Baefeso

1 Nna Paulo, yo a kgethilwego ke Modimo go ba moapostola wa Kriste Jesu, ke ngwalela Bakriste ba botegago bao ba lego phuthegong ya Efeso+ ebile e le balatedi ba Kriste Jesu ke re:

2 Ke rapela gore Modimo Tatago rena le Morena Jesu Kriste ba ka le bontšha botho bjo bogolo le go le nea khutšo.

3 A re tumišeng Modimo yena Tatago Morena wa rena Jesu Kriste, ka gobane o dirišitše moya o mokgethwa go re šegofatša ka ge re le barutiwa ba Kriste.+ 4 Modimo o re kgethile gore re be balatedi ba Kriste pele batho ba mathomo ba ka ba le bana, gore re be ba bakgethwa gomme borapedi bja rena bo hlweke+ ka ge re mo rata. 5 Ka gobane o re kgethile+ e sa le pele gore re be bana ba gagwe+ a diriša Jesu Kriste go ya ka thato ya gagwe,+ 6 e le gore batho ba tumiše Modimo ka ge a re bontšhitše botho bja gagwe bjo bogolo+ a diriša morwa wa gagwe yo a mo ratago kudu.+ 7 Modimo o re lokolotše a ba a re lopolla a diriša madi a morwa wa gagwe+ gore a re lebalele dibe tša rena.+ Ka nnete bjo ke botho bjo bogolo bja Modimo.

8 Modimo ga se a re tima botho bja gagwe bjo bogolo gotee le bohlale le kwešišo, 9 ka go re tsebiša sephiri sa gagwe se sekgethwa+ sa dilo tšeo a nyakago go di dira. Sephiri seo ke sa dilo tšeo di mo kgahlago tšeo a bego a rerile go di dira. 10 O ikemišeditše go dira gore dilo di laolwe go fihla mafelelong a nako yeo a e beilego gore a kgoboketše dilo ka moka tšeo di lego magodimong le tšeo di lego lefaseng a diriša Kriste.+ Ee, dilo ka moka di tla kgoboketšwa go dirišwa Kriste, 11 gomme rena le yena, Modimo o re kgethile gore re be bajabohwa,+ ka ge a ile a re kgetha e sa le pele ka go dumelelana le morero wa gagwe gore a dire dilo ka moka tšeo a nyakago go di dira, 12 gore Modimo a tumišwe le go tagafatšwa ka rena bao re bilego ba mathomo ba go dumela go Kriste. 13 Eupša ka morago ga gore le kwe lentšu la therešo, e lego ditaba tše dibotse tša mabapi le phološo ya lena, le ile la dumela go yena ke moka la swaiwa+ ka moya o mokgethwa wo Modimo a le holofeditšego wona, 14 woo a ilego a re kgonthišetša ka wona e sa le pele gore o tla re nea bohwa bja rena.+ Modimo o dirile se gore a lokolle batho ba gagwe+ a diriša topollo+ gomme se sa dira gore a tumišwe.

15 Ka ge ke kwele ka tumelo yeo le nago le yona go Morena Jesu le tsela yeo le bontšhago gore le rata bakgethwa* ka moka, 16 ga ke tlogele go leboga Modimo ka baka la lena. Ke dula ke le rapelela, 17 gore Modimo wa Morena wa rena Jesu Kriste, yena Tate wa letago, a le thuše gore le be bohlale le go le utollela dilo tšeo di le thušago gore le kgone go mo tseba gabotse.+ 18 O ile a le bula mahlo gore le bone le go tseba kholofelo yeo a le bileditšego go yona le ditšhegofatšo tše di sa bapišwego le selo tšeo e lego bohwa bja bakgethwa,+ 19 le gore le bone kamoo a bontšhago maatla a gagwe a magolo go rena badumedi.+ Maatla a a bonagala dilong tšeo a di dirilego, 20 ge a be a tsoša Kriste bahung gomme a mmea ka letsogong la gagwe le letona+ magodimong, 21 ka godimodimo ga mmušo o mongwe le o mongwe, bolaodi, maatla, borena le leina le lengwe le le lengwe,+ e sego feela mo nakong ye,* eupša le nakong e tlago. 22 Le gona Modimo o dirile gore a laole dilo ka moka*+ gomme a mo dira hlogo ya dilo ka moka ka phuthegong.+ 23 Phuthego yeo ke mmele wa Kriste,+ yeo a e tlatšago ka dika tša gagwe le go dira gore dilo ka moka di felele.