Ditiro tša Baapostola
24 Ka morago ga matšatši a mahlano, moperisita yo a phagamego Ananiase+ o ile a tla a na le bagolo ba bangwe gotee le ramolao yo mongwe yo a bitšwago Teritulo, ba botša mmuši molato wo ba latofatšago Paulo ka wona.+ 2 Ge Teritulo a fiwa monyetla wa go bolela, o ile a thoma go latofatša Paulo pele ga Felikisi a re:
“Mohlomphegi Felikisi, o dirile gore mo setšhabeng sa gabo rena go be le khutšo ebile go na le diphetogo tše dintši ka gobane wena o monna wa go naganela pele. 3 Gohle mo re lego gona wena Mohlomphegi Felikisi, re dula re leboga dilo tšeo o re direlago tšona. 4 Eupša gore re se ke ra go senyetša nako, ke go kgopela gore o re bontšhe botho ka gore o re fe metsotswana gore re bolele le wena. 5 Re bone gore monna yo o kotsi kudu,+ ebile o hlohleletša+ Bajuda lefaseng ka moka gore ba lwe le mmušo. Ke moetapele wa sehlotswana sa bokgelogi sa Banatsaretha.+ 6 Le gona o ile a leka go šilafatša tempele, ke ka baka leo re ilego ra mo swara.+ 7* —— 8 Ge o mo sekiša, o tlo bona gore dilo tšeo re mo latofatšago ka tšona ke nnete.”
9 Ge Bajuda ba be ba ekwa ditaba tšeo, le bona ba ile ba thoma go hlasela Paulo ka mantšu ba bolela gore ditaba tšeo ke nnete. 10 Mmuši o ile a dumela ka hlogo gore Paulo a bolele. Ke moka Paulo a re:
“Ke a tseba gore o feditše mengwaga e mentši o ahlola setšhaba se. Ka gona ke a thaba gore ke tlo itwela pele ga gago.+ 11 Ge wena o ka nyakišiša, o tla hwetša gore ga se gwa tšwa go feta matšatši a 12 ke ile Jerusalema go yo rapela.+ 12 Ge ke be ke le moo, ga se ba ka ba nkhwetša ke ngangišana le motho ka tempeleng goba ke tsoša mmudubudu disinagogeng goba motseng ka moka. 13 Le gona ba ka se kgone go go fa bohlatse bja dilo tšeo ba ntatofatšago ka tšona gona bjale. 14 Eupša ke go botša gore yona tsela yeo ba e bitšago sehlotswana sa bokgelogi, ke yona tsela yeo nna ke hlankelago Modimo wa borakgolokhukhu ba ka ka yona,+ ka ge ke dumela dilo ka moka tšeo di ngwadilwego Molaong wa Moshe le tšeo di ngwadilwego ke baporofeta.+ 15 Ke na le kholofelo yeo batho ba le bona ba nago le yona, ya gore Modimo o tlo tsoša batho+ bao ba lokilego le bao ba sa lokago.+ 16 Ka baka leo ke dula ke lwela gore ke be le letswalo leo le hlwekilego pele ga Modimo le batho.+ 17 Ka morago ga mengwaga e mentši ke ile ka tla Jerusalema ka tliša tšhelete ya go tlo thuša batho+ ba setšhaba sa gešo le gore ke nee Modimo dibego. 18 Ge ke be ke sa dira dilo tše ba ile ba nkhwetša ka tempeleng ke hlwekile go ya ka molao.+ Ga se ba ka ba nkhwetša ke na le lešaba goba ke baka mpherefere. Eupša go be go na le Bajuda ba bangwe bao ba tšwago profenseng ya Asia, 19 bao ba bego ba swanetše go ba mo gore ge e ba ka nnete ke na le molato, le bona ba ntatofatše ka dilo tšeo batho ba ba ntatofatšago ka tšona.+ 20 Goba e re batho ba ba lego mo ba bolele ka bobona gore ke phošo efe yeo ba e hweditšego go nna ge ke be ke sekišwa pele ga lekgotla la Sanhedrine. 21 Selo setee feela seo ba ka ntatofatšago ka sona ke gore ke ile ka ema gare ga bona ka bolelela godimo ka re: ‘Lehono ke a ahlolwa ka gobane ke dumela gore batho ba tlo tsošwa bahung!’”+
22 Eupša ka ge Felikisi a be a tseba ditaba tša mabapi le Tsela ya Bokriste gabotse,+ o ile a re: “Ke tlo dira phetho ka taba ye ge moetapele wa mašole Lisia a etla, ke moka a ba phatlalatša.” 23 Felikisi o ile a botša molaodi wa mašole gore a dule a letile Paulo kgolegong, eupša ba ile ba mo fa tokologo ya go dira dilo tše itšego, ba ba ba dumelela gore bagwera ba gagwe ba mo thuše ka dilo tšeo a di hlokago.
24 Ka morago ga matšatši a sego kae Felikisi o ile a tla le mosadi wa gagwe Dirusila wa Mojuda. O ile a bitša Paulo gomme a mo theetša ge a dutše a hlalosa gore go dumela go Kriste Jesu go bolela eng.+ 25 Ge Paulo a dutše a bolela ka dilo tše di lokilego, tsela yeo batho ba swanetšego go itshwara ka yona le gore go tlo tla nako yeo Modimo a tlago go ahlola batho,+ Felikisi o ile a tšhoga kudu a re: “Sepela, ke tla re ge ke hweditše monyetla o mongwe ka go bitša gape.” 26 O be a nagana gore Paulo o be a tla mo fa tšhelete ya pipamolomo. Ke ka lebaka leo a bego a mmitša gantši le gantši gore a boledišane le yena. 27 Ka morago ga mengwaga e mebedi, Porotio Fesito o ile a ba mmuši legatong la Felikisi. Ka ge Felikisi a be a rata go kgahliša Bajuda,+ o ile a tlogela Paulo a golegilwe.