[Credit Line]

Pictorial Archive (Near Eastern History) Est.