Baefeso

4 Ka gona, nna Paulo yo a golegilwego+ ka baka la go dumela go Morena, ke le kgopela gore le sepele ka go dumelelana+ le seo le bileditšwego sona, 2 le dule le ikokobeditše,+ le le boleta, le sa felelane pelo,+ le kgotlelelana ebile le bontšhana lerato.+ 3 Moya o mokgethwa o le dirile batee, ka gona šomang ka thata gore le dule le le batee le go phedišana ka khutšo.+ 4 Go etša ge kholofelo yeo Modimo a le neilego yona e le e tee,+ go na le mmele o tee+ le moya o tee,+ 5 le Morena o tee,+ tumelo e tee, le mohuta o tee wa kolobetšo, 6 le Modimo o tee yo e lego Tatago batho ka moka, yo a bušago batho ka moka le go diriša bohle go dira dilo.

7 Modimo o bontšhitše yo mongwe le yo mongwe wa rena botho bja gagwe bjo bogolo gomme Kriste ke yena a re filego mpho ye.+ 8 Ka gona Lentšu la Modimo le re: “Ge a rotogela godimo o ile a lokolla banna bao ba golegilwego a ba dira gore e be dimpho.”+ 9 Bjale mantšu ao a rego “a rotogela,” a bolela eng? A bolela gore o kile a theogela mo lefaseng. 10 Yena yo a theogilego ke yena yo a ilego a rotogela+ ka kua ga magodimo+ gore a phethagatše dilo ka moka.

11 O kgethile ba bangwe gore e be baapostola,+ ba bangwe e be baporofeta,+ ba bangwe ba bolele ditaba tše dibotse,+ ba bangwe e be badiši le barutiši,+ 12 e le go thuša bakgethwa gore ba sepele tseleng ya go loka, ba hlankele ba bangwe gore ba age mmele wa* Kriste,+ 13 e le gore ka moka re be le tumelo e tee, re tsebe Morwa wa Modimo gabotse, re gole ka mo go feletšego+ go fihlela re eba le dika tša Kriste ka moka, 14 gomme re se sa hlwa re swana le bana. Motho yo a latelago dithuto tša maaka tša batho bao ba forago ba bangwe, o swana le sekepe seo se lego ka lewatleng seo se išwago kua le kua ke maphoto le diphefo.+ 15 Eupša a re boleleng nnete le go bontšhana lerato, ka go dira bjalo re tla ba bao ba godilego dilong ka moka le go phela ka go dumelelana le Kriste e lego hlogo ya rena.+ 16 Re swana le mmele wa motho,+ gomme ka yena ditho ka moka tša mmele woo di kopantšwe gabotse ebile di thuša mmele go šoma gabotse. Ge e ba karolo e nngwe le e nngwe ya mmele e dira mošomo wa yona, mmele woo o gola gabotse gomme re tlo ratana.+

17 Ka gona, ke le lemoša pele ga Morena ke re le se sa hlwa le phela go swana le batho bao e sego badumedi+ bao ba phelago ka tsela ya go hloka tlhaologanyo.+ 18 Ba leswiswing ebile ba ka se hwetše bophelo bjo Modimo a re tshepišitšego bjona, ka baka la ge ba* sa nyake go tseba Modimo le ka baka la ge dipelo tša bona di retetše. 19 Ga ba sa na mekgwa, ba itshwara gampe ba sa jewe ke dihlong,*+ ba dira mehuta ka moka ya ditšhila ebile ba sa kgotsofale.

20 Eupša lena ga se la ithuta gore Kriste o ka tsela e bjalo. 21 Jesu o be a ruta nnete, ka gona ge e ba le kwele ebile le rutilwe dilo tšeo a di rutilego, gona le tseba dilo tše gabotse. 22 Le rutilwe gore le lahle semelo sa kgale+ seo se sepedišanago le kamoo le bego le itshwara ka gona peleng, go ya ka dikganyogo tše mpe tšeo di le timetšago.+ 23 Le dule le fetoša tsela yeo le naganago ka yona.+ 24 Le apareng semelo se seswa+ seo se dirilwego go ya ka thato ya Modimo le melao ya gagwe ya go loka yeo re ka e tshepago.

25 Ka gona, ka ge bjale le lahlile maaka le botšane nnete,+ ka gobane re ditho tša mmele o tee.+ 26 Ge le galefile, le se ke la dira sebe.+ Letšatši le se ke la sobela le sa kwatile,+ 27 e le gore le se ke la nea Diabolo sebaka sa go le laola.+ 28 Yo a utswago a se ke a hlwa a utswa eupša a a šome ka thata, a dire mediro e mebotse ka diatla tša gagwe,+ e le gore a be le selo seo a ka se fago yo a se hlokago.+ 29 Le se ke la bolela dilo tše di bodilego,+ eupša le bolele dilo tše dibotse tšeo di tlago go kgothatša bao ba le theeditšego.+ 30 Le gona le se ke la nyamiša moya o mokgethwa wa Modimo,+ ka gobane le swailwe ka wona+ gore le tle le lokollwe ka topollo ge letšatši la phološo le fihla.+

31 Tlogelang go boloka sekgopi,+ go galefa, go kwata, go hlaba mašata, go hlabana ka mantšu,+ le selo se sengwe le se sengwe seo se kwešago bohloko.+ 32 Eupša bontšhanang botho, le kwelane bohloko,+ le lebalelane ka pelo ka moka go etša ge Modimo le yena a le lebaletše ka pelo ka moka ka baka la seo Kriste a se dirilego.+