Ditiro tša Baapostola

5 Monna yo a bitšwago Ananiase, le mosadi wa gagwe Safira, ba ile ba rekiša tšhemo ya bona. 2 Ananiase o ile a se iše tšhelete yeo ka moka go baapostola eupša o ile a itšeela e nngwe. Mosadi wa gagwe le yena o be a tseba taba yeo.+ 3 Eupša Petro a re: “Ananiase, ke ka baka lang o dumeletše Sathane a go dira gore o be le sebete sa go fora+ moya o mokgethwa+ le go itšeela e nngwe ya tšhelete yeo o rekišitšego tšhemo ka yona? 4 Tšhemo yeo e be e le ya gago, le ka morago ga gore o e rekiše, tšhelete ya gona e be e le ya gago. Bjale ke ka baka lang o naganne selo se sebe ka tsela ye? O forile Modimo, e sego batho.” 5 Ge Ananiase a ekwa mantšu ao o ile a wela fase a hwa. Batho ka moka bao ba ilego ba kwa taba ye ba ile ba tšhoga kudu. 6 Ke moka masogana a mangwe ao a bego a le moo a ile a mo phuthela ka mašela, a mo rwala a yo mmoloka.

7 Bjale ka morago ga diiri tše e ka bago tše tharo mosadi wa gagwe o ile a tla gomme o be a sa tsebe seo se diragetšego. 8  Petro a re go yena: “Mpotše, na ye ke tšhelete ka moka ye le rekišitšego tšhemo ya lena ka yona?” Yena a re: “Ee, ke yona.” 9 Ke moka Petro a re go yena: “Ke ka baka lang wena le monna wa gago le logile maano a go leka go fora moya wa Jehofa?* Tseba gore batho bao ba bolokilego monna wa gago ba eme mojako gomme le wena ba tla go rwalela ka ntle.” 10 Ka yona nako yeo Safira a wela fase pele ga Petro a hwa. Ge masogana ale a fihla a ile a mo hwetša a hwile gomme a mo rwala a ya a mmoloka kgauswi le monna wa gagwe. 11 Phuthego ka moka le batho ka moka bao ba ilego ba kwa ka ditaba tšeo, ba ile ba tšhoga kudu.

12 Baapostola ba ile ba tšwela pele ba dira mehlolo e mentši le dilo tše di makatšago setšhabeng.+ Barutiwa ka moka ba be ba tlwaetše go kopana Setupung sa Solomone.+ 13  Batho ba bangwe ba be ba tšhaba go ikopanya le barutiwa, le ge go le bjalo setšhaba se be se ba reta kudu. 14 Banna le basadi ba bantši kudu ba ile ba thoma go dumela go Morena gomme ya ba barutiwa.+ 15  Batho ba be ba tliša balwetši diterateng tše dikgolo, ba robetše godimo ga mepete e menyenyane le mebete. Ba be ba duma gore ge Petro a feta, ba bangwe ba batho bao ba no kgongwa feela ke moriti wa gagwe gomme ba fole.+ 16 Le gona batho ba bantši bao ba tšwago metseng ya kgauswi le Jerusalema ba ile ba tla ba rwele balwetši le batho bao ba tshwenywago ke matemona gomme batho bao ka moka ba ile ba fodišwa.

17 Moperisita yo a phagamego le batho ka moka bao a bego a na le bona ba sehlotswana sa Basadutsei, ba ile ba ema gomme ba ba jela mona, 18 ba ba ba swara baapostola bao ba ba iša kgolegong ya mo motseng.+ 19 Eupša bošego morongwa wa Jehofa a bula mejako ya kgolego+ a ba ntšhetša ka ntle a re: 20 “Eyang tempeleng gomme le tšwele pele le botša batho ka moka ka molaetša wa bophelo.” 21 Ka morago ga moo, ba ile ba ya tempeleng e sa le mesong gomme ba thoma go ruta batho.

Ge moperisita yo a phagamego le bao ba bego ba na le yena ba fihla, ba ile ba bitša lekgotla la Sanhedrine le banna ka moka ba bagolo ba setšhaba sa Isiraele. Ke moka ba roma bahlokomedi kgolegong gore ba tle le baapostola. 22 Eupša ge bahlokomedi bao ba fihla moo, ba ile ba hwetša baapostola ba se gona ka kgolegong. Ka gona ba ile ba boa ba ba botša 23 ba re: “Re hweditše kgolego e notletšwe ebile e šireleditšwe. Batho ba go leta ba be ba eme mojako, eupša ge re bula ra hwetša go se na motho ka gare.” 24 Bjale ge moetapele wa tempele le baperisita ba bagolo ba ekwa ditaba tše, ba ile ba gakanega kudu ka gore ba be ba sa tsebe gore di tla feleletša kae. 25 Eupša motho yo mongwe a fihla a ba botša a re: “Banna bao le ba išitšego kgolegong ba kua tempeleng, ba eme moo gomme ba ruta batho.” 26 Ke moka moetapele yoo a sepela le bahlokomedi ba gagwe ba lata baapostola, eupša ba be ba sa lwe le bona ka ge ba be ba tšhaba gore batho ba tla ba kgatla ka maswika.+

27 Ka gona ba ile ba tliša baapostola bao pele ga lekgotla la Sanhedrine. Ke moka moperisita yo a phagamego o ile a ba botšološiša, 28 a re: “Re le boditše tsebe-go-kwa gore le se ke la tšwela pele le ruta batho ka leina le,+ eupša lena le tladitše Jerusalema ka thuto ya lena, ebile le nyaka go re rweša molato wa lehu la monna yo.”+ 29  Petro le baapostola ba bangwe ba araba ba re: “Modimo ke mmuši wa rena, re swanetše go kwa yena e sego batho.+ 30 Modimo wa borakgolokhukhu ba rena o tsošitše Jesu yo le mmolailego ka go mo fega koteng.+ 31 Modimo o mo neile maemo a godimo gore e be Moetapele yo Mogolo+ le Mophološi+ gomme a mmea ka letsogong la gagwe le letona+ gore Baisiraele ba kgone go itshola gomme ba lebalelwe dibe.+ 32 Rena re bone dilo tše, le gona moya o mokgethwa+ wo Modimo a o neilego bao ba mo kwago o re thušitše go hlatsela+ gore dilo tše ke nnete.”

33 Ge ba ekwa taba ye, ba ile ba ferekana ebile ba be ba nyaka go ba bolaya. 34 Eupša Gamaliele+ yo e bego e le Mofarasei o ile a ema gare ga lekgotla la Sanhedrine. Monna yo e be e le morutiši wa Molao yo batho ka moka ba bego ba mo hlompha. O ile a laela gore banna bao ba ntšhetšwe ka ntle ka nakonyana. 35 A re go bona: “Banna ba Isiraele, itlhokomeleng gore le ahlola banna ba bjang. 36 Ka mohlala, nakong e fetilego go kile gwa ba le monna yo a bitšwago Theuda, a bolela gore yena o bohlokwa kudu gomme batho ba e ka bago ba 400 ba ile ba mo latela. Eupša o ile a bolawa, ke moka batho ka moka bao ba ilego ba mo latela ba ile ba phatlalala gomme ba hwelela. 37 Ka morago ga gagwe go ile gwa ba le Judase wa Mogalelia nakong ya ge go be go balwa setšhaba. O ile a dira gore batho ba mo latele. Eupša ka morago ga gore monna yoo le yena a hwe, batho ka moka bao ba bego ba mo latela ba ile ba phatlalala. 38 Ka gona, ge e ba dilo di le ka mokgwa wo, ke re go lena: Tlogelang banna ba, le se ke la tshwenyana le bona. Ka gobane ge e ba leano la bona goba mošomo wa bona e le wa batho, gona o ka se felele felo, 39 eupša ge e ba e le wa Modimo, gona le ka se ba dire selo,+ go sego bjalo le tla ikhwetša le elwa le Modimo.”+ 40 Ba ile ba kwa keletšo ya Gamaliele, ke moka ba bitša baapostola ba ba betha.+ Ba ile ba ba laela gore ba tlogele go bolela ka leina la Jesu, ke moka ba ba lesa ba sepela.

41 Ka gona, baapostola ba ile ba tloga pele ga lekgotla la Sanhedrine ba thabile+ ka gobane Modimo o be a ba neile tokelo ya gore ba tlontlollwe ka baka la leina la Jesu. 42 Ke moka ba ile ba tšwela pele ba eya tempeleng le ka ntlo le ntlo+ letšatši le lengwe le le lengwe ba sa kgaotše, ba ruta ebile ba botša batho ditaba tše dibotse ka Jesu Kriste.*+