Petro wa Pele

3 Le lena basadi, ikokobeletšeng banna ba lena,+ e le gore ge e ba ba sa kwe Lentšu la Modimo, ba tle ba be le tumelo ka baka la go bona boitshwaro bja lena, e sego ka baka la dilo tšeo le di bolelago.+ 2 Banna bao ba ka ba le tumelo ka ge ba tla be ba bona gore le itshwara ka tsela e hlwekilego+ ebile le ba hlompha ka mo go tseneletšego. 3 Le se ke la tshwenyega kudu ka go ikgabiša ka go loga moriri, ka go rwala dilo tša go ikgabiša tša gauta+ goba go apara diaparo tša go tura, 4 eupša tshwenyegang ka gore bobotse bja lena bo bonagale ka seo le lego sona pelong. Ka gona ikgabišeng ka dilo tšeo di sa senyegego, e lego go phedišana le ba bangwe ka khutšo le go ba boleta.+ Dilo tše ke tšona tšeo di lego bohlokwa kudu go Modimo. 5 Ka gobane basadi ba bakgethwa ba mehleng ya kgale bao ba bego ba tshepile Modimo le bona ba be ba ikgabiša ka tsela yeo, ba ikokobeletša banna ba bona, 6 go no swana le ge Sara a be a ekwa Aborahama, a mmitša morena.+ Lena le fetogile barwedi ba gagwe, ge e ba le tšwela pele le dira dilo tše di lokilego ebile le sa tšhabe selo.+

7 Le lena banna, tšwelang pele le phedišana le basadi ba lena ka tsela yeo e bontšhago gore le a ba kwešiša.* Le ba swareng gabotse+ bjalo ka ge eka le swara sebjana seo se thubegago, ka gobane le bona Modimo o ba file mpho ya bophelo go no swana le ge le lena a le file yona+ go ya ka botho bja gagwe bjo bo sa re swanelago,* ka gobane ge le ka se dire bjalo Modimo a ka se kwe dithapelo tša lena.

8 Ke fetša ka gore, ka moka ga lena ebang ngatana e tee,+ le kwelane bohloko, le ratane bjalo ka bana ba motho, le šokelane+ le be le ikokobetše.+ 9 Le se ke la swara batho ba bangwe gampe ge bona ba le swere gampe,+ goba la ba roga ge bona ba le rogile.+ Eupša le ba direle dilo tše dibotse,+ ka gobane Modimo o le kgethile gore le tle le šegofatše batho, e le gore le yena a tle a le šegofatše.

10 Ka gobane Mangwalo a re: “Yo a ratago bophelo ebile a nyaka go ipshina ka bjona, o swanetše go netefatša gore ga a bolele selo se sebe+ ebile a se ke a bolela maaka. 11 Anke a tlogele go dira se sebe+ gomme a dire se sebotse.+ Le gona a tsome khutšo a be a e phegelele.+ 12 Ka gobane Jehofa* o dula a lebeletše baloki, gomme o a ba kwa ge ba llela gore a ba thuše,+ eupša Jehofa o lwa le bao ba dirago dilo tše mpe.”+

13 Ge e le gabotse, ke mang yo a tlago go le kweša bohloko ge e ba le dira dilo tše dibotse ka pelo ka moka?+ 14 Le ge le tlaišwa ka ge le dira seo se lokilego, le a thaba.+ Eupša le se ke la tšhaba dilo tšeo batho ba bangwe ba di tšhabago, ebile le se ke la tshwenyega.+ 15 Dumelang ka dipelong tša lena gore Kriste ke Morena le gore ke yo mokgethwa. Le dule le itokišeditše go araba motho le ge e le ofe yo a le botšišago ka kholofelo ya lena, eupša ge le araba le be bonolo+ ebile le bontšhe gore le na le tlhompho e tseneletšego.+

16 Le dule le na le letswalo le lebotse,+ e le gore ge batho ba bolela selo se sebe ka lena ka tsela le ge e le efe, ba tle ba hlabje ke dihlong+ ka ge le tla be le itshwere gabotse bjalo ka balatedi ba Kriste.+ 17 Ge e ba Modimo a dumelela gore le tlaišege ka baka la ge le dira dilo tše dibotse,+ seo se kaone kudu go feta ge le tlaišega ka baka la ge le dira dilo tše mpe.+ 18 Ka gobane Kriste yo a lokilego o ile a hwa gatee ya ba moka,+ yena motho yo a lokilego a hwela batho ba sa lokago+ e le gore a ba thuše go hwetša Modimo.+ Kriste o ile a bolawa e le motho wa nama,+ eupša Modimo a mo tsoša ka mmele wa moya.+ 19 Ka mmele woo wa moya, o ile a iša molaetša wa kahlolo go barongwa bao ba bego ba le kgolegong+ 20 bao ba kilego ba se kwe Modimo mehleng ya Noa.+ Modimo o be a letile ka go se fele pelo ge areka e be e agwa.+ Areka yeo e ile ya phološa batho ba* seswai feela nakong ya meetsefula.+

21 Go na le selo se sengwe seo se swanago le se seo se le phološago, e lego go kolobetšwa, ka gobane le dumela gore Jesu Kriste o tsošitšwe bahung. Ge motho a kolobetšwa ga se gore o tlošwa ditšhila tša nama, eupša o kgopela Modimo gore a mo thuše go ba le letswalo le lebotse.+ 22 Kriste o dutše ka letsogong le letona la Modimo+ ka gobane o ile legodimong, gomme Modimo o mo phagamišitše e le gore barongwa ka moka, balaodi le mebušo ka moka e ikokobeletše yena.+