Ebangedi ya Luka

6 Bjale, Jesu o ile a feta ka gare ga mašemo a korong ka Sabatha a na le barutiwa ba gagwe, gomme bona ba be ba ekga korong,+ ba e fogohla ka diatla tša bona+ ke moka ba eja. 2 Ge Bafarasei ba bangwe ba bona seo, ba ile ba re go bona: “Ke ka baka la eng le dira seo molao o sa dumelego gore se dirwe ka Sabatha?”+ 3 Ke moka Jesu a re go bona: “Na ga se la ka la bala ka seo Dafida a ilego a se dira ge yena le banna bao ba bego ba na le yena ba be ba swerwe ke tlala?+ 4 O ile a tsena ka ntlong ya Modimo gomme moperisita yo a phagamego a mo fa dinkgwa tšeo di neetšwego Modimo* ke moka Dafida le banna bao ba bego ba na le yena ba di ja. Go ya ka molao, ba be ba se ba dumelelwa go ja dinkgwa tšeo ka ge e be e le baperisita feela bao ba bego ba dumeletšwe go di ja.”+ 5 Ke moka a re go bona: “Morwa wa motho ke yena Morena wa Sabatha.”+

6 Ka Sabatha+ e nngwe o ile a tsena sinagogeng gomme a thoma go ruta. Go ile gwa tla monna yoo seatla sa gagwe sa le letona se bego se omeletše.*+ 7 Ditsebi tša molao le Bafarasei ba be ba mo tsepeletše go bona ge e ba o tla fodiša batho ka Sabatha, e le gore ba tle ba mo phare ka molato. 8 Eupša ka ge a be a tseba seo ba bego ba se nagana,+ o ile a botša monna yo a bego a omeletše seatla a re: “Ema o tle mo gare ga holo.” Ke moka monna yoo a ema a ya moo. 9 Ka morago Jesu a ba botšiša a re: “Ke dilo dife tšeo molao o di dumeletšego gore di dirwe ka Sabatha, na ke tše dibotse goba ke tše mpe? Na ke go phološa bophelo bja motho goba ke go bo fediša?”+ 10 Ka morago ga gore Jesu a ba lebelele ka moka ga bona, o ile a re go monna yoo: “Otlolla seatla sa gago.” Ke moka monna yoo a se otlolla, gomme seatla sa gagwe sa fola. 11 Eupša ba galefa kudu gomme ba thoma go boledišana ka seo ba ka se dirago Jesu.

12 Ka letšatši le lengwe o ile a ya thabeng gore a yo rapela,+ ke moka a fetša bošego ka moka a rapela Modimo.+ 13 Ge bo esa o ile a bitša barutiwa ba gagwe gomme a kgetha ba 12 gare ga bona, ke moka a ba bitša baapostola.+ 14 Bona ke Simone yo a ilego a mo reela leina a re ke Petro, Andrea ngwanabo, Jakobo, Johane, Filipi,+ Baratholomeo, 15 Mateo, Thomase,+ Jakobo morwa wa Alifeose, Simone yo a bitšwago “yo a fišegago,” 16 Judase morwa wa Jakobo le Judase Isikariote yoo ka morago a ilego a mo rekiša.

17 Ke moka a theoga thabeng le bona a ema lefelong leo le bego le le molaleng. Go be go na le lešaba le legolo la barutiwa ba gagwe le lešaba le legolo kudu la batho bao ba tšwago ditikologong ka moka tša Judea le Jerusalema. Ba bangwe ba be ba etšwa nageng ya Tiro le Sidone, tšeo di bego di le kgauswi le lebopo. Batho bao ba be ba tlile go mo theetša ge a ruta le gore a ba fodiše malwetši a bona. 18 O be a fodiša le batho bao ba bego ba tshwenywa ke meoya e mebe. 19 Le gona ge batho ba be ba mo kgwatha, maatla a be a etšwa go yena+ gomme ka moka ga bona ba be ba fola malwetši a bona. Ka baka la seo, batho ka moka ba be ba nyaka go mo kgwatha.

20 Ke moka a lebelela barutiwa ba gagwe, a re go bona:

“Go thaba lena badiidi, ka gobane Mmušo wa Modimo ke wa lena.+

21 “Go thaba lena bao le swerwego ke tlala gona bjale, ka gobane le tla khora.+

“Go thaba lena bao le llago gona bjale, ka gobane le tla sega.+

22 “Go thaba lena ge batho ba le hloya,+ ba le kgetholla,+ ba le roga ebile ba le senya maina* ka baka la Morwa wa motho. 23 Dilo tšeo ke tšona tšeo borakgolokhukhu ba bona ba di dirilego baporofeta.+ Ka gona letšatšing leo le thabe le be le tshelatshele le thabile ka gobane moputso wa lena ke o mogolo legodimong.

24 “Eupša ba madimabe ke lena bahumi,+ ka gobane le šetše le hweditše maipshino ka moka ao le bego le tla a hwetša.+

25 “Lena bao le khorago gona bjale, le ba madimabe ka gobane le tla swarwa ke tlala.

“Lena bao le segago gona bjale, le ba madimabe ka gobane le tla lla la ba la nyama kudu.+

26 “Lena bao batho ba le bolelago gabotse le ba madimabe,+ ka gobane se ke seo borakgolokhukhu ba bona ba se dirilego baporofeta ba maaka.

27 “Eupša ke re go lena le theeditšego: Tšwelang pele le rata manaba a lena, bao ba le hloilego le ba direle dilo tše dibotse,+ 28 le šegofatše bao ba le rogago, le be le rapelele bao ba le hlapaolago.+ 29 Yo a go bethago lerameng, mo dumelele a go bethe le go le lengwe. Yo a go tšeelago seaparo sa ka ntle, mo dumelele a tšea le sa ka gare.+ 30 Motho yo mongwe le yo mongwe yo a go kgopelago selo se itšego,+ o mo fe sona, gomme yo a go tšeelago dilo tša gago, o se ke wa mo kgopela gore a di buše.

31 “Le gona, o sware batho ba bangwe ka tsela yeo le wena o nyakago ba go swara ka yona.+

32 “Ge e ba le rata bao ba le ratago, seo se le hola ka eng? Ka gobane badiradibe le bona ba rata bao ba ba ratago.+ 33 Ge e ba le direla batho dilo tše dibotse ka gobane le bona ba le diretše dilo tše dibotse, gona seo se le hola ka eng? Badiradibe le bona ba dira sona seo. 34 Le gona, ge e ba le adima* batho tšhelete yeo le tsebago gore ba tlo le patela yona, seo se le hola ka eng?+ Badiradibe le bona ba adima badiradibe ba bangwe tšhelete ka ge ba tseba gore ba tlo ba patela yona e feletše. 35 Eupša lena tšwelang pele le rata manaba a lena gomme le direle batho dilo tše dibotse le go ba adima dilo le sa nyake gore ka morago ba tle ba le direle dilo,+ ke moka le tla šegofatšwa kudu gomme la ba barwa ba Modimo yo Godimodimo, ka gobane le batho bao ba sa lebogego le ba babe o ba bontšha botho.+ 36 Tšwelang pele le gaugela batho ba bangwe go swana le ge Tatago lena a ba gaugela.+

37 “Go oketša moo, tlogelang go ahlola gomme le lena le ka se ahlolwe,+ tlogelang go swaya batho diphošo le lena le ka se swaiwe diphošo. Tšwelang pele le lebalela batho ba bangwe le lena le tla lebalelwa.+ 38 Itlwaetšeng go fa batho ba bangwe dilo gomme le bona ba tla le fa.+ Ba tla le tšhelela dipotleng* tša diaparo tša lena karolo e lekanego yeo e katetšwego le yeo e lekalekantšhitšwego gabotse ya ba ya tlala wa go falala. Ka gobane tsela yeo le swarago ba bangwe ka yona, le lena le tla swarwa ka yona.”*

39 Ke moka a ba a ba botša papišo a re: “Na sefofu se ka kgona go hlahla sefofu? Na bobedi bja tšona di ka se wele ka moleteng?+ 40 Morutwana* ga a fete morutiši wa gagwe, eupša yo mongwe le yo mongwe yo a rutilwego gabotse o tla swana le morutiši wa gagwe. 41 Bjale, ke ka baka la eng o lebelela lehlokwa leo le lego ka leihlong la ngwaneno eupša o sa bone kota yeo e lego ka leihlong la gago?+ 42 O ka botša bjang ngwaneno wa re: ‘Ngwanešo, e re ke go ntšhe lehlokwa le le lego ka leihlong la gago,’ mola wena o na le kota ka leihlong la gago? Wena moikaketši! Thoma pele ka go ntšha kota yeo e lego ka leihlong la gago, ke moka o tla bona gabotse gore o ka ntšha bjang lehlokwa leo le lego ka leihlong la ngwaneno.

43 “Ga go na mohlare o mobotse wo o enywago dienywa tša go bola, ebile ga go na mohlare wa go bola woo o enywago dienywa tše dibotse.+ 44 Ka gobane mohlare o mongwe le o mongwe o tsebja ka dienywa tša wona.+ Ka mohlala, batho ga ba fule mago meetlweng goba ba kga diterebe mohlareng wa meetlwa. 45 Motho yo a lokilego o bolela dilo tše di lokilego ka gobane pelong ya gagwe go na le dilo tše di lokilego. Eupša motho yo mobe o bolela dilo tše mpe ka gobane pelong ya gagwe go tletše dilo tše mpe ka ge molomo wa gagwe o bolela se se tletšego pelong.+

46 “Bjale, ke ka baka la eng le mpitša le re ‘Morena, Morena,’ eupša le sa dire dilo tše ke di bolelago?+ 47 Yo mongwe le yo mongwe yo a ntšhalago morago le go kwa seo ke se bolelago, ke tla le bontšha gore o swana le mang.+ 48 O swana le monna yo a rego ge a aga ntlo, a epa a iša fase gomme a aga fantešeni godimo ga leswika. Ge pula e ena ka mafula, meetse a noka a ile a tla ka lebelo a lebile ntlong yeo. Eupša ntlo yeo ga se ya ka ya šikinyega ka gobane e be e agilwe gabotse.+ 49 Ka lehlakoreng le lengwe, yo a kwago se ke se bolelago eupša a se se dire,+ o swana le motho yo a agilego ntlo yeo e se nago fantešeni. Ge pula e ena ka mafula, meetse a noka a ile a tla ka lebelo a lebile ntlong ye gomme ntlo yeo ya phušoga gateetee gomme ntlo yeo ya senyega wa go se sa lokišega.”