Baroma

4 Re tla reng ka Aborahama rakgolokhukhu wa rena? 2 Ge e ba go be go ka bolelwa gore Aborahama o lokile ka baka la dilo tšeo a di dirilego, gona o be a tla ba le lebaka la go ikgantšha eupša o be a ka se ikgantšhe pele ga Modimo. 3 Lengwalo le lengwe le re: “Aborahama a ba le tumelo go Jehofa* gomme Modimo a mmona a lokile.”+ 4 Ge motho a šoma, ga a patelwe ka gobane a no bontšhwa botho, eupša o swanetše gore a patelwe ka baka la mošomo wo a o dirilego. 5 Bjale ge motho a sa ithekge ka dilo tšeo a di dirago eupša a na le tumelo go Modimo, Modimo o tla lebelela motho yoo a lokile ka baka la tumelo ya gagwe. Modimo ke yena feela a ka rego motho yo a sa lokago o lokile.+ 6 Dafida le yena o ile a bolela ka motho yo a thabilego yo Modimo a mo lebelelago a lokile, eupša e sego ka baka la dilo tšeo a di dirago, a re: 7 “Go thaba batho bao ba lebaletšwego melato ya bona le dibe tša bona. 8 Go thaba motho yo Jehofa a ka se kego a gopola sebe sa gagwe.”+

9 Bjale na go thaba feela batho bao ba bolotšego, goba na batho bao ba sa bollago le bona ba a thaba?+ Ka gobane re re: “Tumelo ya Aborahama e ile ya dira gore Modimo a mmone a lokile.”+ 10 Ka gona Modimo o ile a thoma go bona Aborahama a lokile neng? Ge a be a bolotše goba a sa bolla? Ke ge a be a sešo a bolla. 11 Modimo o ile a mmotša gore a bolle. Go bolla e be e le leswao+ leo le bontšhago gore o lokile ka baka la tumelo yeo a bego a na le yona pele a bolla. Aborahama o ile a ba tatago batho bohle bao ba nago le tumelo+ le ge ba be ba se ba bolla, ebile Modimo o lebelela batho bao ba lokile. 12 Le gona Aborahama o ile a ba tatago batho bao ba bolotšego ebile ke tatago bao ba nago le tumelo go swana le yena. Tatago rena Aborahama+ o bile le tumelo le pele a ka bolla.

13 Aborahama le ditlogolwana tša gagwe ba ile ba tshepišwa gore e tla ba bajabohwa ba lefase+ ka baka la ge Modimo a be a lebelela Aborahama a lokile ka ge a be a na le tumelo.+ 14 Ge e ba batho bao ba latelago Molao e eba bona bajabohwa ba lefase, gona go ra gore go ba le tumelo ga go na mohola ebile dilo tšeo Modimo a di tshepišitšego ke lefeela. 15 Nnete ke gore ge motho a tshela Molao o tlo otlwa,+ eupša ge go se na molao ga go na motho yo a ka o tshelago.+

16 Ka ge Modimo a na le botho kudu,+ re kgona go bona ditshepišo tša gagwe di phethagala ka gobane re na le tumelo. Ditlogolo tša Aborahama+ ga se tšona feela di tla kgonago go bona ditshepišo tšeo di phethagala, eupša le batho bao ba nago le tumelo ya go swana le ya Aborahama le bona ba tla di bona ka gobane ke Tatago rena ka moka.+ 17 (Go bjalo ka ge Mangwalo a re: “Ke go kgethile gore o be tatago ditšhaba tše dintši.”)+ Aborahama o ile a bontšha tumelo go Modimo yo a tsošago bahu le yo a bolelago dilo tšeo di tlago go direga bjalo ka ge eka di šetše di diregile. 18 Aborahama o be a na le tumelo ya gore o be a tlo ba tatago ditšhaba tše dintši le ge go be go bonagala go sa kgonege. O ile a dumela ge Modimo a be a mmotša gore: “Bana ba gago e tla ba bantši.”+ 19 Le ge a be a na le tumelo e tiilego, o be a sa nagane gore go ka kgonega gore a be le bana ka gobane o be a na le mengwaga e ka bago e 100,+ le gona o be a tseba gore Sara o be a tšofetše kudu gore a ka ba le bana.+ 20 Eupša ka ge Modimo e be e le yena a mo tshepišitšego, ga se a ka a belaela goba a hloka tumelo. Go e na le moo, tumelo ya gagwe e ile ya tšwela pele e tia ebile a tumiša Modimo. 21 O be a tshepa ka pelo ka moka gore Modimo o tla phethagatša dilo tšeo a di tshepišitšego.+ 22 Ka gona “Modimo o ile a mmona a lokile.”+

23 Eupša mantšu a gore “o ile a mmona” a be a se a ngwalelwa yena feela,+ 24 eupša a ngwaletšwe le rena bao Modimo a tlago go ba bona ba lokile, ka gobane re dumela gore o tsošitše Morena wa rena Jesu bahung.+ 25 Jesu o ile a dirwa sehlabelo ka baka la dibe tša rena+ gomme Modimo o ile a mo tsoša bahung e le gore a tle a bolele gore re lokile.+