Baheberu

13 Tšwelang pele le ratana go swana le bana ba motho.+ 2 Le se ke la lebala go amogela baeng,+ ka gobane ka go dira bjalo ba bangwe ba ile ba amogela barongwa ba sa tsebe.+ 3 Le dule le nagana ka bao ba lego kgolegong+ bjalo ka ge eka le kgolegong le bona,+ ebile le dule le nagana ka bao ba swarwago gampe, bjalo ka ge eka le lena le tlaišega le bona.* 4  Batho ka moka a ba hlomphe lenyalo, gomme banyalani ba tshepagalelane,+ ka gobane Modimo o tla ahlola batho bao ba itshwarago gampe ka tša thobalano* le bao ba hlotlolago.*+ 5 Le se ke la rata tšhelete,+ eupša le kgotsofalele dilo ka moka tšeo le nago le tšona.+ Ka gobane Modimo o itše: “Nka se tsoge ke go tlogetše, le gona nka se tsoge ke go lahlile.”+ 6 Ka baka leo, a re beng le sebete gomme re re: “Jehofa* ke yena a nthušago, nka se boife. Motho a ka ntirang?”+

7 Dulang le nagana ka bao ba le etelelago pele,+ bao ba le rutilego lentšu la Modimo, gomme ge le dutše le nagana ka boitshwaro bja bona bjo bobotse, le ekiše tumelo ya bona.+

8 Jesu Kriste ga a fetoge, o no swana le maabane le lehono ebile o tla dula a le bjalo go ya go ile.

9 Le se ke la arošwa ke dithuto tše di fapafapanego gotee le dithuto tšeo di sa swanego le tšeo re di amogetšego. Ka gobane go kaone gore botho bjo bogolo bja Modimo e be bjona bo le thušago gore le dule le tiile, e sego dijo, ka gobane bao ba dulago ba tshwenyegile ka dijo ga ba holege ka selo.+

10 Re na le aletare, gomme batho bao ba hlankelago taberenakeleng ga se ba swanela go ja selo le ge e le sefe seo se lego go yona.+ 11 Ka gobane moperisita yo a phagamego o be a iša madi a diphoofolo lefelong le lekgethwa e le sebego sa sebe, gomme diphoofolo tšeo tše di hwilego di be di fišetšwa ka ntle ga ditente.+ 12 Jesu le yena o ile a tlaišwa ka ntle ga motse,+ e le gore madi a gagwe a tle a dire gore batho ba se sa ba le sebe.+ 13 Ka gona a re yeng ka ntle ga ditente, re kgotlelele go tlontlollwa go swana le yena,+ 14 ka gobane gona bjale ga re na motse wo o dulago o le gona, eupša re sa nyakana le motse wo o tlago go agwa nakong e tlago.+ 15 Ka ge re na le tumelo go Jesu, a re duleng re tumiša Modimo,+ ge re dira bjalo, go no swana le ge re direla Modimo sehlabelo re diriša melomo ya rena+ go bolela ka leina la gagwe.+ 16 Le gona, le se ke la lebala go direla batho ba bangwe dilo tše dibotse le go ba fa tše dingwe tša dilo tšeo le nago le tšona,+ ka gobane Modimo o thabišwa ke dihlabelo tše bjalo.+

17 Ekwang bao ba le etelelago pele+ le be le ikokobeletše bona,+ ka gobane ba dula ba le hlokometše, ebile Modimo o tla ba ahlola go ya le ka dilo tšeo ba di dirago.+ Ge e ba le dira bjalo, ba tla kgona go dira mošomo wa bona ba thabile, e sego ba nyamile, e le gore le se ke la gobala.

18 Tšwelang pele le re rapelela, ka gobane re tshepa gore re na le letswalo le le hlwekilego, le gona re nyaka go tshepega dilong ka moka.+ 19 Ke tloga ke le kgopela gore le nthapelele e le gore ke tle ke boele go lena kapejana.

20 Modimo wa khutšo ke yena a tsošitšego Morena wa rena Jesu bahung.+ Jesu ke yena a tlišitšego madi a kgwerano ya go ya go ile go Modimo, ebile ke modiši yo mogolo wa dinku. Bjale eka Modimo wa khutšo 21 a ka le fa selo se sengwe le se sengwe se sebotse e le gore le dire seo a se nyakago. O diriša Jesu Kriste go re hlohleletša go dira seo a se nyakago. Anke Modimo a tumišwe go ya go ile. Amene.

22 Bjale banabešo, ke kgopela le theetše mantšu a a kgothatšago le sa fele pelo, ka gobane ke le ngwaletše lengwalo le le kopana. 23 Ke le tsebiša gore ngwanabo rena Timotheo o lokolotšwe. Ge e ba a ka tla ka pela, ke tla tla le yena go tlo le bona.

24 Ntumedišetšeng bohle bao ba le etelelago pele le bakgethwa* ka moka. Banababo rena ba Italia+ ba a le dumediša.

25 Eka Modimo a ka tšwela pele a le bontšha botho bjo bogolo.