Ebangedi ya Mateo
28 Ka morago ga Sabatha, mesong ya letšatši la pele la beke,* Maria Magdalena le Maria yola yo mongwe ba ile ba tla go bona lebitla.+
2 Go ile gwa ba le tšhišinyego e kgolo ya lefase, ka gobane morongwa wa Jehofa* o be a theogile go tšwa legodimong a tlile go kgokološa leswika leo le bego le thibile lebitla gomme o be a dutše godimo ga lona.+ 3 O be a phadima go swana le legadima gomme diaparo tša gagwe e le tše ditšhweu go swana le kapoko.+ 4 Baleti ba lebitla ba ile ba tšhoga kudu ka baka la gagwe moo ba ilego ba thothomela ba ba bjalo ka ge eka ba hwile.
5 Morongwa yoo a re go basadi bao: “Le se ke la tšhoga, ka gobane ke a tseba gore le nyaka Jesu yo a bego a kokotetšwe koteng.+ 6 Ga a gona mo, ka gobane o tsošitšwe bjalo ka ge a boletše.+ Etlang le boneng moo a bego a robetše gona. 7 Bjale phakišang le yo botša barutiwa ba gagwe gore o tsošitšwe bahung ka gobane o le etile pele go ya Galelia+ gomme le tla mmona moo. Se ke seo ke bego ke tlile go le botša sona.”+
8 Ka gona, ba tloga lebitleng kapelapela ba tšhogile ebile ba thabile kudu, ba kitima gore ba ye go botša barutiwa ba gagwe.+ 9 Jesu a gahlana le basadi bao a re: “Dumelang!” Ba ile ba mmatamela, ba khunama pele ga gagwe gomme ba mo swara maoto. 10 Ke moka Jesu a re go bona: “Le se ke la tšhoga! Eyang le botše banabešo gore ba ye Galelia gomme ba tla nkhwetša moo.”
11 Ge ba le tseleng, ba bangwe ba baleti+ ba ile ba ya motseng gomme ba botša baperisita ba bagolo dilo ka moka tšeo di diregilego. 12 Ka morago ga gore baperisita ba bagolo le banna ba bagolo ba kopane gomme ba boledišane, ba ile ba nea mašole ditšhelete tše dintši tša silifera 13 gomme ba re, “eyang le botše batho gore: ‘Barutiwa ba gagwe ba tlile bošego gomme ba mo utswa re sa robetše.’+ 14 Ge e ba taba ye e ka fihla go mmuši re tla bolela le yena, lena le se ke la tshwenyega.” 15 Ba ile ba tšea ditšhelete tšeo tša silifera, ba dira seo ba bego ba laetšwe gore ba se dire. Taba ye e ile ya tsebja kudu gare ga Bajuda go ba go fihla le lehono.
16 Le ge go le bjalo, barutiwa ba 11 ba ya thabeng ya Galelia+ moo Jesu a bego a ba laetše gore ba kopane gona.+ 17 Ge ba mmona ba mo khunamela go bontšha gore ba a mo hlompha, eupša ba bangwe ba be ba sa tshepe gore ke yena. 18 Jesu a ba batamela gomme a bolela le bona a re: “Modimo o mphile maatla a go hlokomela dilo ka moka legodimong le lefaseng.+ 19 Ka gona, eyang le dire batho ba ditšhaba ka moka barutiwa,+ le ba kolobetša+ leineng la Tate le la Morwa le la moya o mokgethwa, 20 le ba rute go phela ka go dumelelana le dilo ka moka tšeo ke le laetšego tšona.+ Tsebang gore ke na le lena matšatši ka moka go fihla mafelelong a mehla ya bofelo.”*+