Ebangedi ya Mareka

9 Go oketša moo, a re go bona: “Ruri ke le botša gore go na le ba bangwe ba bao ba emego mo, bao ba ka se kego ba hwa go ba go fihla ba bona Mmušo wa Modimo o šetše o buša.”+ 2 Ka morago ga matšatši a tshelelago, Jesu o ile a tšea Petro, Jakobo le Johane a ya le bona thabeng e telele gore ba be noši. Ponagalo ya gagwe ya fetoga pele ga bona,+ 3 diaparo tša gagwe tša ka ntle tša phadima, ya ba tše ditšhweu go feta kamoo mohlwekiši wa diaparo le ge e le ofe lefaseng a ka kgonago go di šweufatša. 4 Le gona ba bona Eliya le Moshe ba boledišana le Jesu. 5 Ke moka Petro a re go Jesu: “Rabi, re thabela go ba mo. Re dumelele gore re hlome ditente tše tharo, e be ya gago, ya Moshe le ya Eliya.” 6 Ge e le gabotse, o be a sa tsebe gore ka morago ga moo a reng, ka ge ba be ba tšhogile kudu. 7 Le gona go ile gwa bopega leru la ba khupetša gomme lentšu+ la kwagala le etšwa lerung le re: “Yo ke Morwa wa ka yo ke mo ratago.+ Le mo theetšeng.”+ 8 Ke moka, gateetee ge ba lebelela go ba dikologa ba bona go se sa na motho yo a nago le bona. Go be go šetše Jesu feela.

9 Ge ba be ba theoga thabeng, o ile a ba botša tsebe-go-kwa gore ba se botše motho ka seo ba se bonego+ go fihlela Morwa wa motho a tsošitšwe bahung.+ 10 Ga se ba ka ba lebala seo Jesu a ba boditšego sona,* eupša ba boledišana ka gore o be a e ra goreng ge a be a bolela ka go tsoga bahung. 11 Ba mmotšiša ba re: “Ke ka baka la eng ditsebi tša molao di re Eliya+ o swanetše go tla pele ga ge Mesia a ka tla?”+ 12 A re go bona: “Eliya o tla pele gore a tsošološe dilo ka moka,+ eupša ke ka baka la eng dilo tše di ngwadilwego di re Morwa wa motho o swanetše go tlaišwa kudu+ a be a swarwe ka lenyatšo?+ 13 Bjale ke re go lena ge e le gabotse Eliya+ o tlile gomme ba mo dirile dilo tšeo ba bego ba nyaka go mo dira tšona, bjalo ka ge go ngwadilwe mabapi le yena.”+

14 Ge ba fihla go barutiwa ba bangwe, ba ile ba bona lešaba le legolo le ba dikologile gomme ditsebi tša molao di be di ba ngangiša.+ 15 Eupša ge lešaba le se na go mmona, le ile la makala gomme la kitimela go yena gore le mo dumediše. 16 Ke moka a botšiša a re: “Le ngangišana le bona ka eng?” 17 Yo mongwe lešabeng a mo araba a re: “Morutiši, ke tlišitše morwa wa ka go wena ka gobane o na le moya wo o dirago gore motho e be semumu.+ 18 Kae le kae moo o mo swarago gona o mo lahlela fase ke moka a tšwa lehulo ka molomong, a lomantšha meno gomme a felelwa ke maatla. Ke kgopetše barutiwa ba gago gore ba o rake eupša ba paletšwe.” 19 Ge a ba araba a re: “Lena moloko wo o se nago tumelo,+ ke swanetše go tšwela pele ke na le lena go fihla neng? Ke swanetše go le kgotlelela go fihla neng? Mo tlišeng mo.”+ 20 Ka gona ba tliša mošemane yoo go Jesu. Eupša ge moya woo o bona Jesu, gateetee wa mo tšutlatšutla. Ge ngwana yoo a se na go wela fase, o ile a kgokologa a etšwa mahulo ka ganong. 21 Jesu a botšiša tatago ngwana yoo a re: “Ngwana yo o na le nako e kaakang se se mo diragalela?” Yena a re: “Go tloga bjaneng. 22 Le gona moya woo o mo lahlela gantši mollong le ka meetseng gore o mmolaye. Eupša ge e ba o ka kgona go mo fodiša, re kwele bohloko o mo fodiše.” 23 Jesu a re go yena: “Ke ka baka la eng o re: ‘Ge e ba o ka kgona’? Ka gobane dilo tšohle di a kgonega ge e ba motho a na le tumelo.”+ 24 Gateetee tatago ngwana yoo a goeletša a re: “Ke na le tumelo! Hle nthuše gore ke be le tumelo e tiilego!”+

25 Bjale ge Jesu a bona gore lešaba le a ba kitimela, a kgalemela moya woo o mobe a re go wona: “Wena moya wo o dirago gore motho yo e be semumu le sefoa, ke go laela gore o tšwe go yena gomme o se hlwe o boela go yena gape.”+ 26 Ka morago ga gore moya woo o goeletše le go tšutlatšutla ngwana yoo o ile wa tšwa gomme ngwana yoo a ba bjalo ka ge eka o hwile, moo batho ba bantši ba ilego ba re: “O hwile!” 27 Eupša Jesu a mo swara ka seatla a mo emiša gomme yena a ema. 28 Ka gona ka morago ga ge a tsene ka ntlong, barutiwa ba gagwe ba ile ba mmotšiša ka sephiring ba re: “Ke ka baka la eng rena re paletšwe ke go raka moya wola?”+ 29 A re go bona: “Moya wa mohuta wo o rakwa feela ka thapelo.”

30 Ge ba tloga moo ba ile ba feta Galelia, eupša o be a sa nyake gore batho ba tsebe seo, 31 ka gobane o be a ruta barutiwa ba gagwe ebile a ba botša gore: “Morwa wa motho o tlo rekišwa a ba a lahlelwa diatleng tša manaba a gagwe, a tla mmolaya,+ eupša le ge a bolailwe, o tla tsošwa ka morago ga matšatši a mararo.”+ 32 Le ge go le bjalo, ba be ba sa kwešiše mantšu ao a gagwe ebile ba be ba tšhaba go mmotšiša.

33 Ke moka ba tsena Kaperenaume. Bjale ge ba be ba le ka ntlong, Jesu o ile a ba botšiša a re: “Le be le ngangišana ka eng kua tseleng?”+ 34 Ba ile ba homola ka gobane tseleng ba be ba ngangišana ka gore mo gare ga bona ke mang yo a lego bohlokwa kudu go ba feta ka moka. 35 Ka gona, a dula fase gomme a bitša baapostola ba gagwe ba 12 a re go bona: “Ge e ba motho le ge e le ofe a nyaka go ba wa mathomo, e swanetše go ba wa mafelelo a be a hlankele ba bangwe ka moka.”+ 36 Ke moka a tšea ngwana yo monyenyane a mmea gare ga bona, a mo gokarela gomme a re go bona: 37 “Mang le mang yo a amogelago batho bao ba swanago le ngwana yo+ ka baka la leina la ka, o amogela le nna. Le gona mang le mang yo a nkamogelago ga a amogele nna ke nnoši eupša o amogela le yo a nthomilego.”+

38  Johane a re go yena: “Morutiši, re bone motho yo mongwe a raka matemona a diriša leina la gago gomme ra leka go mo thibela ka gobane o be a sa sepele le rena.”+ 39 Eupša Jesu a re: “Le se ke la leka go mo thibela, ka gobane ga go na motho yo a ka dirago mohlolo a diriša leina la ka yo a ka bolelago dilo tše mpe ka nna, 40 ka gobane yo a sa lwego le rena o ema le rena.+ 41 Le gona mang le mang yo a le neago meetse gore le nwe ka ge le le ba Kriste,+ ruri ke le botša gore o tla hwetša moputso wa gagwe.+ 42 Eupša ge e ba motho a ka kgopiša batho bao ba swanago le bana ba ba banyenyane bao ba nago le tumelo, go ka ba kaone gore molaleng wa gagwe go tlemelelwe lwala leo le dikološwago ke tonki gomme a lahlelwe ka gare ga lewatle.+

43 “Ge e ba seatla sa gago se go diriša sebe,* se kgaole. Go kaone gore o hwetše bophelo o golofetše go e na le gore o lahlelwe Gehenna,* mollong wo o ka se kego wa tingwa, o na le diatla tše pedi.+ 44* —— 45 Le gona, ge e ba leoto la gago le go diriša sebe, le kgaole. Go kaone gore o hwetše bophelo o hlotša go e na le gore o lahlelwe Gehenna o na le maoto a mabedi.+ 46* —— 47 Le gona, ge e ba leihlo la gago le go diriša sebe, le lahlele kgole le wena.+ Go kaone gore o tsene Mmušong wa Modimo o na le leihlo le letee go e na le gore o lahlelwe Gehenna o na le mahlo a mabedi,+ 48 moo diboko tša gona di sa hwego le mollo wa gona o sa timego.+

49 “Ka gobane batho ka moka ba tla tšhollelwa mollo+ go swana le ge motho a tšholla letswai. 50 Letswai le lona le na le mehola, eupša ge e ba letswai le lahlegelwa ke tatso ya lona, le sa hola ka eng?+ Le lena ebang bjalo ka letswai leo le nago le tatso.+ Ge le ka dira bjalo le tla kgona go dula le na le khutšo gare ga lena.”+