Šetša Go Ruta Ga Gago Ka Mehla

“Itšhetše o šetše le go ruta ga gago ka mehla. Dula dilong tše, ka gobane ka go dira bjalo o tla iphološa wa ba wa phološa le bao ba go kwago.”​—1 TIMOTHEO 4:​16, NW.

1, 2. Ke ka baka la’ng go nyakega barutiši ba ba nago le phišego ka go akgofa lehono?

“YANG Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna.” (Mateo 28:​19, 20) Ka baka la taelo ye ya Jesu Kriste, Bakriste ka moka ba swanetše go katanela go ba barutiši. Barutiši ba ba nago le phišego ba a nyakega bakeng sa go thuša batho ba dipelo tše di botegago gore ba tle ba tsebe Modimo pele ba tlogelwa ke nako. (Ba-Roma 13:​11) Moapostola Paulo o ile a opeletša ka gore: “Baa sexoeledi sa Lentšu, O le êmêlê ka lebaka la xôna le ka le le sexo la xôna.” (2 Timotheo 4:2) Se se nyaka go ruta ka gare gotee le ka ntle ga phuthego. Ka kgonthe, thomo ya go dira boboledi ka boyona e akaretša se se fetago go fo tsebatša molaetša wa Modimo. Go nyakega go ruta ka mo go atlegago ge e ba batho ba ba thabelago e tla ba barutiwa.

² Re phela ‘dinakong tše hlobaetšago tšeo go lego thata go lebeletšana le tšona.’ (2 Timotheo 3:1, NW) Megopolo ya batho e tladitšwe ka difilosofi tša lefase le dithuto tša maaka. Ba bantši ba “fifetše thlaoloxanyô” gomme ‘ba retetše.’ (Ba-Efeso 4:​18, 19) Ba bangwe ba na le dintho tše bohloko maikwelong. Ee, ruri batho “ba lapile, bà lahlexile wa dinku tše di se naxo modiši.” (Mateo 9:​36) Lega go le bjalo, ka go diriša bokgoni bja go ruta re ka thuša ba dipelo tše di botegago gore ba dire diphetogo tše di nyakegago.

Barutiši ka Gare ga Phuthego

3. (a) Thomo ya Jesu ya go ruta e akaretša’ng? (b) Ke bomang bao ba nago le boikarabelo bja motheo bja go ruta ka gare ga phuthego?

³ Batho ba dimilione ba hwetša thuto ya motho ka noši ka thušo ya thulaganyo ya thuto ya legae ya Beibele. Lega go le bjalo, ba bafsa ba nyaka thušo e oketšegilego ka morago ga kolobetšo ya bona, gore e be “ba ba tsemilexo medu.” (Ba-Efeso 3:​17) Ge re dutše re phetha thomo ya Jesu yeo e begilwego go Mateo 28:​19, 20 gomme re hlahla ba bafsa go ba iša mokgatlong wa Jehofa, ba holwa ke go rutwa ka gare ga phuthego ka boyona. Go ya ka Ba-Efeso 4:​11-13, banna ba kgethilwe gore ba hlankele e le “badiši le baruti, ya ba xo hlamiša bakxêthwa xore ba kxônê xo dirêla phuthêxô, xore mmele wa Kriste o axišwê.” Ka dinako tše dingwe, bokgoni bja go ruta bo akaretša go nyakega ga ‘go kgothatša, go eletša le go kgalema ka go se fele pelo.’ (2 Timotheo 4:2) Modiro wa barutiši o be o le bohlokwa kudu mo e lego gore Paulo ge a ngwalela ba-Korinthe o lokeletša barutiši ka morago ga baapostola le baporofeta.​—1 Ba-Korinthe 12:28.

4. Bokgoni bja go ruta bo re thuša bjang gore re kwe kgothatšo ya Paulo yeo e begilwego go Ba-Hebere 10:​24, 25?

⁴ Ke therešo gore ga se Bakriste ka moka bao ba hlankelago e le bagolo goba balebeledi. Lega go le bjalo, bohle ba kgothaletšwa gore ba hlohleletšane “leratong le medirong e botse.” (Ba-Hebere 10:​24, 25) Go dira bjalo dibokeng go akaretša ditlhaloso tšeo di lokišeditšwego gabotse tšeo di tšwago pelong tše di kago aga le go kgothatša ba bangwe. Bagoeledi ba Mmušo ba ba nago le phihlelo le bona ba ka ‘išana leratong le medirong e botse’ ka go abelana tsebo ya bona le phihlelo le ba bafsa ge ba šoma le bona bodireding bja tšhemo. Dinakong tše bjalo le go tše di sa rulaganyetšwago go ka newa thuto e bohlokwa. Ka mohlala basadi ba godilego tsebong ba kgothaletšwa gore e be “baruti ba bothakxa.”​—Tito 2:3.

Go Kgodišetšwa go Dumela

5, 6. (a) Bokriste bja therešo bo fapane le borapedi bja maaka bjang? (b) Bagolo ba thuša bjang ba bafsa gore ba dire diphetho tše bohlale?

⁵ Ka gona Bokriste bja therešo bo fapane kudu le madumedi a maaka, ao bontši bja ona bo nyakago go laola tsela ya go nagana ya ditho tša ona. Ge Jesu a be a le lefaseng, baetapele ba bodumedi ba be ba nyaka go laola mo e nyakilego go ba karolo e nngwe le e nngwe ya maphelo a batho ka metlwae ya batho ya kgatelelo. (Luka 11:​46) Baruti ba Bojakane gantši ba ile ba dira bjalo.

⁶ Lega go le bjalo, borapedi bja therešo ke “tirelo e kgethwa” yeo re e neago ka “matla a rena a go nagana.” (Ba-Roma 12:1, NW) Bahlanka ba Jehofa ba ‘kgodišwa gore ba dumele.’ (2 Timotheo 3:​14, NW) Ka dinako tše dingwe bao ba etelelago pele ba ka swanelwa ke gore ba thome tlhahlo e itšego le megato bakeng sa gore phuthego e šome ka go thelela. Lega go le bjalo, go e na le go nyaka go direla Bakriste-gotee diphetho, bagolo ba ba ruta “xo kxetholoxanya botse le bobe.” (Ba-Hebere 5:​14) Bagolo ba dira se kudu-kudu ka go fepa phuthego ka “mantšu a tumelo le ka thuto e botse.”​—1 Timotheo 4:6, NW.

Go Šetša Thuto ya Gago

7, 8. (a) Batho ba bokgoni bjo bo lekanyeditšwego ba kgona bjang go hlankela e le barutiši? (b) Ke eng seo se bontšhago gore go nyakega boiteko bja motho ka noši gore motho e be morutiši yo a atlegago?

⁷ Lega go le bjalo, a re boeleng thomong ya rena ka moka ya go ruta. Na go tšea karolo modirong wo go nyaka bokgoni bjo bo itšego goba thuto e itšego? Ga se gore go bjalo. Modiro wo wa lefase ka bophara wa go ruta kudu-kudu o dirwa ke batho feela ba tlwaelegilego bao ba nago le bokgoni bjo bo lekanyeditšwego. (1 Ba-Korinthe 1:​26-29) Paulo o hlalosa ka gore: “Lehumô leo [bodiredi] re le swere ka dibya tša letsopa [mebele e sa phethagalago]; xore matla a maxolo e bê a Modimo, e sexo a rena.” (2 Ba-Korinthe 4:7) Katlego e kgolo yeo modiro wa go bolela ka Mmušo lefaseng ka moka o bilego le yona ke bohlatse bja matla a moya wa Jehofa!

⁸ Lega go le bjalo, go nyakega boiteko bjo matla bja motho ka noši gore motho e be “modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:​15) Paulo o ile a kgothaletša Timotheo gore: “Itšhetše o šetše le go ruta ga gago ka mehla. Dula dilong tše, ka gobane ka go dira bjalo o tla iphološa wa ba wa phološa le bao ba go kwago.” (1 Timotheo 4:​16, NW) Gabotse-botse motho o šetša thuto ya gagwe bjang, e ka ba ka gare goba ka ntle ga phuthego? Na go dira bjalo go bolela go akaretša go ba le bokgoni bjo bo itšego goba go tseba mekgwa e itšego ya go ruta?

9. Ke eng seo se lego bohlokwa kudu go feta bokgoni bja tlhago?

⁹ Ka ntle le pelaelo Jesu o ile a bontšha bokgoni bjo bo makatšago mekgweng ya go ruta Thutong ya gagwe e tumilego ya Thabeng. Ge a be a feditše go bolela, “mašaba a batho a tlabya ke thutô ya xaxwe.” (Mateo 7:​28) Go ba gona, ga go le o tee wa rena yo a ka rutago gabotse go swana le kamoo Jesu a ilego a ruta ka gona. Lega go le bjalo, ga se gore go nyakega gore re be diboledi tše matla gore re tle re be barutiši ba ba atlegago. Ee, go ya ka Jobo 12:7 gaešita le “diphôôfôlô,” le “dinonyana tša xodimo” di ka ruta ka setu! Gotee le bokgoni le ge e le bofe bja tlhago bjo re ka bago re e-na le bjona, seo e lego sa bohlokwa ka mo go kgethegilego ke ‘mohuta wa batho’ (NW) bao re lego bona​—dika tšeo re nago le tšona le mekgwa ya moya yeo re e hlagoletšego tšeo barutwana ba ka di ekišago.​—2 Petro 3:​11; Luka 6:40.

Barutwana ba Lentšu la Modimo

10. Jesu o ile a bea bjang mohlala o mobotse e le morutwana wa Lentšu la Modimo?

¹⁰ Morutiši yo a atlegago wa ditherešo tša Mangwalo o swanetše go ba morutwana wa Lentšu la Modimo. (Ba-Roma 2:​21) Jesu Kriste o ile a bea mohlala o mobotse kudu tabeng ye. Nakong ya bodiredi bja gagwe, Jesu o ile a šupa go ditemana goba a bolela dikgopolo tšeo di bego di swana le ditemana tšeo di hwetšwago mo e ka bago seripeng sa dipuku tša Mangwalo a Sehebere.a Go tlwaelana ga gagwe le Lentšu la Modimo go ile gwa bonala ge a be a e-na le nywaga e 12, ge a be a hwetšwa a “dutše xare xa baruti, à ba theetša, à ba botšiša.” (Luka 2:​46) Ge e be e le motho yo mogolo, Jesu o be a tlwaetše go ya sinagogeng moo Lentšu la Modimo le bego le balwa gona.​—Luka 4:16.

11. Morutiši o swanetše go hlagolela mekgwa efe e mebotse ya go ithuta?

¹¹ Na o mmadi yo a fišegago wa Lentšu la Modimo? Ge o tsenelela ka gare ga lona ke ka mokgwa wo ‘o tlago go tseba go boifa Morena, wa fihlela tsebo ya go tseba Modimo.’ (Diema 2:​4, 5) Ka gona hlagolela mekgwa e mebotse ya go ithuta. Leka go bala karolo ya Lentšu la Modimo letšatšing le lengwe le le lengwe. (Psalme 1:2) Dira gore go bala tokollo e nngwe le e nngwe ya Morokami le Phafoga! gatee-tee ge o e hwetša e be mokgwa wa gago. Theetša ka kelohloko dibokeng tša phuthego. Ithute go dira nyakišišo ka kelohloko. Ka go ithuta “xo . . . latiša tšohle xo tloxa thlaxong ya tšôna” o ka phema go feteletša wa ba wa phema le dipolelo tše sa nepagalago ge o ruta.​—Luka 1:3.

Go Rata le go Hlompha Bao ba Rutwago

12. Boemo bja kgopolo bja Jesu ka barutiwa ba gagwe e be e le bofe?

¹² Seka se sengwe se bohlokwa ke go ba le boemo bjo bo swanetšego bja kgopolo ka bao o ba rutago. Bafarisei ba be ba nyatša batho ba ba bego ba theetša Jesu. Ba be ba re: “Ké sethšaba sé sa xo se tsebe Molaô; sôna ké dihlôbôxwa.” (Johane 7:​49) Eupša Jesu o be a e-na le lerato le le tseneletšego le tlhompho ya go hlompha barutiwa ba gagwe. O ile a re: “Xa ke re Le bahlanka; xobane mohlanka xa a tsebe se mong wa xaxwe a se diraxo. Lena, ke re Le baxwêra, ka xobane ke Le boditše tšohle tše ke di kwilexo xo Tate.” (Johane 15:​15) Se se ile sa bontšha kamoo barutiwa ba Jesu ba swanetšego go phetha modiro wa bona wa go ruta ka gona.

13. Paulo o be a ikwa bjang ka bao a bego a ba ruta?

¹³ Ka mohlala, Paulo ga se a ka a ba le tswalano e sego borutho ya go se sege le barutwana ba gagwe. O ile a botša ba-Korinthe gore: “Le xe Le ka ba le baruti ba dikete-kete ba tša Kriste, xa Le na bô-tata-weno ba bantši; xobane motswadi wa lena ka Ebangedi ké nna rè le ba Jesu Kriste.” (1 Ba-Korinthe 4:​15) Ka dinako tše dingwe Paulo o ile a ba a ntšha megokgo ge a be a eletša bao a bego a ba ruta! (Ditiro 20:​31) Gape o ile a bontšha go se fele pelo le botho bjo bogolo kudu. Ka gona o be a ka botša ba-Thesalonika gore: “Se re bexo rè na nasô’ rè le makxatheng a lena ké bonôlô bya mma xo bana xe a amuša ngwana wa xaxwe.”​—1 Ba-Thesalonika 2:7.

14. Ke ka baka la’ng go ba le kgahlego ya motho ka noši ka barutwana ba rena ba Beibele go le bohlokwa gakaakaa? Bontšha.

¹⁴ Na o ekiša Jesu le Paulo? Lerato le le tšwago pelong la go rata barutwana ba rena le ka thiba sekgoba sa tlhaelelo le ge e le efe yeo re ka bago re e-na le yona bokgoning bja rena bja tlhago. Na barutwana ba rena ba Beibele ba kgona go lemoga gore re na le kgahlego e tšwago pelong ya go kgahlišwa ke bona e le motho ka noši? Na re ipha nako ya gore re ba tsebe? Ge mosadi yo mongwe wa Mokriste a be a e-na le bothata bja go thuša morutwana gore a tšwele pele moyeng, o ile a botšiša ka botho gore: “Na go na le se se go tshwenyago?” Mosadi o ile a thoma go ntšha sa mafahleng, a bolela dilo tše dintši tšeo di bego di mo tshwenya le tšeo di bego di mo hlobaetša. Poledišano yeo e lerato e ile ya ba nako ya phetogo e kgolo bakeng sa mosadi yoo. Ditabeng tše bjalo, dikgopolo tša Mangwalo le mantšu a khomotšo le kgothatšo ke tšeo di swanetšego. (Ba-Roma 15:4) Lega go le bjalo, temošo še: Morutwana wa Beibele a ka ba a tšwela pele ka lebelo, eupša a ka ba a sa dutše a e-na le mekgwa e mengwe yeo e sego ya Bokriste yeo a swanetšego go e fenya. Ka gona go ka fo se be bohlale go tlwaelana ka mo go sa swanelago le motho yoo. Go swanetšwe gore go kgomarelwe mellwane e swanetšego ya Bokriste.​—1 Ba-Korinthe 15:33.

15. Re ka bontšha bjang tlhompho ya go hlompha barutwana ba rena ba Beibele?

¹⁵ Go hlompha barutwana ba rena go akaretša gore ga re leke go laola maphelo a bona a motho ka noši. (1 Ba-Thesalonika 4:​11) Ka mohlala, mo gongwe re ithuta le mosadi yo a dulago le monna ba se ba nyalana. Mo gongwe ba ile ba ba le bana gotee. Ka ge a fihletše tsebo e nepagetšego ya go tseba Modimo, mosadi o nyaka go lokiša ditaba le Jehofa. (Ba-Hebere 13:4) Na o swanetše go nyalana le monna yo goba o swanetše go arogana le yena? Mo gongwe re dumela ka go tia gore go nyalana le monna yo a nago le kgahlego e nyenyane ka dilo tša moya goba a se nago yona ka mo go feletšego go ka thibela tšwelopele ya mosadi ya nakong e tlago. Ka lehlakoreng le lengwe, re ka boifela go phela gabotse ga bana ba gagwe gomme ra nagana gore go ka ba kaone kudu ge a ka nyalana le yena. Go sa šetšwe maemo le ge e le afe, go tsena-tsena bophelong bja morutwana le go leka go gatelela dipono tša rena ditabeng tše bjalo, ke mo go se nago lerato le tlhompho. Go ba gona, ke yena a swanetšego go phela le ditla-morago tša phetho. Ka gona, na go be go ka se be kaone kudu, gore re tlwaetše morutwana yo bjalo gore a diriše “matla [a gagwe ka noši] a go nagana” (NW) le go dira phetho ya gagwe ka noši bakeng sa seo a swanetšego go se dira?​—Ba-Hebere 5:14.

16. Bagolo ba ka bontšha bjang lerato le tlhompho ya go hlompha mohlape wa Modimo?

¹⁶ Go bohlokwa ka mo go kgethegilego gore bagolo ba phuthego ba sware mohlape ka lerato le tlhompho. Paulo ge a be a ngwalela Filemone o ile a re: “Byale​—le xe ka Kriste kè na le mafolofolo a xo fo Xo laêla se se swanetšexo—​Ke upya ke rata xo Xo rapêla ka xe leratô è le le kaakaa.” (Filemone 8, 9) Ka dinako tše dingwe go ka tsoga maemo a ferekanyago ka phuthegong. Mo gongwe go ka nyakega gaešita le go tia. Paulo o ile a kgothaletša Tito gore a “sôlê-xê [bafoši] ka thata, ba fôlê bolwetši byoo ka tumêlô.” (Tito 1:​13) Lega go le bjalo, balebeledi ba swanetše go ela hloko gore le ka mohla ba se ke ba bolela le phuthego ka go hloka botho. Paulo o ngwadile gore: “Mohlanka wa Morêna xa a swanêlwa ke dintwa. Se se mo swanetšexo ké xe bohle a ba dira ka botho, xe e le mo-rata-batho, mo-kxôtlêlêla-bošula.”​—2 Timotheo 2:​24; Psalme 141:3.

17. Ke phošo efe yeo Moše a ilego a e dira, gomme bagolo ba ka ithuta eng go yona?

¹⁷ Balebeledi ba swanetše go tšwela pele ba ikgopotša gore ba swaragane le “mohlape wa Modimo.” (1 Petro 5:2, mongwalo o sekamego ke wa rena.) Gaešita le ge e be e le motho yo a ikokobeditšego, Moše o ile a lahlegelwa ke pono ye ka nakwana. Ba-Isiraele “ba be ba mo tenne, a šaetša ka molomo.” (Psalme 106:​33) Modimo o ile a nyamišwa kudu ke go swarwa gampe mo ga mohlape wa Gagwe, gaešita le ge le bona ba be ba e-na le molato. (Numeri 20:​2-12) Ge ba lebeletšane le ditlhohlo tše bjalo lehono, bagolo ba swanetše go katanela go ruta le go laya ka temogo le botho. Banababo rena ba arabela kaone kudu ge ba swarwa ka go naganelwa, ba le bjalo ka batho bao ba nyakago thušo, e sego e lego bao go se nago kholofelo ka bona. Bagolo ba swanetše go kgomarela boemo bjo bo nepagetšego bja kgopolo bjo Paulo a bego a e-na le bjona ge a be a re: “Rena re Le holofetše ka Morêna, xore tše re Le laêlaxo tšôna Le a di dira, ’me Le tlo fêla Le di dira.”​—2 Ba-Thesalonika 3:4.

Go Arabela go Dinyakwa tša Bona

18, 19. (a) Re swanetše go arabela bjang dinyakweng tša barutwana ba Beibele bao ba nago le bokgoni bjo bo lekanyeditšwego? (b) Re ka thuša bjang barutwana bao ba nago le bothata ditabeng tše itšego tše di kgethegilego?

¹⁸ Morutiši yo a atlegago o ikemišeditše go dumelelanya bokgoni bja gagwe le mafokodi a barutwana ba gagwe. (Bapiša le Johane 16:​12.) Seswantšhong sa Jesu sa ditalente, mong-modiro o neile ditokelo “e mongwê le e mongwê a ba lekanyetša matla a bôná.” (Mateo 25:​15) Re ka latela mohlala o swanago ge re swere dithuto tša Beibele. Ka tlwaelo, ke mo go botse gore re fetše kgatišo e theilwego Beibeleng ka nako e kopana ka mo go kwagalago. Lega go le bjalo, re swanetše go dumela gore ga se bohle ba ba nago le bokgoni bjo bobotse bja go bala, goba bokgoni bja go monya dikgopolo tše mpsha ka lebelo. Ka gona, go nyakega temogo ge e le mabapi le nako yeo ka yona re ka fetago ntlheng e nngwe go ya go e nngwe thutong ge e ba batho bao ba arabelago ba na le bothata bja go ithuta ka lebelo. Se bohlokwa kudu go feta gore motho a fetše seo go ithutwago sona ka lebelo le le lekanyeditšwego ke go thuša barutwana go kwešiša seo ba ithutago sona.​—Mateo 13:51.

¹⁹ Go ka bolelwa se se swanago ka barutwana ba Beibele bao ba nago le bothata ka ditaba tše itšego tše di kgethegilego, bjalo ka Boraro botee goba matšatši a maikhutšo a bodumedi. Gaešita le ge e le gore ka kakaretšo ga go nape go nyakega gore re akaretše le ditaba tše di nyakišišitšwego ka mo go tseneletšego Beibeleng dithutong tša rena, re ka fela re dira bjalo ge e ba go le molaleng gore se e ka ba se se holago. Go swanetše gore go dirišwe kahlolo e botse e le gore go thibelwe go diegiša tšwelopele ya morutwana ka mo go sa nyakegego.

Fišega!

20. Paulo o ile a bea bjang mohlala go bontšheng phišego le kgodišego go ruteng ga gagwe?

²⁰ Paulo o re: “Phišêxô a e bé ya Môyeng.” (Ba-Roma 12:​11) Ee, go sa šetšwe gore re swere thuto ya legae ya Beibele goba re tšea karolo karolong e itšego sebokeng sa phuthego, re swanetše go dira bjalo ka phišego le mafolofolo. Paulo o ile a botša ba-Thesalonika gore: “Ka xe Ebangedi ya rena e sa ka Ya Le tlêla ka polêlô fêla; e Le tletše ka matla le ka Môya-mokxêthwa ka mokxwa o kxodišaxo ruri.” (1 Ba-Thesalonika 1:5) Ka gona, Paulo le bagwera ba gagwe ba ile ba nea ‘e sego Ebangedi yeo ya Modimo fela, eupša le bophelo bja bona.’​—1 Ba-Thesalonika 2:8.

21. Re ka kgomarela bjang boemo bja kgopolo bja phišego kabelong ya rena ya go ruta?

²¹ Go fišega ga kgonthe go tlišwa ke go kgodišega ka go tia gore barutwana ba rena ba Beibele ba swanetše go kwa seo re nyakago go se bolela. Le ka mohla anke re se lebelele kabelo le ge e le efe ya go ruta e le mokgwa o tlwaetšwego. Mongwalolodi Esera ka ntle le pelaelo o ile a šetša go ruta ga gagwe tabeng ye. “Pelo ya xaxwe e be e sa lese xo hlwa è nyaka molaô wa Morêna, le xo dira se se bolêlwaxo ke wôna, le xo ruta Isiraele melaô le dithswanêlô.” (Esera 7:​10) Re swanetše go dira ka mo go swanago ka go lokišeletša ka mo go feletšego le ka go naganišiša ka bohlokwa bja taba yeo e ithutwago. A re rapeleng Jehofa gore a re tlatše ka tumelo le kgodišego. (Luka 17:5) Go fišega ga rena go ka thuša barutwana ba Beibele gore ba hlagolele lerato la kgonthe la go rata therešo. Ke therešo gore go šetša thuto ya rena go ka akaretša go diriša mekgwa e mengwe e kgethegilego ya go ruta. Sehlogo sa rena se se latelago se tla ahla-ahla e mengwe ya yona.

[Mengwalo ya tlase]

Na o a Gopola?

◻ Ke ka baka la’ng go nyakega barutiši ba Bakriste ba nago le bokgoni lehono?

◻ Ke mekgwa efe e mebotse ya go ithuta yeo re ka e hlagolelago?

◻ Ke ka baka la’ng lerato le tlhompho ya go hlompha bao re ba rutago di le bohlokwa gakaakaa?

◻ Re ka arabela bjang dinyakweng tša barutwana ba rena ba Beibele?

◻ Ke ka baka la’ng phišego le kgodišego di le bohlokwa ge re ruta ba bangwe?

[Seswantšho go letlakala 10]

Barutiši ba babotse ka bobona ke barutwana ba Lentšu la Modimo

[Seswantšho go letlakala 13]

E-ba le kgahlego ya motho ka noši ka barutwana ba Beibele