Molao wa Gauta—Ke ka Baka La’ng o sa Dutše o le Bohlokwa?

GAUTA e sekilego le ka mohla ga e galoge, ka gona mafsika a bohlokwa a kgabišitšwego ka gauta a tšewa e le a bohlokwa. Go e na le go lahla dilo tša gauta tše senyegilego, barudi ba gauta ba diriša lefsa lefsika le la bohlokwa go dira setšweletšwa se se sefsa sa bokgabo ka gobane gauta e dula e e-na le mohola.

Ka mo go swanago, gaešita lege e ba Jesu a ile a bolela Molao wa Gauta mo e ka bago nywaga e dikete tše pedi e fetilego, mohola wa wona ga se wa theoga. Ka go hlahloba goba go nyakišiša mabaka a go ba ga wona o bohlokwa re ka lemoga kudu mohola wa wona lehono.

Ge Jesu a be a re nea Molao wa Gauta o rego, “tšohle tše Le rataxo xore batho ba Le dirêle tšôna, le lena Le ba dirêlê tšôna-tšeo,” o ile a oketša ka gore: “Xobane Molaô o r’yalo, le bôná baporofeta.” (Mateo 7:12) Barutiwa ba Jesu le bao ba bego ba mo theeditše ba ile ba kwešiša bjang se?

‘Seo Molao le Baporofeta ba se Bolelago’

“Molaô” o be o šupa mangwalong a pele ao a dirilego dipuku tše hlano tša mathomo tša Beibele, go tloga go Genesi go ya go Doiteronomio. Tše di utolla morero wa Jehofa wa go tšweletša peu yeo e bego e tla fediša bobe. (Genesi 3:15) Molao goba sehlopha sa ditaelo se be se akareditšwe dipukung tša pele tša Beibele, tšeo Jehofa ka 1513 B.C.E. a ilego a di nea setšhaba sa Isiraele ka Moše a le bjalo ka mmoelanyi Thabeng ya Sinai.

Molao wa Modimo o be o arola ba-Isiraele ditšhabeng tša baheitene tšeo di bego di ba dikologile, gomme ba-Isiraele ba be ba ka se ke ba dira selo lege e le sefe seo se bego se tla dira gore ba kwanantšhe boemo bja bona bjo amogelegago pele ga Jehofa. Ba be ba le baruiwa ba kgethegilego ba gagwe gomme ba be ba swanetše go dula ba le bjalo gore ba hwetše ditšhegofatšo tša gagwe. (Ekisodo 19:5; Doitorenomio 10:12, 13) Eupja go tlaleletša boikarabelong bja bona go Modimo, Molao wa Moše o ile wa bolela boikarabelo bja ba-Isiraele bja go dira go loka go badudi ba ba diiletšego Isiraeleng. Ka mohlala, o itše: “Moeng e a diiletšexo xo lena a dulê xo lena byalo ka motho wa xeno e a tswaletšwexo xaê. O mo ratê ka mokxwa wo O ithataxo ka wôna; ka xobane le lena Le kile la ba badiiledi naxeng ya Egipita. Ké nna Morêna Modimo wa lena.” (Lefitiko 19:34) Nakong ya dikgoši kua Isiraele, badiiledi ba šele ba ile ba thabela ditokelo tše dintši, go swana le go ba le karolo go agweng ga tempele ya Modimo kua Jerusalema.—1 Koronika 22:2.

Molao wo o bego o neilwe Isiraele o be o iletša bootswa, go bolaya, go utswa le megabaru. Ditaelo tše go akaretša “le xe xo ka ba le molaô o mongwê,” di be di ka akaretšwa ke taelo e rego, “Wa xeno o mo rate ka mokxwa wo O ithataxo ka wôna.” Moapostola Paulo o ile a oketša ka gore: “Lerato xa le senyetše motho; byale phêtho ya molaô ke lona lerato.”—Ba-Roma 13:9, 10.

Ge e ba Molao o be o akareditše wona motheo wa Molao wa Gauta, gona go ka thwe’ng ka “Baporofeta”?

Dipuku tša boporofeta tša Mangwalo a Sehebere ka mo go swanago di thekga go ba ga Molao wa Gauta o bohlokwa. Di bontšha Jehofa e le Modimo yo a phethago morero wa gagwe ka go botega. O šegofatša bahlanka ba gagwe ba botegago, bao lege e le ba sa phethegago ba lekago go dira thato ya gagwe le go bontšha tshokologo ya kgonthe ditirong tša bona tša go aroga. “Hlapang, Le tšwê dithšila; mediro ya lena e mebe le e tloše pele xa-ka, bobe le bo lahlê. Ithuteng xo dira tše di botse; nyakang moahlolêlo wa xo loka, Le hlakodiše ba hlakaxo, Le namolêlê dišuana; bahloloxadi le ba lwêlê.”—Jesaya 1:16, 17.

Ge batho ba Modimo ba be ba dira se se lokilego go ba bangwe le go Modimo, gona Jehofa o ile a kgonthišetša go ba thekga. “Morêna o re: Lôtôlang moahlolêlô, Le yê ka tokô, . . . Motho wa lehlôxônôlô ké e a di diraxo, ngwan’a-motho e a di swaraxo.”—Jesaya 56:1, 2.

Kriste o Hlahla Phuthego ya Gagwe

Kriste o be a tlile go phetha Molao le Baporofeta, gomme ga e sa le go tloga mehleng ya gagwe, morero wa Jehofa wa ka mo go sa felego o ile wa tšwela pele o atlega. (Mateo 5:17; Ba-Efeso 3:10, 11, 17-19) Molao wa kgale wa Moše o tšeetšwe sebaka ke kgwerano e mpsha, yeo e akaretšago Bakriste ba tloditšwego ba ba-Juda le Ba-ntle. (Jeremia 31:31-34) Lega go le bjalo, phuthego ya Bokriste ya mehleng ya rena e sa dutše e latela Molao wa Gauta. Lebaka le lengwe la go amogela go dira ga molao ke le: Kriste ke Hlogo e mafolofolo ya phuthego ya Bokriste ya mehleng yeno. Ga se a fetola ditaelo tša gagwe. Keletšo ya gagwe e buduletšwego e sa dutše e e-na le mohola.

Jesu pele ga ge a tloga lefaseng, o ile a laela balatedi ba gagwe go dira ditšhaba ka moka barutiwa le go ba ruta “xo boloka tšohle tše ke le laetšexo tšôna.” Taelo yeo e be e akaretša Molao wa Gauta. Jesu o ile a kgonthišetša barutiwa ba gagwe ka gore: “Tsebang, ke na le lena ka mehla xo fihla bofelong bya lefase.”—Mateo 28:19, 20.

Go etša ge go begilwe go Luka 6:31, Jesu o laetše gore: “Batho Le ba dirê tše Le rataxo xore ba Le dirê tšôna.” A mohlala o mobotse wo Jesu a o beilego ka go ba wa pele go direleng ba bangwe botse!

Lebakeng la bodiredi bja gagwe bja lefaseng, Jesu ka kelohloko o ile a lemoga seo batho ba bego ba swanetše go se kgotlelela gomme o ile a ba kwela bohloko. Ge a be a le go le lengwe la maeto a gagwe a boboledi o ile a bona mašaba gomme a a šokelwa. Eupja go feta moo, o ile a dira dithulaganyo tša go ba thuša. Bjang? Ka go rulaganya lesolo le matla leo le tlišitšego barutiwa ba gagwe magaeng a batho. Go etša ge a ile a laela: “Xe Le tsêna motseng xoba motsaneng, Le botšišê xe xo ka ba le e a swanetšexo. Le yê Le dulê xa xaxwe, Le bê le fetêlê pele.” Gore modiro wo o be o thekgwa ke yena le go šegofatšwa ke Tatagwe go bonwa gabotse mantšung a latelago a Jesu: “E a le amoxêlaxo, ó amoxêla Nna; xomme e a amoxêlaxo Nna ó amoxêla E a nthomilexo. . . . E a xêlaxo e mongwê wa [ba] banyenyane bá sexô sa meetse a bataxo, ka xe a na le leina la morutiwa, ruri ke a Le botša, a ka se tingwê moputsô wa xaxwe.”—Mateo 9:36–10:42.

Gore Molao wa Gauta o akaretša tiro e tsepamego bakeng sa ba bangwe go bonwa ka go nea ga Jesu lebaka nakong e nngwe: “Xe Le rata ba ba Le rataxo, Le sa leboxwa’ng? Hleng le ba-dira-dibe ba rata ba ba ba rataxo. Xe Le šetša ba ba Le šetšaxo, Le sa leboxwa’ng? Xobane ke sôna se le ba-dira-dibe ba se diraxo. Sa lena a e bê xo rata manaba a lena, . . . Ké mo moputsô wa lena e tl’o xo ba o montši.” (Luka 6:32, 33, 35) Mafelelong, go boloka Molao wa Gauta o sa dutšego o le bohlokwa go tla re tutueletša go ba ba pele go direng go loka gaešita le go batho bao rena ka noši re sa ba tsebego.

O sa Dutše o le Bohlokwa, o sa Dutše o Šoma

Mohlomongwe bohlatse bjo e lego bja makgaola-kgang bja gore Molao wa Gauta o sa dutše o le bohlokwa bo tšwa diphihlelong tša kgonthe tša bao ba phelago ka wona. Bakriste bao letšatši le letšatši ba itshwarago ka go dumelelana le melao ya Modimo ba hwetša lethabo le legolo, gomme gantši le ditšhegofatšo tše sa letelwago. Mosadi yo mongwe wa Mokriste, ka go ba yo a hlomphago le yo botho go badiri ba kliniking ya kalafo yeo a bego a e diriša, o hweditše gore o ile a holwa ke tsela yeo baoki le dingaka di ilego tša dira boiteko bjo oketšegilego gore di mo hlokomele.

Dihlatse tša Jehofa tšeo di swaraganego le mediro ya go agwa ga Diholo tša Mmušo tše agwago ka pela le tšona di ka hlatsela mohola wa Molao wa Gauta. Diketelo tše botho go batho ba dulago kgaufsi le lefelo leo go agwago go lona go ba tsebiša ka seo se rulaganywago gantši go bile le go arabela mo go botse. Batho bao pele ba bego ba ganetša Dihlatse bjale ba bona gore di direla baagišani ba bona tše botse, gomme ba iponela ka mahlo a bona tsela yeo batho ba Modimo ba dirišanago ka yona modirong wa bona. Mafelelong, ba bangwe ba ile ba thuša go ageng, ka go lebanya goba ka go neela ka ditlabakelo.—Bapiša le Sakaria 8:23.

Nakong ya ge Hlatse ya Iran yeo e dulago kua London, Engelane, e be e reka dijo lebenkeleng, ra-lebenkele o ile a mo rumola ka gobane e be e le motho o šele. Ka go se boife, le ka botho le bohlale, Hlatse e ile ya mo hlalosetša gore yena bjalo ka o mongwe wa Dihlatse tša Jehofa, ga a na maikwelo a mabe ka batho ba ditšhaba tše dingwe. Go e na le mo, o be a etela bohle tikologong ka molaetša wa Beibele. Ka mafelelo afe? Mong wa lebenkele o ile a tlaleletša ka dijo tše bose tše oketšegilego dijong tše Hlatse e di nyakilego.

Ee, Molao wa Gauta ga se wa lekanetšwa ditirong tše bjalo tše nyenyane tša botho. Ka kgonthe, pontšho e kgolo kudu ya wona ke botse bjoo Dihlatse tša Jehofa di bo dirago lefaseng ka bophara ka go etela ka mehla magaeng a baagišani ba bona ka molaetša wa ditaba tše di lokilego tša Mmušo wa Modimo.

Go Phela ka Molao wa Gauta

Go diriša Molao wa Gauta go bolela go lebiša tlhokomelo ya gago go ba bangwe. Ke tlhahlo e tsepamego. O tla swanelwa ke go nyaka dibaka tša go direla batho bao ba go dikologilego botse. E-ba le bogwera le go ba yo a kgomegago, o e-na le kgahlego ya motho ka noši go bona! (Ba-Filipi 2:4) Ka go dira bjalo, o tla buna ditšhegofatšo tše dintši. O tla ba o latela keletšo ya Jesu e rego: “Le sa lena seetša a se bonêxêlê batho ka moka ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:16) Ka mo go swanago, Jehofa e tla ba Moputsi wa gago ge o dutše o mo nyaka ka mafolofolo gomme o phela ka mehla ka Molao wa Gauta.—Ba-Hebere 11:6.