Baroma

8 Bao ba lego boteeng le Kriste Jesu ga ba bonwe molato. 2 Ka gobane molao wa moya o mokgethwa o le nea bophelo, gore le phele le le boteeng le Kriste Jesu. Molao woo ke wona o le lokollago+ go molao wa sebe le wa lehu. 3 Molao wa Moshe ga o na maatla a go le lokolla+ ka gobane le a fokola+ ebile le na le sebe. Modimo o le lokolotše ka gore a romele Morwa wa gagwe+ gore a be motho go swana le batho bao ba nago le sebe+ gore a tle a fediše sebe. Ka ge Modimo a ahlola sebe seo re nago le sona, 4 seo se tlo dira gore re dire dilo tše di lokilego+ tšeo molao o rego re di dire ka go dumelela moya wa Modimo o re laola, go e na le go laolwa ke mebele ya rena yeo e nago le sebe.+ 5 Ka gobane batho bao ba dirago dilo tšeo mebele ya bona e nyakago gore ba di dire, ba dula ba nagana ka dilo tše mpe,+ eupša batho bao ba laolwago ke moya o mokgethwa ba dula ba nagana ka dilo tšeo di dumelelanago le moya o mokgethwa.+ 6 Ge re dula re nagana ka dilo tše mpe re tlo hwa,+ eupša ge re dula re nagana ka dilo tšeo di dumelelanago le moya o mokgethwa re tlo phela gomme ra ba le khutšo.+ 7 Ge e ba re dula re naganne ka dilo tše mpe re tla be re itira manaba a Modimo.+ Le gona ge e ba motho a dula a nagana ka dilo tše mpe a ka se kgone go kwa molao wa Modimo, le gatee a ka se ke. 8 Bao ba dirago dilo tše mpe ba ka se kgone go kgahliša Modimo.

9 Ge e ba le na le moya wa Modimo, le ka se phele ka go dumelelana le dilo tšeo mebele ya lena e nyakago le di dira, eupša le tlo phela ka go dumelelana le moya.+ Ge e ba motho a se na moya wa Kriste, gona motho yoo ga se wa Kriste. 10 Ge e ba le le boteeng le Kriste,+ le ge le ka hwa ka baka la sebe, moya o tlo le fa bophelo. 11 Moya wa Modimo o tsošitše Jesu bahung. Ge e ba le lena le na le moya woo, Modimo yo a tsošitšego Kriste Jesu bahung+ o tla šomiša moya woo go dira gore mebele ya lena yeo e hwago e phele.+

12 Ka gona banabešo, a re se ke ra dumelela mebele ya rena e re laola ka go dira dilo tšeo e di nyakago.+ 13 Ge e ba le laolwa ke dilo tšeo mebele ya lena e di nyakago le tlo hwa,+ eupša ge e ba le ka dumelela moya o mokgethwa o le thuša go tlogela dilo tše mpe le tlo phela.+ 14 Ka gobane bao ba hlahlwago ke moya wa Modimo, ke bana ba Modimo ka nnete.+ 15 Ga se la amogela moya wo o le dirago makgoba le wo o dirago gore le boife, eupša le amogetše moya wo o dirago gore le be bana ba Modimo.* Moya wo o dira gore re goeletše re re: “Aba,* Tate!”+ 16 Moya woo o re kgonthišetša+ gore re bana ba Modimo.+ 17 Ge e ba re le bana ba Modimo re tlo hwetša bohwa bjo Modimo a tlago go re nea bjona, re tlo ba bajabohwagotee+ le Kriste, eupša re swanetše go tlaišega le yena+ pele e le gore re tle re tagafatšwe gotee le yena.+

18 Dilo tšeo re tlaišegago ka tšona ga se selo ge di bapetšwa le letago leo re tlago go le newa.+ 19 Ka gobane tlholo ya Modimo e fela pelo ya gore bana ba Modimo ba tle ba utollwe.+ 20 Modimo o ile a dira gore tlholo e ahlolelwe bophelo bjo bo se nago bokamoso+ le ge yona e be e sa nyake. Le ge go le bjalo ge Modimo a be a ntšha kahlolo yeo, o ile a re nea kholofelo 21 e le gore tlholo e lokollwe+ bokgobeng bja sebe le lehu, le gore e be le tokologo yeo bana ba Modimo ba nago le yona. 22 Ka gobane re a tseba gore tlholo e hlobaela mmogo le go kwa bohloko go fihla ga bjale. 23 Le rena bao re nago le dienywa tša pele, e lego moya o mokgethwa, re a hlobaela+ ge re dutše re letile letšatši leo re tlago go dirwa bana ba gagwe.+ Ka nako yeo re tlo lokollwa mebeleng ya rena ka topollo. 24 Ge re be re phološwa re ile ra ba le kholofelo, eupša kholofelo yeo re kgonago go e bona ga se ya nnete ka gobane ga go kgonege gore motho a holofele seo a se bonago. 25 Eupša ge re holofela+ dilo tšeo re sa kgonego go di bona,+ re dula re letile ka go se fele pelo.+

26 Le gona moya o mokgethwa o kgona go re thuša ge re fokola,+ ka gobane re a tseba gore re swanetše go rapela, eupša re ka no se tsebe gore re rapelele eng. Moya wo o ka re phophothela ge re tshwenyegile ebile re sa tsebe gore re reng. 27 Modimo o lebeledišiša dipelo tša rena,+ ebile o kwešiša seo moya o se kgopelelago bakgethwa ka gobane se dumelelana le seo a se ratago.

28 Re a tseba gore Modimo o nyaka gore mediro ya gagwe ka moka e dirišane, e le gore batho bao ba mo ratago ba holege, e lego bao a ba biditšego ka go dumelelana le morero wa gagwe.+ 29 O ba tsebile e sa le pele, a ba kgetha gore ba tle ba swane le Morwa wa gagwe,+ e le gore Morwa wa gagwe e be leitšibulo+ leo le nago le baratho ba bantši.+ 30 Le gona o ile a bitša+ bona bao a ba kgethilego e sa le pele+ a ba a bolela gore ba lokile.+ Mafelelong bona bao a rego ba lokile ke bona ba tlago go hwetša maemo a godimo.+

31 Re tla reng ka ditaba tše? Ge e ba Modimo a na le rena, ke mang yo a ka lwago le rena?+ 32 Ka ge a ile a re nea Morwa wa gagwe gore a tle a re hwele,+ na yena le Morwa wa gagwe ba ka se re nee dilo tše dingwe ka moka ka ge ba e na le botho? 33 Ke mang yo a ka bonago batho bao Modimo a ba kgethilego molato?+ Ga a gona ka gobane Modimo ke yena a rego ba lokile.+ 34 Ke mang yo a tlago go ba bona molato? Ga a gona, ka gobane Kriste Jesu ke yena a ba hwetšego. O ile a tsošwa bahung a yo dula ka letsogong le letona la Modimo+ gomme o re rapelela a le moo.+

35 Ke mang goba ke eng seo se ka dirago gore Kriste a se sa re rata?+ Na ke mathata, tlalelo, tlaišo, tlala, go hloka diaparo, kotsi goba go tšhošetšwa ka go bolawa ka sabola?+ 36 Mangwalo a re: “Re bolawa letšatši ka moka ka ge re go hlankela, manaba a rena a re lebelela re le dinku tšeo di swanetšego go hlabja.”+ 37 Le ge go le bjalo, re a fenya dilong tše ka moka+ ka gobane re thušwa ke yo a re ratilego. 38 Ke kgodišegile gore ga go na selo seo se ka dirago gore Modimo a se sa re rata, e ka ba lehu, bophelo, barongwa, mebušo, dilo tšeo di sa tlago go tla, dilo tšeo di lego gona gona bjale, maatla,+ 39 dilo tšeo di lego godimo goba tšeo di lego tlase goba tlholo le ge e le efe. Ga go na selo le setee seo se ka dirago gore Modimo a se sa re rata, ka ge a re bontšhitše gore o a re rata ka Kriste Jesu Morena wa rena.