Ditiro tša Baapostola
17 Bjale Paulo, Silase le Timotheo ba ile ba sepela ba feta Ampifoli le Apolonia gomme ba fihla Thesalonika+ mo go bego go na le sinagoge ya Bajuda. 2 Ka ge Paulo a be a tlwaetše+ gore mo a fihlago gona o ya sinagogeng, o ile a ya moo gomme a bolela le bona ka mangwalo. O ile a fetša disabatha tše tharo tša go latelana a dira seo, a ba a ba bontšha ka Mangwalong+ 3 le go ba hlalosetša gore Kriste o be a swanetše go tlaišwa+ le go tsošwa bahung,+ a re: “Yo ke Jesu Kriste yo ke le botšago ka yena.” 4 Seo se ile sa dira gore ba bangwe ba bona ba dumele go Modimo, gomme ba phela ba na le Paulo le Silase.+ Basadi ba maemo le Bagerika ba bantši bao ba bego ba dumela go Modimo le bona ba be ba phela ba na le Paulo le Silase.
5 Bajuda ba ile ba ba le mona+ gomme ba kgobokanya banna bao ba dirago dilo tše mpe bao ba bego ba emaema mmarakeng ba sa dire selo gore ba tsoše mmudubudu mo motseng. Ba ile ba tsena ntlong ya Jasoni ba galefile, ba nyaka gore a tliše Paulo le Silase go bona. 6 Ge ba sa ba hwetše ka moo ntlong, ba ile ba gogela Jasoni le ba bangwe ba barutiwa go babuši ba motse, ba goeletša ba re: “Batho bao ba hlakahlakanyago lefase ba fihlile le mo motseng wa gabo rena.+ 7 Jasoni o ba amogetše ntlong ya gagwe. Banna ba ba ganetšana le molao wa Kesara, ba re go na le kgoši e nngwe yeo e bitšwago Jesu.”+ 8 Ge batho bao le babuši ba motse ba kwele ditaba tše, ba ferekana. 9 Ka morago ga gore Jasoni le barutiwa ba bangwe ba patele peile ba ile ba ba lesa ba sepela.
10 Ya re ge e eba bošego, barutiwa ba iša Paulo le Silase Berea. Ge ba fihla moo ba ya sinagogeng ya Bajuda. 11 Bjale Baberea ba be ba rata go ithuta go feta Bathesalonika, ka gobane ba ile ba amogela lentšu la Modimo ka dipelo tša bona ka moka. Ba be ba hlahloba Mangwalo letšatši le letšatši go bona ge e ba dilo tšeo ba di kwelego e le nnete. 12 Ka baka leo batho ba bantši ba Berea e ile ya ba barutiwa go akaretša le banna le basadi ba bantši ba Bagerika bao ba bego ba na le botumo bjo bobotse. 13 Eupša ge Bajuda ba kua Thesalonika ba ekwa gore Paulo o be a bolela lentšu la Modimo kua Berea, ba ile ba tla moo go tlo tsoša mmudubudu le go ferekanya batho.+ 14 Gateetee banababo rena ba ile ba iša Paulo lewatleng,+ eupša Silase le Timotheo ba ile ba šala. 15 Banababo rena bao ba ile ba felegetša Paulo go fihla Athene. Ka morago ga gore ba kwe gore Paulo o nyaka gore Silase le Timotheo+ ba tle go yena ka pela ba ile ba boela morago.
16 Bjale ge Paulo a be a letile Silase le Timotheo kua Athene o ile a ferekana ge a be a bona gore motse woo o tletše ka medingwana ya diswantšho. 17 Ka gona o ile a thoma go ruta Bajuda bao ba bego ba le sinagogeng le batho ba bangwe bao ba bego ba hlankela Modimo, ebile o be a botša batho ka moka bao a bego a hlakana le bona mmarakeng letšatši le lengwe le le lengwe ditaba tše dibotse. 18 Bjale boradifilosofi ba bangwe ba Baepikure le ba Bastoiki ba ile ba thoma go ngangišana le Paulo, ba bangwe ba be ba re: “Motho yo wa go balabala o reng?” Ba bangwe ba re: “Go kwagala a bolela ka medimo yeo re sa e tsebego.” Ba boletše se ka gobane o be a bolela ditaba tše dibotse ka Jesu le ka taba ya gore batho ba tlo tsošwa bahung.+ 19 Ba ile ba mo tšea ba mo iša kgorong ya tsheko e phagamego ya Athene* ba re: “Na o ka re botša ka dithuto tše diswa tšeo o di rutago batho? 20 Ka gobane o re botša dilo tšeo re sa kago ra di kwa, re nyaka go tseba gore dilo tšeo o di rutago di ra goreng.” 21 Ge e le gabotse batho ba Athene ka moka le batho bao ba tšwago dinageng tše dingwe bao ba dulago* moo ba be ba fetša nako ya bona ba theeditše dithuto tšeo tše diswa goba ba bolela ka tšona. 22 Paulo a ema pele ga kgoro yeo ya tsheko+ a ba araba a re:
“Lena banna ba Athene, ke lemogile gore le hlompha* medimo kudu go feta kamoo batho ba bangwe ba e hlomphago ka gona.+ 23 Ka mohlala ge ke dutše ke sepela mo motseng ke ile ka bona dilo tšeo le di rapelago gomme ka bona aletare yeo e ngwadilwego gore ‘Aletare ya Modimo yo re sa mo Tsebego.’ Ka gona ke tlile go le tsebiša yena Modimo yoo le mo rapelago le sa mo tsebe. 24 Modimo yoo ke yena yo a bopilego lefase le dilo ka moka tšeo di lego go lona. Legodimo le lefase ke tša gagwe,+ ga a dule ditempeleng tšeo di dirilwego ke batho,+ 25 ebile ga a hloke go thušwa ke motho+ ka gobane ke yena a neilego batho ka moka bophelo, mohemo+ le dilo ka moka. 26 Ke yena a dirilego gore ditšhaba ka moka di tšwe go motho o tee+ gore di dule lefaseng ka moka,+ ke yena a beago dinako tša gore dilo tše itšego di direge ebile ke yena a kgethilego gore batho ba ditšhaba tšeo ba tlo dula kae mo lefaseng,+ 27 e le gore ba mo tsome. Ka gobane ge ba ka mo tsoma ba tlo mo hwetša+ ka ge a le kgauswi le yo mongwe le yo mongwe wa rena. 28 Ka gobane re a phela, re a sepela ebile re gona ka baka la gagwe, go etša ge direti di ile tša re: ‘Le rena re bana ba gagwe.’
29 “Ka ge re le bana ba Modimo,+ ga se ra swanela go nagana gore Modimo o swana le gauta, silifera goba leswika. Ga a swane le dilo tšeo batho ba bego ba di dira goba tšeo ba bego ba nagana go di dira.+ 30 Ke nnete gore batho ba be ba dira dilo tšeo ba sa tsebe,+ eupša Modimo ga se a ka a ba dira selo. Le ge go le bjalo gona bjale o botša batho lefaseng ka moka gore ba swanetše go itshola. 31 Ka gobane o beile letšatši leo a tlago go ahlola+ lefase ka moka ka toka a diriša motho yo a mo kgethilego. Batho ka moka ba ka kgodišega ka gobane Modimo o tsošitše motho yoo bahung.”+
32 Bjale ge ba kwele Paulo a bolela ka gore bahu ba tlo tsošwa, ba ile ba thoma go mo kwera+ mola ba bangwe ba ile ba re: “Re tla go theetša letšatši le lengwe.” 33 Ka gona Paulo o ile a sepela. 34 Eupša batho ba bangwe bao ba ilego ba sepela le yena ba ile ba fetoga barutiwa. Gare ga bona go be go na le Dionisio e lego moahlodi wa kgoro ya Areopago le mosadi yo mongwe yo a bitšwago Damarisi.