Bafsa ba Bakriste Tiang Tumelong

“BOHLE ba swanetše go ba gona.” Ke kamoo tsebišo e tšwilego ka gona. Barutwana ka moka sekolong se sengwe sa kua Japane ba ile ba swanelwa ke go ba gona sebokeng sa kakaretšo ka holong. Morutwana o mongwe o mofsa wa Mokriste o be a ka se dumelelane le dilo tše dingwe tšeo di bego di bolelwa kopelong ya sekolo. O ile a re, “Ke a tseba gore go tla bapalwa koša ya sekolo. Eupja nka se ke ka ba le mathata. Ke tla fo dulela kua morago bjalo ka mehleng.”

Lega go le bjalo, ge Hlatse e nyenyane ya Jehofa e tsena ka holong, e ile ya hwetša barutiši ka moka ba dutše ditulong tša kua morago. Ka gona e ile ya swanelwa ke go dula ka pele ga bona. Ge barutwana ba bangwe ba ema ka maoto gore ba opele kopelo ya sekolo, ka tlhompho o ile a šala a dutše fase. Eupja barutiši ba ile ba befedišwa ke se. Ba ile ba leka ka matla go mo gapeletša gore a eme. Na o ka akanya o le boemong bjo bo bjalo? O be o tla dira’ng?

Lebaka Leo ka Lona go Nyakegago Tumelo e Tiilego

Go be go tla ba kaone ge nkabe batho ba be ba ka lesa Bakriste gomme ba ba dumelela go phela ka go dumelelana le letswalo la bona leo le tlwaeditšwego ka Beibele. Lega go le bjalo, gantši Bakriste ba swanelwa ke go lebana le maemo a thata. Se ga se sa swanela go re makatša ka gobane Morwa wa Modimo ka noši Jesu Kriste o itše: “Xe Nna ba nthlomere, le lena ba tlo Le hlômara.” (Johane 15:​20) Ka ntle le tlaišo e lebanyago, bahlanka ba Jehofa ba lebana le diteko tše dingwe tše di fapa-fapanego tša tumelo.

Bafsa ba Bakriste gantši ba swanelwa ke go ba le tumelo e tiilego gore ba lebeletšane le diteko tšeo di ba tlelago sekolong. Mo gongwe ba ka gapeletšega go ba gotee le bao ba tsenago le bona ka klaseng bao ba bolelago mahlapa goba bao ba nago le mekgwa yeo e nyatšago Modimo. Bakriste ba bafsa mo gongwe ba ka lebana le go godišwa ga botšhaba le kgateletšo ya go tsena dihlopheng tša dipapadi, dipolitiking tša sekolo, goba dilong tše dingwe tšeo di ka bago kotsi moyeng. Barutiši goba barutwana-gotee le bona mo gongwe ba ka leka go gapeletša Bakriste ba bafsa go kwanantšha. Ka gona, bafsa bao ba boifago Modimo ba swanetše go ithekga ka moya wa Jehofa gore ba be le tumelo yeo e nyakegago bakeng sa go emela kholofelo ya bona ka mo go kwalago.​—Mateo 10:​19, 20; Ba-Galatia 5:​22, 23.

‘Dula o Itokišeditše go Ipolela’

Keletšo ya moapostola Petro ke yeo e swanetšego go Bakriste ba bafsa gotee le ba bagolo. O itše: “Ka mehla le be ba itokišeditšego go ipolela go e mongwe le e mongwe e a tsomago go fiwa taetšo ya kholofelo e lego go lena. Le dire fao ka boleta le ka poifo.” (1 Petro 3:​15-16, PK) Ke eng seo se nyakegago gore go dirwe boipolelo bjo bo bjalo? Sa pele, o swanetše go kwešiša seo Mangwalo a se rutago. Gore o eme ka go tia ditabeng tše bjalo ka botšhaba, dipolitiki, go dirišwa gampe ga dihlare-tagi, goba ditabeng tša boitshwaro sekolong, o swanetše gore sa pele o kwešiše lebaka la boemo bjo bo tiilego bja Bokriste gomme o swanetše go dumelelana le lona e le ka kgonthe.

Ka mohlala, moapostola Paulo o boditše Bakriste-gotee le yena gore: “Le se ke la arošwa. Ditlwaelano tše mpe di senya mekgwa e mebotse.” (1 Ba-Korinthe 15:​33, NW) Na o dumelelana le seo? Bjalo ka ge Paulo a bontšhitše, go bonolo go arošwa tabeng ya bagwera. Motho o mongwe a ka bonagala e le yo a ratago batho le yo a kgahlišago. Eupja ge e ba a sa kgomege ka tirelo ya Jehofa bjalo ka wena goba a bile a sa dumele dikholofetšo tša Beibele, ke mogwera o mobe. Ka baka la’ng? Ka gobane bophelo bja gagwe bo theilwe melaong e fapanego ya motheo, le gona dilo tšeo di lego bohlokwa go Mokriste mo gongwe e ka ba tše di sa rego selo go yena.

Se ga se makatše, ka gobane Jesu o boletše ka balatedi ba gagwe gore: “Xa se ba lefase, byalo ka Nna kè se wa lefase.” (Johane 17:​16) Motho a ka se ke a ba Mokriste wa therešo gomme a ba a ba karolo ya lefase le leo Sathane e lego modimo wa lona. (2 Ba-Korinthe 4:4) Na o bona kamoo go arogana le lefase go šireletšago Mokriste ka gona bohwirihwiring le dintweng tšeo di tlaišago batho ba bantši gakaakaa lehono? Ge e ba o bona seo, gona o kgona go kwešiša lebaka leo ka lona o swanetšego go dula o arogile, lege se se ka nyaka gore o se ke wa tsenela dipapadi tše itšego tša sekolo.a

Bohlokwa bja go tia tumelong le go etiša pele dikgahlego tša Mmušo bophelong bo bontšhitšwe tabeng ya ngwanenyana o mongwe o monyenyane wa Mokriste. (Mateo 6:​33) Ge go be go tsebišwa letšatši leo a bego a tla ya ditlwaetšong tša monyanya wa dialoga ka lona, o ile a hwetša gore le beilwe letšatšing le tee le kopano ya tikologo ya Dihlatse tša Jehofa yeo a bego a rulagantše go ya go yona. O ile a ngwala lengwalo ka tlhompho gomme a hlalosa lebaka leo ka lona a bego a ka se ke a ba gona ditlwaetšong, a le nea morutiši wa gagwe pele dithuto di thoma. Ka morago ga dithuto, morutiši o ile a mmiletša ka thoko gomme a mmotšiša lebaka leo ka lona a bego a ka se ke a tla ditlwaetšong. Ngwanenyana o re: “O be a nyaka go bona ge e ba ke tla bolela taba e swanago. Na a e be e le maikwelo a-ka goba tše di ngwadilwego lengwalong e be e fo ba dikgopolo tša mma? Ge a bona tumelo ya-ka tabeng ye, ga se a ka a nkganetša.”

‘Ipoleleng go e Mongwe le e Mongwe’

Bafsa ba Bakriste gantši ba hwetša gore ge ba hlalosa boemo bja bona gabotse go barutiši le barutwana pele go tsoga kgang, ga go be le kgateletšo kudu ge go swanetše gore go lebeletšanwe le mathata. Mokriste o mongwe o mofsa wa Mojapane o bolela gore ge a be a e-na le nywaga e 11, sekolo seo a bego a tsena go sona se be se nyaka gore barutwana ka moka ba be gona monyanyeng wa Keresemose. Barutwana bao ba lego mephatong ya ka pele ga wa gagwe ba ile ba mo gapeletša gore a be gona, eupja ga se a ka a ya, gomme morutiši wa gagwe o ile a kwešiša boemo bja gagwe. Ka baka la’ng? Ka gobane mathomong a ngwaga wa dithuto, Hlatse ye le batswadi ba yona ba ile ba kopana le morutiši gomme ba hlalosa dibopego tše di fapa-fapanego tša boemo bja bona bja Bokriste.

Bakriste ba bangwe ba bafsa ge ba le bodireding bja tšhemo ba boifa gore ba tla gahlana le bao ba lego klaseng e tee le bona goba barutiši. Na o ikwa ka tsela yeo? Ge e ba go le bjalo, ke ka baka la’ng o sa ithwale gomme o botše bao ba lego mphatong o tee le wena gore o tšama o bolela ditaba tše di lokilego ka ntlo le ntlo le lebaka leo ka lona o dirago seo. Hlatse e nngwe ya Jehofa ye e nago le nywaga e 14 e begile gore: “Mang le mang sekolong o tseba boemo bja-ka ke le Mokriste. Ba bo tseba gabotse mo e lego gore ge nka gahlana le yo ke tsenago le yena ka klaseng ke le bodireding, ga ke lewe ke dihlong. Barutwana-gotee le nna ba a theetša ka mehla, gomme gantši ba amogela dipuku tša Beibele.” Mofsa wa nywaga e 12 o bega gore o dula a ikemišeditše go gahlana le bao a tsenago le bona ka klaseng ge a le bodireding. Go e na le go tšhošwa ke se, ka mehla o ikgopotša seo a tlago go se bolela ge se se direga. Ka gona, o dula a itokišeditše go nea mabaka a kwalago a tumelo ya gagwe.

Dikolong tše dintši go bolelwa gore mediro ya ka morago ga lenaneo-thuto e dirwa ka go rata. Eupja ge e le gabotse, barutiši gotee le barutwana ba gapeletša batho gore ba tsenele mediro e bjalo. Mokriste wa nywaga e 20 o ile a hwetša mokgwa o mobotse wa go lebeletšana le kgateletšo ye. O re: “Ke ile ka dira ke le mmulamadibogo wa go thuša nakong ka moka ya ge ke le sekolong se se phagamego. Mang le mang o be a tseba gore ke swaregile kudu ka mediro ya-ka ya bodumedi go ka tsena dilong tše dingwe.” Kgaetšedi e nyenyane ya Hlatse ye le yona e ile ya latela mohlala o swanago. Bafsa ba bangwe ba Bakriste ba tloga tirelong ya bobulamadibogo bja go thuša nywageng ya go tsena sekolo go ya modirong wa bobulamadibogo bja ka mehla e le bagoeledi ba Mmušo ba nako e tletšego ge ba feditše sekolo.

Le ka mohla o se ke wa tšeela fase mafelelo a mabotse a boitshwaro bja gago bjo bobotse gotee le go nea ga gago bohlatse ka sebete. Go e na le gore o homole, ke ka baka la’ng o sa bontšhe gore o tiile tumelong ka go bolela ka tlhompho eupja o e-na le sebete? Se ke seo se ilego sa dirwa ke ngwanenyana wa mo-Isiraele yo a bego a išitšwe bothopja gomme a dula ngwakong wa molaodi wa madira wa Siria Naemane. (2 Dikxoši 5:​2-4) Leina la Jehofa le ile la tumišwa ka baka la mogato wa pele wo o gatilwego ke ngwanenyana yo. Go bontšha ga gago tumelo e bjalo le gona go ka tlišetša Modimo kgodišo gomme go ka thuša ba bangwe go ema ba tiile e le batumiši ba leina la gagwe.

Therešo ke gore ga go kamoo re ka kwanantšhago tumelo ya rena ka gona gomme ra tšwela pele re le Bakriste. Jesu o itše: “Mang le mang e a mpolêlaxo pele xa batho, le Nna ke tlo mmolêla pele ga Tate wa maxodimong. Xomme e a ntahlaxo pele xa batho, le Nna ke tlo mo lahla pele xa Tate wa maxodimong.” (Mateo 10:​32, 33) Go tia tumelong o le molatedi wa Jesu ke boikarabelo bjo bogolo, na ga go bjalo?

Thušo e a Hwetšagala

Gore o kgone go ema o tiile o le o mongwe wa Dihlatse tša Jehofa, o swanetše go ba le tumelo e tiilego. Gore o be bjalo, o swanetše go ithuta Beibele ka mafolofolo, o be gona dibokeng tša Bokriste, gomme o ye bodireding bja tšhemo. Ge e ba o bona eka go sa na le se se hlaelago, o swanetše go dira’ng? Morutiwa Jakobo o itše: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo, Yêna wa xo nea bohle ka xo rata, à sa nyatše motho. A a kxopêlê a fiwê.” (Jakobo 1:5) Botša Jehofa bothata bja gago ka thapelo; a ka go matlafatša gore o kgone go lebeletšana le diteko tše di lekago tumelo ya gago.

Ke eng se sengwe seo Mokriste o mofsa a ka se dirago? Puku ya Diema e a re botša: “Kwaa tat’axo, yêna motswadi wa xaxo; ’me mmaxo xe a kxekotše, O se kê wa mo nyatša.” (Diema 23:​22) Moapostola Paulo o ile a thekga keletšo ye, ka gobane o itše: “Lena Bana! Kwang batswadi ba lena dilong tšohle; xobane ké sôna se se kxahlaxo Morêna.” (Ba-Kolose 3:​20) Batswadi ba Bakriste ba ka go thuša go tia tumelong. Theetša dikeletšo tša bona. Ka thušo ya bona, nyakišiša Mangwalong le dipukung tše di theilwego Beibeleng, o nyake dikgopolo, keletšo le diphihlelo. Wena gotee le batswadi ba gago le tla thabela se, gomme se tla le thuša go fenya letšhogo goba poifo.​—2 Timotheo 1:7.

Diriša ka botlalo mehola ya ditokišetšo tšeo Jehofa Modimo a di dirilego ka phuthego ya Bokriste. Lokišeletša diboka gabotse. Boledišana le bagolo bao ba kgethilwego gotee le ba bangwe bao ba bilego le diphihlelo tše swanago le tšeo gona bjale o lebanego le tšona. Salomo o itše: “Yo bohlale ó tlo di kwa, a atêlwa ke mahlale; le wa maitse a huma dikeletšô.” (Diema 1:5) Ka gona ithute go batho ba bao ba gotšego. Le gona o ka ithuta go bafsa ba Bakriste bao ba lwantšhanago le mathata a swanago le a gago ka katlego.

Go Botega go Tliša Ditšhegofatšo

Ka go ema o tiile tumelong, o tla ba o diriša keletšo ya Paulo ya gore “Tiang matla, Le se kê la têkêma, Le tiêlêlê modirong wa Morêna mo xo fêla.” (1 Ba-Korinthe 15:​58) Jehofa o a tseba e bile o kwešiša mathata ao o lebanego le ona. O matlafaditše ba bantši bao ba ilego ba lebana le mathata a swanago, gomme le wena o tla go matlafatša. Ge e ba o ithekga ka Modimo, o tla go thekga, ka gobane mopsalme o itše: “Lahlêla Morêna morwalô wa xaxo; Yêna ó tlo xo babalêla; a ka se kê a bá a lesa moloki xe a ka šuthišwa.”​—Psalme 55:22.

Petro o ngwadile gore: “Le dirê fao ka bolêta le ka xo boifa, letswalô la lena lé sa tsebe molato; xore ba ba Le pharaxo e ke Le disenyi, ba lewê ke dihlong, bôná-bao ba xo xoboša tsela e botse ye Le e swerexo Lè le ba Kriste.” (1 Petro 3:​16) Ge e ba o gana go kwanantšha mabapi le melao gotee le melao e lokilego ya motheo ya Modimo, gona o tla ba le letswalo le lebotse, e lego tšhegofatšo e tšwago go Jehofa. Go feta moo, o tla ba mohlala o mobotse go bafsa ba Bakriste bao tumelo ya bona e ka bago e fokola. (1 Timotheo 4:​15, 16) Boitshwaro bja gago bo ka ba kgothaletša go dira boiteko bja gore ba tie tumelong gomme ka go dira bjalo ba kgone go kgotlelela diteko.

O ka ba wa thuša gaešita le bao pele ba bego ba ganetša boemo bja gago bja Bokriste. Gopola mantšu a a neago kholofelo: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela; xoba xo tlo mela yeno xoba yela, xoba ka dipedi.” (Mmoledi 11:6) Ke mang e a tsebago mafelelo a mabotse ao a ka tšwelelago ka go bjala ga gago peu e botse ka baka la ditiro tša gago tša go botega?

E nngwe ya mehola e megolo yeo o tlago go e hwetša ke boemo bjo bo amogelegago go Jehofa. Mafelelong, go tia tumelong go tla tliša bophelo bjo bo sa felego. (Johane 17:3; bapiša le Jakobo 1:​12.) Go hunologa molekong ka nakwana ka baka la go kwanantšha ga se selo seo se ka re lobišago mpho yeo.

Go thwe’ng ka mofsa yo a boletšwego mathomong a sehlogo se? O ile a kgotlelela bothata bja gagwe. Ka morago ga pokano ya sekolo, o ile a leka ka bohlale go hlalosetša barutiši boemo bja gagwe. Lege mantšu a gagwe a ile a tšeišwa phefo, o be a kgotsofetše ka baka la go tseba gore o thabišitše pelo ya Jehofa. (Diema 27:​11) O ile a tšwela pele go šireletša tumelo ya gagwe go fihlela a fetša sekolo. Ka morago o ile a ba mmulamadibogo. Eka go kgotlelela ga gago ka go botega go ka ba le mafelelo a swanago a thabišago. Go tla ba bjalo ge e ba o le yo a tiilego tumelong.

[Mengwalo ya tlase]

[Lepokisi go letlakala 25]

THUŠO E A HWETŠAGALA

◻ Theetša bohlale bja batswadi ba gago bao ba boifago Modimo.

◻ Diriša ka mo go holago ditokišetšo tša moya ka phuthegong ya Bokriste.

◻ Boledišana le bagolo bao ba kgethilwego gotee le ba bangwe bao ba ka bago ba bile le mathata a swanago le a gago.

◻ Boledišana le Bakriste ba bangwe ba bafsa bao ba ka bago ba lwantšhana ka katlego le ditšhitišo tše di swanago.