Bagalatia

5 Kriste o re lokolotše gore re se sa latela Molao wa Moshe, ka baka leo emang le tiile+ le se ke la rwala joko ya makgoba gape.+

2 Ke le botša gore ge e ba le ka bolla, seo Kriste a le diretšego sona se ka se le hole ka selo.+ 3 Le gona ke le gopotša gape gore motho yo mongwe le yo mongwe yo a bollago o swanetše gore a latele dilo ka moka tšeo di lego Molaong.+ 4 Lena bao le lekago go itira ba lokilego ka go latela Molao,+ le arogantšwe le Kriste ebile le kgole kudu le botho bja gagwe bjo bogolo. 5 Moya o Mokgethwa o re thuša gore re dule re letile go ba go fihla re lebelelwa re lokile ka gobane re e na le tumelo. 6  Batho bao ba lego boteeng le Kriste Jesu, ga ba na taba le go bolla goba go se bolle.+ Ka gobane ba a tseba gore sa bohlokwa kudu ke gore ba be le tumelo yeo ba e bontšhago ka go rata ba bangwe.

7 Le be le dira dilo gabotse.+ Ke mang yo a le šitišitšego go tšwela pele le latela dithuto tša nnete? 8 Thuto ye, ga e tšwe go Modimo yo a le bitšago. 9 Komelo* e nyenyane e bediša folouru ka moka yeo e dubilwego.+ 10 Ke kgodišegile gore lena barutiwa ba Kriste+ le dumelelana le nna. Eupša yo a le tshwenyago+ o tlo ahlolwa ka tsela e swanetšego, go sa šetšwe gore ke mang. 11 Banabešo, ge nkabe ke be ke sa tšwela pele ke ruta batho ka lebollo, ba be ba ka se ntlaiše, le gona thuto yeo ke e rutago ya gore Jesu o hwetše koteng ya tlhokofatšo*+ e be e ka se ba kgopiše. 12 Ke duma okare batho bao ba lekago go le aroša ka gore le bolle, ba ka ripa ditho tša bona tša bong.

13 Banabešo, Modimo o le kgethile gore le lokologe, eupša le se ke la diriša tokologo yeo go kgotsofatša dikganyogo tša lena tše mpe,+ go e na le moo bontšhang lerato ka gore le thušane.+ 14 Molao ka moka o akareditšwe ka taelo e tee yeo e rego: “O rate moagišane wa gago ka tsela yeo o ithatago ka yona.”+ 15 Eupša le hlokomele, ka gobane ge e ba le tšwela pele le elwa ebile le kwešana bohloko,*+ le ipea kotsing ya gore le feleletše le bolayane.+

16 Eupša ke re: Tšwelang pele le dumelela moya o mokgethwa o le hlahla+ gore le se ke la ba la tsoga le dumile go dira dilo tše mpe.+ 17 Dilo tše mpe tšeo batho ba di kganyogago ga di dumelelane le moya o mokgethwa, le moya o mokgethwa ga o dumelelane le tšona. Dilo tše ka bobedi di a ganetšana, ka baka leo ga le kgone go dira dilo tšeo le nyakago go di dira.+ 18 Ge e ba le hlahlwa ke moya o mokgethwa, gona ga le laolwe ke Molao wa Moshe.

19 Mekgwa e mebe e molaleng, yona ke go itshwara gampe ka tša thobalano,*+ go se hlweke, go itshwara gampe o sa jewe ke dihlong,*+ 20 go rapela medingwana ya diswantšho, go dirišana le matemona,+ lehloyo, ditshele, mona, go galefa, go se kwane, dikarogano, go dira dihlotswana, 21 lehufa, botagwa,+ menyanya e sa laolegego le dilo tše dingwe tša go swana le tše.+ Ke le lemoša gape ka dilo tše, bjalo ka ge ke ile ka dira bjalo nakong e fetilego, ka gobane batho bao ba tlwaetšego go dira dilo tše ba ka se tsene Mmušong wa Modimo.+

22 Eupša dienywa tša moya ke lerato, lethabo, khutšo, go se fele pelo, botho, botse,+ tumelo, 23 boleta le boitshwaro.+ Ga go na molao wo o ganetšanago le dilo tše. 24 Le gona barutiwa ba Kriste Jesu ba bolaile dikganyogo tša bona tše mpe bjalo ka ge eka ba di kokotetše koteng.+

25 Ge e ba re hlahlwa ke moya o mokgethwa, gona a re tšweleng pele re phela ka tsela yeo e bontšhago gore re hlahlwa ke moya woo.+ 26 A re se keng ra phadišana,+ ra hufegelana goba ra ipona re le bohlokwa go fetiša batho ba bangwe.+